Jesus Hem Wanem Distaem
NOMATA iumi interest long lukluk bilong Jesus, hem moa important for luksavvy hem wanem distaem and wea nao hem. Wanem nao work bilong hem insaed purpose bilong God for olketa man?
History no savvy givim iumi olketa ansa. Olketa stap insaed wanfala buk nomoa wea God raetem for helpem pipol wea lukaotem truth. And diswan nao Holy Bible, or olketa Holy Scripture, buk wea kasem planti ples long world winim eni nara buk.
Bible hem no nara buk nomoa wea olketa man raetem. Nomata olketa man nao raetem, tingting hem really bilong God: “Evri Scripture kam from God and gud for teachim, for kaonselem, for stretem evri samting, for givim discipline long raeteous fasin, mekem man bilong God hem fit evribit, barava ready for duim evri gudfala work.”—2 Timothy 3:16, 17.
Aposol Paul luksavvy wanem nao Bible, from hem raet olsem: “Taem iufala kasem word bilong God, wea iufala herem from mifala, iufala acceptim, no olsem word bilong man, but, olsem trufala word bilong God.”—1 Thessalonians 2:13.
God nao hem Olmaeti Creator bilong universe, wea garem planti billion galaxy and planti billion star insaed evri galaxy. Hem garem barava spesel paoa for create-im evri samting hia! Disfala Olmaeti Wan, wea mekem nambawan universe hia, mas barava fit for raetem buk wea savvy gaedem eniwan wea lukaotem truth.
Samting Wea Bible Talem
Word bilong God mekem klia hao olabaot tingting and idea wea pipol garem abaotem Jesus hem rong. Lukim samfala information wea hem givim abaotem Jesus:
• Jesus nao first and only wan wea God seleva create-im planti year bifor long heven, bifor olketa angel and universe. Dastawe olketa kolem hem “only-born Son” bilong God. Evri nara samting kamap thru long Son, “nambawan workman,” bilong God taem hem stap long heven bifor.—John 3:16; 6:38; 8:58; Proverbs 8:30; Colossians 1:16.
• Samting olsem 2,000 year bifor, God putim laef bilong Jesus insaed bele bilong wanfala Jew woman, mekem hem born olsem man. Nomata distaem, thru long artificial insemination, olketa man fit for duim samting wea klosap semsem.—Matthew 1:18; John 1:14.
• Jesus hem no wanfala gudfala man nomoa. Taem hem full-grown man hem showimaot long perfect way love, fasin for care, and raeteous fasin bilong Father bilong hem long heven, Jehovah God.—John 14:9, 10; Hebrews 1:3; 1 John 4:7-11, 20, 21.
• Olsem man wea stand for God long earth, Jesus care long wanem pipol wea poor and wea kasem bigfala hevi needim, nomata olsem hem nating lukdaonem olketa wea rich. Withim help from holy spirit bilong God, long mirakol way Jesus healim olketa wea sik and resurrectim olketa wea dae. Taem hem duim olketa nambawan work olsem, hem showimaot long smallfala way samting wea hem bae duim long earth bihaen hem resurrect from dae and go long heven and kamap King long Kingdom bilong God long heven.—Matthew 11:4-6; Luke 7:11-17; John 11:5-45.
• Datfala Kingdom bilong God long heven nao samting wea Jesus teachim olketa follower bilong hem for prea abaotem and putim long first ples insaed laef bilong olketa. “Hem bae smasem and finisim evri kingdom hia, and hem nao bae stap go kasem taem olowe.” Long datfala taem, Kingdom nomoa bae kamap gavman long earth. Hem nomoa hope for olketa man wea suffer.—Daniel 2:44; Matthew 6:9, 10.
• God nao Father bilong Jesus, and Jesus hem faithful long God. Dastawe, taem olketa killim dae Jesus, hem wanfala perfect man. Hem willing for givim perfect laef bilong hem long God olsem wanfala ransom sakrifaes for kasem back samting wea Adam lusim taem hem againstim God. Taem Jesus duim diswan, hem openem way for evriwan wea showimaot faith long hem for kasem laef olowe.—John 3:16; Romans 3:23, 24; 1 John 2:2.
• Olsem King long heven wea God appointim, Jesus bae duim purpose bilong God for aotem badfala fasin from earth and for mekem man wea obey for kasem perfect mind and body. From diswan man bae stap midolwan long peace and hapi insaed wanfala paradaes earth, withim gudfala haos and planti kaikai for evriwan. Sik, sorry, and dae bae finis evribit. Nomata olketa wea dae bae resurrect and garem chance for laef olowe long earth.—Genesis 1:26-28; 2:8; Psalm 37:10, 11, 29; Proverbs 2:21, 22; Isaiah 25:6; 65:21-23; Luke 23:43; Acts 24:15; Revelation 21:3, 4.
So, long kliafala way Bible talem iumi hao Jesus nao main wan long purpose bilong God for startim wanfala niu world bilong raeteous fasin hia long earth. Bikos long important work bilong hem, Jesus fit for say: “Mi nao way and truth and laef. No eniwan savvy kam long Father but only thru long mi.”—John 14:6; 2 Peter 3:13.
Wanfala Ruler Wea Garem Fasin for Care
Olketa humble pipol wantem Jesus for kamap ruler bilong olketa long niu world, and bae hem wanfala barava different, hapi ruler! Wanfala way wea hem showimaot diswan hem thru long olketa nambawan healing wea hem duim taem hem stap long earth. (Matthew 15:30, 31) But lukim tu, kaen rul wea Jesus bae duim.
Tingim firstaem record bilong olketa ruler long world. History showimaot hao thru long planti year, olketa ruler hia kamap raf and no garem love, leadim pipol bilong olketa insaed planti war, barava nogud fasin, inquisition, and killim dae staka pipol. Long disfala mek-20 century nomoa, winim 100 million pipol nao dae insaed olketa war.
Record bilong fasin bilong olketa ruler long disfala world barava different from way wea Jesus deal withim olketa wea poor, suffer from bigfala hevi, and feel nogud: “Taem hem lukim olketa pipol hem feel sorry long olketa, from olketa garekil and stap olabaot olsem olketa sheepsheep wea no garem eni shepherd.” So hem say long olketa: “Kam long mi, iufala evriwan wea work hard tumas and karim bigfala hevi, and mi nao bae strongim iufala. Karim yoke bilong mi and learnim samting from mi, from mi garem kwaet fasin and mi humble long heart, and iufala bae faendem samting for strongim soul bilong iufala. From yoke bilong mi hem kaenfala and load bilong mi hem no hevi.”—Matthew 9:36; 11:28-30.
Jesus barava garem fasin for care long pipol! Long diswan hem followim Father bilong hem long heven. Jesus barava piksarem love, and hem teachim olketa disaepol bilong hem for garem tru love for narawan. From diswan bae olketa no letem color skin, kantri, way for rich or poor, religion bilong man bifor, or eni samting for spoelem way wea olketa garem wan mind evriwea. (John 13:34, 35; Acts 10:34, 35) Tru nao, Jesus barava love-im pipol dastawe hem givim laef bilong hem for olketa. (Ephesians 5:25) Hem nao kaen ruler wea disfala world needim and bae kasem.
Distaem Jesus Hem Wanfala King Wea “Luk Naes”
Profesi bilong word bilong God helpem iumi for meanim hao distaem Jesus hem wanfala King long heven wea garem paoa. Man wea raetem psalm say olsem abaotem hem: “Iu barava luk naes winim olketa son bilong man. . . . Long glory bilong iu go and win; raed long saed bilong truth and humble fasin and raeteous fasin . . . Iu love-im raeteous fasin, and iu hate-im badfala fasin. Dastawe God, God bilong iu, anointim iu withim oil bilong bigfala hapi.”—Psalm 45:2, 4, 7.
Olsem King long heven wea God anointim, Jesus garem work for showimaot way wea hem love-im raeteous fasin and hate-im badfala fasin taem hem duim samting. Dastawe, Bible kolem hem olsem wanfala man for win wea kanduit dae, “King bilong olketa king,” wea klosap nao bae finisim evribit olketa enemy bilong God. And tu, bae hem mekem earth kamap wanfala paradaes and givim perfect laef for olketa man.—Revelation 19:11-16.
Niufala work bilong Jesus bae no olsem wanfala ‘Messiah wea suffer’ wea olketa enemy bilong hem mek funny, hitim, and killim hem dae. But, niufala work bilong hem, hem olsem “Maeti God,” ruler bilong earth. (Isaiah 9:6) Diswan hem no nius wea planti ruler long earth want for herem, bikos klosap nao olketa kingdom bilong olketa bae smas evribit, olsem Daniel 2:44 talem. Taem hem iusim Kraest olsem man bilong hem for bringim judgment, God “bae brekem olketa king long day bilong kros bilong hem. Bae hem bringim judgment long olketa nation.”—Psalm 110:5, 6.
Isaiah talemaot taem Kraest duim diswan, bae hem “mekem planti nation for sapraes. Evri king bae satem mouth bilong olketa long hem.” Why nao olsem? “Bikos samting wea [olketa bigman bilong olketa] no talem bae olketa lukim, and samting wea olketa no herem bae olketa mas tingting raonem.”—Isaiah 52:15.
“Harvestim Cyclone”
Long disfala profesi, Isaiah talem hao olketa leader bilong religion fail for duim work bilong olketa. Example, olketa no teachim truth bilong Bible but teachim samting wea no kam from Bible long pipol bilong olketa olsem way for suffer olowe long hell-fire, trinity bilong threefala god insaed wanfala, and way wea soul kanduit dae—evriwan garem start long heathen. And olketa bigman long church supportim olketa war, nomata sapos diswan meanim way for killim dae pipol bilong sem religion. Diswan barava againstim olketa komandment bilong God.—1 John 2:3, 4; 3:10-12; 4:8, 20, 21.
And tu, olketa bigman long church givim pipol bilong olketa samting wea eye laekem but, long eye bilong God, hem no garem meaning olsem olketa image bilong religion, spesel kaleko, olketa church wea kost tumas, and olketa painting wea mekhae long heathen teaching, wea insaed diswan hem laet wea stap raonem hed bilong sun-god. Olketa duim diswan nomata komand bilong God for olketa servant bilong hem say: “Tanawe, tanawe, goaot from there, no touchim eni samting wea dirty . . . , iufala wea karim olketa samting bilong Jehovah.”—Isaiah 52:11; 2 Corinthians 6:14-18.
Pipol wea say olketa stand for God but wea againstim olketa komandment bilong hem and teachim nara pipol for duim sem samting bae harvestim wanem olketa plantim. Bae olketa kasem strongfala judgment and panis taem disfala system finis evribit. Olsem profet Hosea say, “olketa plantim wind, and bae olketa harvestim cyclone.”—Hosea 8:7, King James Version; lukim tu Revelation 17:1-3, 15, 16.
Pipol Wea Garem Honest Heart Learnim Truth
Way wea olketa bigman bilong church meanim God and Jesus long rongfala way bae no stopem pipol wea garem honest heart for learnim truth abaotem Jesus. Long first century, hem no stopem olketa, bikos olsem Paul Barnett raetem insaed The Two Faces of Jesus, “Kraest hem no man wea jump from parachute wea fall daon from skae insaed history, wea no eniwan talemaot.” Tru nao, long taem bifor kam, Bible “talemaot” long stretfala way profesi abaotem Messiah, wea givim pruf long olketa loyal disaepol bilong hem hao bae hem kam. Distaem planti pruf stap wea talemaot hao Jesus kasem paoa from God for kamap nambawan “King bilong olketa king.”—Matthew 24:3-13; 2 Timothy 3:1-5, 13.
Tru tumas, “olketa bae talemaot disfala gud nius bilong kingdom [bilong God withim Kraest olsem ruler] evriwea long earth for givim witness long evri nation; and then end bae kam.” (Matthew 24:14) Olketa Witness Bilong Jehovah wea namba bilong olketa winim faev million, duim diswan evriwea long world. So olketa wea want for savvy long Jesus fit for duim. (John 10:14; 1 John 5:20) And for savvy and obeyim hem nao barava important for winim “great tribulation” wea bae klosap kasem earth.—Revelation 7:9-14; John 17:3; 2 Thessalonians 1:6-10.
Olketa Witness Bilong Jehovah bae hapi tumas for helpem iu lukluk gud long story bilong Son bilong God wea fit for muvim man.
[Piksa long page 9]
Withim Kingdom paoa Kraest bae finisim evribit badfala fasin
[Piksa long page 10]
Under long loving rul bilong Kraest, disfala earth bae kamap paradaes