KWESTIN 2
Wanem nao iu savve duim for lane abaotem God?
“Iu shud no stop for storyim olketa toktok insaed buk blo Law hia lo olketa narawan. And iu mas read smol lo hem day and naet, mekem iu savve barava obeyim evri samting wea olketa raetem insaed. Sapos iu duim olsem, iu bae garem gudfala laef and bae iu duim wise samting.”
“Olketa gohed for read big from buk blo Law blo datfala tru God, and explainim Law hia and helpem pipol hia for minim datwan. So olketa helpem pipol hia for savve hao for followim wanem olketa herem.”
“Hapi nao man wea no wakabaot followim advaes blo wicked pipol . . . , bat hem hapi lo law blo Jehovah, and hem read smol lo law blo God day and naet. . . . Evriting wea man hia duim bae kamap gud.”
“Philip ran go saed lo chariot hia and hem herem datfala man readim laod buk blo profet Isaiah, and Philip sei: ‘Hao, iu minim samting wea iu readim?’ Man hia sei: ‘Hao nao bae mi savve sapos no eniwan explainim lo mi?’”
“Olketa wei blo God wea man no savve lukim hem showaot klia start kam lo creation blo world kam kasem distaem, bikos olketa showaot klia lo olketa samting wea hem wakem, and olketa showim tu paoa blo hem wea no savve finis and dat hem nao tru God. So olketa no garem eni excuse for no biliv lo God.”
“Ting raonem olketa samting hia; tingting strong lo olketa, mekem evri pipol lukim klia dat iu gohed grow lo spiritual wei.”
“Iumi mas barava tingim narawan, mekem iumi savve encouragem olketa for showimaot love and duim olketa gudfala samting. No misstim wei for hipap tugeta.”
“Sapos eniwan lo iufala hem needim wisdom, hem mas gohed askem God and bae hem kasem datwan, bikos God hem kaen tumas for givim samting lo evriwan and bae hem no kros lo man wea askem hem.”