KWESTIN 6
Wat nao samfala profesi lo Bible abaotem Messiah?
PROFESI
“Iu, O Bethlehem Ephrathah, . . . wanfala man bae kam from iu wea hem bae rul for mi lo Israel.”
PROFESI FULFILL
“Bihaen Jesus born lo Bethlehem lo Judea lo taem wea Herod hem king, olketa astrologer from East, olketa kam lo Jerusalem.”
PROFESI
“Olketa divaedem kaleko blo mi between olketa seleva, and olketa iusim olketa smol ston for divaedem olketa kaleko blo mi.”
PROFESI FULFILL
“Bihaen olketa soldia nilam Jesus lo post, olketa tekem olketa nara kaleko blo hem and divaedem lo fofala haf . . . Datfala long kaleko barava spesol bikos no eni part blo hem garem join. So olketa sei lo each other: ‘Iumi no brekem disfala kaleko, bat iumi iusim olketa smol ston for disaedem hu nao bae tekem.’”
PROFESI
“Hem protectim evri bon blo hem.
No eniwan lo olketa hem brek.”
PROFESI FULFILL
“Taem olketa kam lo Jesus, olketa lukim hem dae finis, so olketa no brekem leg blo hem.”
PROFESI
“Olketa spiarim hem for sin blo iumi.”
PROFESI FULFILL
“Wanfala soldia spiarim hem lo saed bele blo hem, and semtaem nomoa, blood and wata kamaot nao.”
PROFESI
“Wages blo mi wea olketa peim hem 30 silver shekel.”
PROFESI FULFILL
“Then Judas Iscariot wea hem wanfala lo twelvfala aposol, hem go lo olketa chief priest and hem sei lo olketa: ‘Wat nao bae iufala givim lo mi sapos mi givim hem go lo iufala?’ Olketa sei bae olketa givim 30 silver shekel lo hem.”