Hu Nao Jesus Kraest?

Planti hundred million pipol believe Jesus Kraest hem born long December 25, samting olsem 2,000 year bifor. Planti painting and karving showim hem olsem wanfala baby long ples for animal kaikai. But, hem tru, hem grow ap and laef long earth for 33 and 1/2 year.

WASWE, enitaem iu tingting abaotem lukluk bilong Jesus taem hem full grown man? Wanem nao color skin bilong hem? Waswe, hem strong and luk naes, or hem weak and luk sik, olsem samfala piksa showim? Waswe, hem garem beard or nomoa? Hem garem long hair?

And tu, waswe, Jesus garem samting wea showimaot hem holy, olsem laet raonem hed bilong hem wea samfala piksa showim? Or waswe, different samting nao hem tru—hem no garem eni samting wea mekem hem luk different but hem semsem withim nara pipol?

Olketa savvyman bilong history and olketa man wea drawim olketa piksa talemaot olketa different idea abaotem lukluk bilong Jesus. And tu, olketa idea wea stret evribit stap insaed Bible wea pipol wea laef long first century wea lukim and kaban withim hem raetem.

But, olketa kwestin hia barava important winim hao nao lukluk bilong hem: Hu stret nao Jesus Kraest? Wanem nao work bilong hem long purpose bilong God? Waswe, hem fulfillim datwan finis? Hem wanem distaem, and wea nao hem? Waswe, hem garem barava important position wea bae affectim evri man, nomata olketa wea dae finis?

Firstaem, letem iumi lukluk long pruf abaotem lukluk bilong Jesus. Hem luk hao?