Introduction

God story kam lo iumi evriwan thru lo olketa raeting wea stap insaed lo Holy Bible. For savve lo Author blo Bible iumi mas studyim. (John 17:3; 2 Timothy 3:16) Insaed lo Bible, Jehovah God showim purpose blo hem for iumi olketa man and for disfala earth.—Genesis 3:15; Revelation 21:3, 4.

No eni nara buk hem savve helpem pipol olsem Bible. Bible helpem iumi for garem olketa wei blo Jehovah olsem love, mercy, and for sorre lo narawan. Hem givim hope, and helpem pipol for no givap nomata olketa kasem barava hard samting. And hem gohed for showim wat nao olketa nogud wei blo disfala world wea no followim perfect will blo God.—Psalm 119:105; Hebrews 4:12; 1 John 2:15-17.

Firstaem olketa raetem Bible lo Hebrew, Aramaic, and Greek languis, bat bihaen olketa transleitim full Bible or samfala part lo winim 3,000 languis. Lo history, no eni nara buk olketa transleitim and distributim olsem Bible. Iumi no sapraes lo datwan. Bible profesi sei: “Disfala gud nius abaotem Kingdom [main message insaed Bible] bae olketa talemaot lo evri ples lo earth for pipol lo evri kantri mas herem, and bihaen datwan nao, end bae kam.”—Matthew 24:14.

From mifala luksavve message insaed Bible hem important tumas, goal blo mifala hem for producem wanfala accurate transleison wea followim original raeting and tu wea klia and isi for readim. Olketa article hia lo Appendix “Olketa Gaedlaen for Transleitim Bible,” “Olketa Feature blo Disfala Transleison,” and “Hao Gogo Bible Kasem Iumi” storyim olketa transleison gaedlaen wea mifala followim, and tu, hem explainim olketa feature blo disfala Bible.

Olketa wea lovem Jehovah God and worshipim hem laekem wanfala Bible transleison wea stret and isi for minim. (1 Timothy 2:4) Dastawe mifala transleitim disfala Bible lo Solomon Islands Pidgin bikos hem goal blo mifala for transleitim Bible go lo staka difren languis. Mifala hope and prea dat taem iu readim disfala transleison blo Holy Scripture bae datwan helpem iu for ‘lukaotem God . .  . and faendem hem.’—Acts 17:27.