Tingting Bilong Bible

Wan Mind Long Religion Insaed Marit—Why Nao Hem Important

WANFALA famili sidaon for kaikai long evening. Taem dadi talem prea, mami prea long heart bilong hem long nara god. Insaed nara famili, waef hem lotu long wanfala church, bat hasband bilong hem go long wanfala synagogue. Long samfala famili maet dadi teachim pikinini abaotem Father Christmas, bat mami talem olketa abaotem Hanukkah.

Samfala report talem hao olketa samting olsem kamap big distaem from planti pipol marit aotsaed long religion bilong olketa. Wanfala survey showimaot hao long United States, 21 percent bilong olketa Catholic marit aotsaed long faith bilong olketa; midolwan long olketa Mormon namba hem 30 percent; for olketa Muslim, 40 percent; and for olketa Jew, winim 50 percent. Bikos for planti year olketa difren religion againstim narawan, samfala pipol tingim diskaen wei for marit insaed nara religion hem olsem wei for winim fasin for no acceptim nara religion. Wanfala man wea raet long niuspepa sei: “Iumi mas hapi long olketa marit wea pipol bilong enikaen [religion] join tugeta.” Waswe, diswan nao tingting bilong Bible?

Hem important for savve hao Bible no saportim wei for daonem pipol bilong difren color skin or tribe. Word bilong God apim wei for no favorim eni color skin. Aposol Peter talem klia samting long disfala point: “Tru nao, mi luksavve hao God no favorim eniwan, bat long evri nation man wea fraet long hem and duim raeteous fasin nao hem acceptim.” (Acts 10:34, 35) And tu, Bible teachim hao olketa tru worshiper bilong Jehovah mas marit “only insaed long Lord.” (1 Corinthians 7:39) Why nao olsem?

Purpose Bilong Marit

God minim marit for barava klos. (Genesis 2:24) Taem God startim marit arrangement, hem no minim wei for fren nomoa. Taem Jehovah givim first hasband and waef waka for garem pikinini and lukaftarem earth, hem talem hao olketa mas waka klos tugeta for duim will bilong hem. (Genesis 1:28) Long wei for waka tugeta for servem God long disfala wei, man and woman bae kasem hapi, no from wei for fren nomoa, bat long klos wei for stap tugeta for olowe.—Markem Malachi 2:14.

Jesus tingim diskaen wei for stap tugeta taem hem talem olketa toktok hia: “Olketa no tufala bat wanfala body. Dastawe, samting wea God joinim tugeta no eni man mas divaedem.” (Matthew 19:6) Jesus iusim tokpiksa taem hem markem marit witim yoke wea holem tugeta tufala animal for pullim or muvim wanfala load. Tingim hevi wea kasem tufala animal wea yoke tugeta taem tufala evriwan pull go long difren ples! Long sem wei, olketa wea marit aotsaed long tru faith maet faendem hem no isi for followim olketa Bible principle wea partner bilong olketa againstim. For fitim diswan, Bible sei: “No join tugeta long rong wei witim olketa wea no biliv.”—2 Corinthians 6:14.

Wanfala Marit wea Moabeta

Wan mind long tru worship savve barava strongim marit. Wanfala man for raet sei: “Wei for worship tugeta hem wanfala important mark for garem olketa gud, hapi famili.” Ecclesiastes 4:9, 10 hem sei: “Tufala hem winim wanfala, bikos tufala garem gudfala reward for hard waka bilong olketa. From sapos wanfala hem foldaon, narawan savve helpem partner bilong hem for standap.”

Taem wei for worship hem kamap important samting long laef bilong Christian hasband and waef, tufala garem wan mind no long physical saed nomoa bat long spiritual saed tu. Taem tufala prea tugeta, studyim Word bilong God tugeta, kaban witim olketa nara Christian, and sharem faith bilong olketa witim nara pipol, tufala mekem grow spiritual wei for fren wea savve barava mekem marit kamap gud. Wanfala Christian woman sei: “Tru worship hem wei bilong living. Mi no savve tingim sapos mi maritim samwan wea no garem sem tingting long hu nao mi and wanem nao mi.”—Markem Mark 3:35.

Olketa wea marit “insaed long Lord” savve expectim partner bilong olketa for followim fasin bilong Jesus. Olketa Christian hasband mas deal witim waef bilong olketa olsem long loving wei wea Jesus deal witim kongregeson. Olketa Christian waef mas showimaot respect long hasband bilong olketa. (1 Corinthians 11:3; Ephesians 5:25, 29, 33) Olketa Christian duim diswan no from olketa want for mekem partner bilong olketa hapi nomoa bat for mekem God hapi, wea tufala mas givim ansa long Hem long wei wea tufala deal witim narawan.—Malachi 2:13, 14; 1 Peter 3:1-7.

For followim olketa sem biliv savve helpem Christian hasband and waef for kasem ansa long olketa problem witim peace. Bible encouragem olketa Christian for evritaem tingim, “no interest long olketa samting bilong [olketa] seleva nomoa, bat interest long olketa samting bilong narafala pipol tu.” (Philippians 2:4) Winim wei for tingim samting bilong seleva, olketa marit partner wea wan mind long faith bae luk long Word bilong God olsem only paoa wea savve stretem problem bilong tufala. (2 Timothy 3:16, 17) Long disfala wei olketa followim kaonsel bilong Bible for olketa Christian mas “garem wan mind.”—1 Corinthians 1:10; 2 Corinthians 13:11; Philippians 4:2.

Feeling for Laekem and Semsem

For tok stret, moa samting stap insaed wei for fren winim wei for garem sem faith. Feeling for laekem samwan hem wanfala part tu. (Song of Solomon 3:5; 4:7, 9; 5:10) Bat for wanfala marit stand strong, wei for garem sem feeling hem important. Disfala buk Are You the One for Me? hem sei “hasband and waef wea garem sem feeling garem moa chance for garem wei for fren wea hapi, wan mind and stap for olowe.”

Sorre tumas, man wea laekem woman maet no tingting gud raonem wei wea tufala barava difren gogo bihaen tufala marit. For markem, tingim sapos iu baem wanfala haos bikos hem luk naes long iu. Bat, bihaen iu muv insaed iu faendemaot hao faondeson bilong hem nating strong. From faondeson hem nating strong, evri nara samting wea mekem haos hia luk naes hem iusles. Long sem wei, maet wanfala laekem samwan wea garem difren faith wea luk olsem tufala barava fit—bat bihaen marit disfala wei for fren maet garem planti bigfala problem.

Tingim samfala hardfala kwestin wea maet kamap insaed olketa marit wea garem difren religion: Long wea nao bae famili worship? Wanem kaen training long religion nao bae pikinini kasem? Which faith nao bae famili saportim saed long selen? Waswe, bae wanfala partner forcem famili for tekpart long olketa kastom and holiday bilong religion wea nara partner tingim hem heathen? (Isaiah 52:11) Insaed evri marit hasband and waef need for mekem olketa change wea fitim; bat, for lusim Bible principle—nomata for keepim marit—God nating acceptim.—Markem Deuteronomy 7:3, 4; Nehemiah 13:26, 27.

For keepim peace insaed marit, samfala hasband and waef wea insaed marit wea divaed long religion, go ahed for followim religion bilong olketa seleva. Bat, sorre tumas, wei wea hasband and waef no worship tugeta savve mekem marit garem spiritual hol. Wanfala Christian woman wea maritim man wea garem difren faith sei: “Nomata mifala marit for 40 year, hasband bilong mi nating savve gud long mi.” Long narasaed, God hem main part bilong marit wea hasband and waef worship “witim spirit and truth.” Olsem Bible talem, “wanfala rope wea garem thrifala string no savve brek kwiktaem long tufala haf.”—John 4:23, 24; Ecclesiastes 4:12.

Waswe Long Pikinini?

Samfala wea tingting for maritim samwan long difren religion maet tingse olketa savve minim long pikinini tufala difren faith wea stap and letem pikinini for chus. Hem tru, dadi and mami evriwan garem paoa saed long law and fasin for givim training bilong religion, and, pikinini nao mas disaedem samting seleva.a

Bible teachim pikinini for obeyim dadi and mami “insaed long Lord.” (Ephesians 6:1) Proverbs 6:20 sei olsem: “Obeyim, O son bilong mi, komandment bilong dadi bilong iu, and no lusim law bilong mami bilong iu.” Winim wei for lukim planti difren teaching, pikinini wea kasem teaching from dadi and mami wea garem sem biliv garem wan mind olsem Bible kolem “wanfala Lord, wanfala faith, wanfala baptism.”—Ephesians 4:5; Deuteronomy 11:19.

Barava “Insaed Long Lord”

Sapos wei for garem sem feeling hem key for garem marit wea win, waswe, bae hem stret for maritim eniwan nomoa wea sei hem wanfala Christian? Bible ansa olsem: “Man wea sei hem stap witim [Jesus] garem obligation tu for go ahed for wakabaot olsem hao dat wan hem wakabaot.” (1 John 2:6) So, wanfala Christian wea tingting for marit mas lukaotem partner wea barava waka hard for followim Jesus. Wanfala partner olsem hem dedicate finis long God and baptaes. Bae hem followim loving fasin bilong Jesus and wei wea hem strong for preach abaotem Kingdom bilong God. Olsem Jesus duim, bae main part long laef bilong hem nao for duim will bilong God.—Matthew 6:33; 16:24; Luke 8:1; John 18:37.

Long wei for patient and weitim wanfala partner wea fit midolwan olketa worshiper bilong God, olketa wea tingting for marit markem wei for putim will bilong God firstaem insaed laef bilong olketa. Diskaen wei bae gogo mekem marit laef hem hapi and satisfae.—Ecclesiastes 7:8; Isaiah 48:17, 18.

[Footnote]

[Piksa long page 26]

Help for Olketa Famili wea Divaed Long Religion

From samfala difren reason planti hasband and waef distaem divaed long religion. Samfala maet chusim partner wea garem difren religion. Bat planti hasband and waef firstaem garem sem faith and bihaen divaed long religion taem wanfala go long nara religion. Maet olketa narafala reason stap wea mekem famili divaed long religion. Bat, nomata wanem nao kosim, olketa promis bilong marit no samting for ting smol long hem or tokdaonem bikos hasband and waef no wan mind long religion. Bible tinghae long wei wea marit hem holy and mas stap for olowe, nomata tufala no wan mind long worship. (1 Peter 3:1, 2) Aposol Paul raet: “Sapos eni brata garem waef wea no biliv, bat waef hia agree for stap witim hem, hem mas no lusim hem.” (1 Corinthians 7:12) For followim olketa principle wea stap insaed Bible diswan savve helpem eni hasband and waef for garem peace insaed wanfala marit wea garem love and respect.—Ephesians 5:28-33; Colossians 3:12-14; Titus 2:4, 5; 1 Peter 3:7-9.