A2
Olketa Feature blo Disfala Transleison
New World Translation of the Christian Greek Scriptures hem release lo English lo 1950, and complete New World Translation of the Holy Scriptures olketa pablisim lo 1961. Start lo datfala taem, staka million pipol lo winim 210 languis kasem gud samting from disfala transleison from olketa original languis blo Holy Scripture wea hem barava stret and hem isi for readim.
Winim fifti year wea go pas languis hem change. Niu World Bible Transleison Komiti luksavve olketa need for iusim languis wea kasem heart blo pipol distaem wea readim Bible. From diswan, hao for transleit and olketa gaedlaen saed lo word wea olketa transleita mas tingim taem olketa transleit hem olsem:
Need for explainim samfala toktok lo Bible. Samfala toktok wea olketa iusim lo English New World Translation, olketa mas explainim mekem hem klia. For example, olketa iusim insaed lo Bible datfala Hebrew word “Sheol” and Greek word “Hades” for minim grev blo olketa man. Olketa word hia staka no minim, and “Hades” garem nara mining bikos lo kastom story blo olketa lo Greece. Dastawe, olketa changem tufala word hia go lo “Grev,” for garem sem mining olsem hao olketa wea raetem Bible bifor olketa minim. So, toktok hia “Sheol” and “Hades” hem stap nao lo footnote.—Psalm 16:10; Acts 2:27.
Lo olketa Bible edition bifor, datfala Hebrew word neʹphesh and Greek word psy·kheʹ olketa savve transleitim for “soul.” Bikos lo rong idea wea samfala pipol garem abaotem disfala word “soul,” so disfala Bible transleitim tufala word hia followim context for helpem reader for lukim hao nao olketa wea raetem Bible iusim tufala word hia lo original languis. So, olketa transleitim tufala word hia followim context wea minim (1) man, (2) laef blo wanfala man, (3) laef samting, (4) samting wea man laekem tumas or samfala taem (5) hem man wea dae tu. And olketa putim tufala word hia lo footnote and explainim lo Dictionary.—Genesis 1:20; 2:7; Leviticus 19:28; Psalm 3:2; Matthew 6:25.
Semsem tu, disfala Bible iusim datfala word “kidney” taem hem storyim kidney lo body. Bat, taem mining blo disfala word hem wanfala tokpiksa olsem lo Psalm 7:9 and 26:2 and Revelation 2:23, wea mining blo hem “feeling wea stap deep insaed” or “wanem mi tingim wea stap deep insaed” hem stap lo main text, and literal idea hem stap lo footnote.
Olketa nara feature blo disfala Bible:
Disfala Bible transleison garem samfala footnote. Olketa footnote hia hem olsem:
“Or” Hem nara wei for talem samting lo Hebrew, Aramaic, or Greek languis wea garem sem idea.—Genesis 1:2, footnote lo “paoa blo God”; Joshua 1:8, “read smol lo hem.”
“Or maet” Hem nara wei for talem samting wea hem stret bat hem garem difren idea.—Genesis 21:6, “laf witim mi”; Zechariah 14:21, “Canaanite.”
“Lit.” Hem word-for-word transleison lo Hebrew, Aramaic, or Greek languis or hem main mining blo wanfala saying blo datfala original languis.—Genesis 30:22, “babule”; Exodus 32:9, “bighed.”
Mining and baekgraon information Mining blo olketa nem (Genesis 3:17, “Adam”; Exodus 15:23, “Marah”); information abaotem olketa weight and olketa measurement (Genesis 6:15, “cubit”); man wea verse storyim (Genesis 38:5, “Olketa”); olketa information wea savve helpem man hem lo Appendix and Dictionary.—Genesis 37:35, “Grev”; Matthew 5:22, “Gehenna.”
Datfala sekson lo front wea title blo hem “Introduction for Word blo God,” hem garem olketa main teaching wea insaed Bible. Bihaen datwan hem garem “Table blo Olketa Buk lo Bible,” “Bible Word Index,” and “Dictionary blo Olketa Bible Word.” Dictionary helpem reader for understandim samfala toktok wea Bible iusim. Appendix A garem olketa sekson hia: “Olketa Gaedlaen for Transleitim Bible,” “Olketa Feature blo Disfala Transleison,” “Hao Gogo Bible Kasem Iumi,” “History Abaotem Nem blo God Insaed Olketa Hebrew Scripture,” “History Abaotem Nem blo God Insaed Olketa Christian Greek Scripture,” “Chart: Olketa Profet and Olketa King blo Judah and blo Israel,” and “Olketa Big Samting wea Happen lo Laef blo Jesus lo Earth.” Appendix B garem olketa map, olketa chart, and olketa nara information for helpem Bible student for duim deep study.
Lo disfala Bible, each buk hem garem list blo olketa chapter and verse wea helpem reader for savve wat nao datfala Bible buk story abaotem. Lo midol sekson blo each page hem garem olketa important marginal reference wea point go lo olketa nara verse.