3 Jesus Hem Olsem God

Samfala Bible sei olsem long John 1:1: “Long bifor kam, Word hem stap, and Word hem stap witim God, and Word hem God.” Samfala sei diswan hem minim “Word,” wea hem Jesus, hem nao Olmaeti God. Waswe, diswan hem tru? Sapos diswan hem minim Jesus hem Olmaeti God, hem againstim nara part bilong datfala verse wea sei, “Word hem stap witim God.” Diswan hem bikos sapos samwan hem “stap witim” narawan, hard tumas for tufala hia sem man nomoa. Dastawe, wei wea olketa transleitim disfala verse long staka Bible hem showimaot klia Word hem no Olmaeti God.

Olketa Bible transleison antap, wea olketa long English, French, and German languis, iusim toktok olsem “wanfala god,” or “olsem god” bikos Greek languis long first century no iusim word olsem “wanfala” taem hem story abaotem samting or samwan. Long tingting bilong samfala savveman, John 1:1 shud sei: “Datfala Word hem God” bikos Greek languis no garem “wanfala.” Bat long plande nara scripture olsem Acts 12:22 and 28:6, olketa sei “wanfala god” long transleison bilong olketa nomata Greek languis no garem “wanfala.” Long datfala first toktok long verse wea sei “Word hem stap witim God,” Greek languis hem sei: “datfala Word hem stap witim datfala God,” wea showimaot “God” hia hem Olmaeti God. For showimaot diswan long English and long Solomon Islands Pidgin olketa raetem “God” witim kapitol “G.” Bat long nara haf long verse wea hem sei “datfala Word hem God” Greek languis hem no sei “datfala God.” Hao olketa raetem disfala sentence showimaot hem minim “wanfala god” or “samwan wea olsem God.”