Hao Big Nao Danger Bilong Television?
Long December 18, 1997, olketa niuspepa reportim hao wanfala television cartoon mekem planti pipol sik long Tokyo, Japan. Planti hundred go long hospital. “Samfala pikinini toraotem blood and samfala fall daon haf dead,” The New York Times hem say. “Olketa doctor givim warning hao disfala samting wea happen hem barava showimaot hao samfala television program savvy spoelem pikinini.”
Daily News bilong New York hem say: “Bigfala fraet kasem Japan yesterday bihaen wanfala TV cartoon devil iusim red eye bilong hem for sutsut and hem mekem planti hundred pikinini fall daon haf dead long datfala kantri.
“Klosap 600 pikinini and samfala full-grown man mas admit long hospital kwiktaem long Tuesday naet bihaen olketa lukim . . . wanfala TV cartoon.” Samfala mas kasem spesel treatment, from olketa barava short wind.
Yukiko Iwasaki, wanfala mami wea pikinini bilong hem eit year, hem say: “Mi seke taem mi lukim dota bilong mi fall daon haf dead. Hem kasem back wind nomoa taem mi hitim backsaed bilong hem.”
Olketa man wea workim olketa television program for pikinini nating savvy meanim hao wanfala way for workim cartoon wea olketa iusim “planti hundred taem” savvy bringim nogud samting olsem.
From samfala mami and dadi luksavvy long danger bilong television, olketa seleva nao choosim wanem television program olketa pikinini fit for lukim or samfala tu aotem TV from haos. Wanfala dadi long Allen, Texas, long U.S.A., lukim hao taem television stap long haos, pikinini bilong hem “no savvy tingting gud, savvy kros, no willing for obey, and barava no interest.” Hem say moa: “Distaem, klosap evriwan long faevfala pikinini bilong mi—wea age bilong olketa hem 6 go kasem 17—olketa nao top student long class. From no eni TV stap, olketa kwiktaem start for interest long different samting olsem sport, way for read, paint, iusim computer, and nara samting moa.
“Mi nating savvy forgetim wanfala samting wea happen tufala year wea go pass. Boy bilong mi, wea 9 year, hem ring kam from wanfala party, and hem say hem laek kam back . . . Taem mi pikim hem and mi askim wanem nao problem, hem say, ‘Mi no interest long datfala party. Evriwan laek for sidaon and lukim TV nomoa!’”