Giraffe—Tol, Long Leg, and Luk Naes

FROM MAN WEA RAET FOR WEKAP! LONG KENYA

OLKETA big gray granite rok feel wet and cold taem hem just daylaet. Mifala haed midolwan long olketa big rok hia witim hot kap tea long hand and lukluk stret go long grass area long daon.a Wei wea mifala patient kasem reward. Taem daylaet no big yet, samfala giraffe—tol, long leg, and luk naes—wakabaot isisi akrosim datfala level ples. Hem luk olsem olketa wakabaot slow witim long leg bilong olketa, and long nek bilong olketa muv isisi olsem mast long sailing ship taem wind blowim. Mifala no savve tek-wind nao. Samting mifala lukim hem naes tumas!

From olketa fraet long mifala, evriwan tan go semtaem long samfala acacia tree and pushim hed go kasem olketa haefala branch antap wea garem nila. Long careful wei, olketa giant hia wea hapi nomoa iusim longfala tongue bilong olketa for pullimaot olketa smol green leaf. Long there, olketa pushim hed bilong olketa midolwan samfala nest bilong olketa weaverbird and lukluk for kaikai. Olketa bird singaot witim kros long olketa stranger hia wea garem long nek. From olketa seke long noise hia, olketa giraffe muv kwaet and isisi go long olketa nara tree.

Muv Fast and Luk Naes

Eniwan wea lukim finis olketa animal hia long zoo maet faendem hard for luksavve wei wea olketa luk naes taem olketa ran free long bush bilong Africa. Hao olketa giraffe muv hem luk naes and smooth. Taem olketa ran long open grass area, lukluk bilong olketa wea soft, wea olsem isi for garekil, mekem luk olsem eni smol samting nomoa savve mekem olketa foldaon. Long narasaed, wanfala big man giraffe, wea hevi bilong hem 1,300 kilogram, hem hard for foldaon and savve ran fast kasem klosap 60 kilometer.

Disfala spesol animal stap long Africa nomoa. Hem naes for lukim fasin bilong hem wea no raf and kwaet. Iumi savve sei feis bilong giraffe hem spesol and luk naes tu, wea garem tufala long ear and tufala smol horn wea garem soft blak hair antap. Tufala eye bilong hem big fogud and dark color, and olketa longfala eyelash nao protectim. Taem giraffe lukluk farawe from hae ples bilong hem, lukluk long feis bilong hem olsem hem no savve eniting and laek for faendaot.

Long bifor, pipol tinghae long naesfala lukluk bilong giraffe and fasin bilong hem for shame, kwaet, and no raf. Pipol savve givim young giraffe olsem present long olketa ruler and king for piksarem peace and gudwill midolwan long olketa kantri. Distaem, iu savve lukim yet samfala old painting bilong olketa giraffe long olketa rok ples bilong Africa.

Tol Taem Hem Standap

Giraffe nao tol winim evri nara animal. Start long botom long leg kasem horn, man giraffe savve tol kasem winim faev and haf meter. Long Egyptian raeting bifor, giraffe stand for toktok olsem “for talem firstaem” or “for talem profesi,” wea minim wei wea hem tol fogud and savve luk farawe.

Taem hem standap midolwan long olketa grup zebra, ostrich, impala, and olketa nara animal bilong Africa, giraffe olsem wanfala taoa for man for lukaot. Wei wea hem tol and garem sharp eye mekem hem fit for luk farawe and luksavve eni danger wea maet kamap. From diswan, nara animal feel sef taem hem stap midolwan long olketa.

Spesol Design

Design bilong body bilong giraffe hem barava spesol wea mekem hem fit for lukluk insaed olketa hae branch bilong tol tree, wea elephant nomoa mek-tu animal wea savve kasem. Spesol design bilong top lip and tongue wea isi for bend mekem hem fit for pullimaot isi olketa leaf from branch wea garem nila.

Giraffe savve kaikaim samting olsem 34 kilogram leaf insaed wan day. Nomata hem savve kaikaim planti difren kaen leaf, hem savve laekem acacia tree wea garem nila wea fulap long olketa level ples long Africa. Man giraffe savve aotem tongue bilong hem kasem 42 centimeter for lukaotem kaikai. Nek bilong hem savve bend fogud. Diswan mekem giraffe fit for tanem and bendim longfala hed bilong hem taem hem isisi lukluk midolwan long olketa hae branch bilong tree.

Hem isi for giraffe kasem hae samting, bat no for drinkim wata. Taem hem kasem wata, hem mas isisi waedem tufala front leg and then bendim tufala knee mekem hem fit for kasem wata. Taem hem standap olsem, giraffe mekem nek bilong hem barava long bifor hem savve drink. Gud samting nao, hem no need for drink planti taem, from hem kasem inaf wata from olketa leaf wea hem kaikaim wea fulap witim wata.

Nek and saed body bilong giraffe hem garem piksa bilong olketa white laen wea no waed and luk naes tumas wea olsem olketa leaf wea join tugeta. Color bilong skin bilong hem savve olsem brown, dark brown, and blak tu. Taem giraffe gogo for olo, olketa color bilong hem kamap dark.

Famili Laef

Olketa giraffe savve laek stap tugeta, and wakabaot free insaed grup wea garem 2 go kasem 50 giraffe. Mere giraffe wea babule savve karem baby for samting olsem 420 go kasem 468 day bifor hem bornem baby wea tu-meter tol. Taem baby giraffe born, hem foldaon winim tu meter go kasem graon, wea hed nao go firstaem! Bat insaed 15 minute, disfala baby, wea no garekil, hem isisi standap and redy for susu. Bihaen tu or thri week, disfala baby start for kaikaim olketa soft part bilong acacia branch and no longtaem bihaen, hem strong fitim for wakabaot witim mami.

Baby giraffe hem barava luk olsem dadi and mami bilong hem. Nomata disfala baby no tol olsem full-grown wan, hem moa tol winim planti man. Hem naes tumas for lukim baby giraffe standap and no fraet andanit long tol mami bilong hem.

Long taem for bornem baby, olketa giraffe savve hipimap evri baby giraffe long olketa grup, wea long full day olketa rest, plei, and lukluk long wanem nao go ahed raonem olketa. Baby giraffe wea just born savve grow kwiktaem tumas. Insaed six month hem savve grow wanfala meter moa tol, and dabolem disfala namba insaed wan year. Insaed wan week nomoa, baby giraffe savve grow 23 centimeter! Mami giraffe savve barava protectim gud baby bilong hem, and nomata hem letem baby for wakabaot farawe lelebet, sharp eye bilong hem lukluk evritaem long baby bilong hem.

From giraffe hem tol fogud, savve muv fast, and garem sharp eye, enemy bilong hem long bush hem lion nomoa witim nara tu-thri animal. Bat, man nao wan wea go hunting and killim dae staka long disfala animal wea luk naes. From olketa barava laekem skin bilong hem, meat bilong hem wea teist naes, and longfala, blak hair bilong tail bilong hem—wea samfala sei hem garem secret paoa—distaem animal hia no garem sure future. Nomata giraffe hem staka tumas bifor long planti part long Africa, distaem hem stap sef nomoa insaed long olketa spesol area for animal wea olketa protectim.

Tuday pipol wea visitim Africa savve hapi for lukim yet olketa giraffe, wea garem long nek, ran free long olketa level grass area. Long there iu savve lukim olketa lukluk insaed olketa hae acacia tree wea garem nila or standap nomoa and lukluk farawe olsem olketa duim evritaem. Disfala nambawan animal, wea garem spesol sheip and fasin wea no raf, hem wanfala barava spesol design—nara samting wea pruvim bigfala savve and spesol fasin bilong olmaeti God, Jehovah.—Psalm 104:24.

[Footnote]

[Box/Picture on page 12]

BARAVA SPESOL LONG NEK

Maet samfala tingse sheip bilong body bilong giraffe and wei wea hem tol fogud shud kosim samfala problem. From giraffe hem tol tumas and garem long nek, maet hem luk hard for kontrolem haomas blood nao kasem olketa difren part bilong body bilong hem. Olsem example, taem giraffe daonem hed feisim graon, pull bilong gravity shud mekem blood kwiktaem go long hed, and fulimap brain. Taem giraffe apim hed, blood shud kwiktaem go daon kasem heart, wea mekem hem haf dead. Bat, diswan no happen. Why?

System bilong blood insaed long giraffe hem wanfala barava spesol design, wea barava fitim spesol sheip and size bilong body bilong animal hia. Heart seleva hem big fogud and mas pump strong for sendem blood go ap long brain, wea stap thri and haf meter antap. Hem pump kasem 170 taem insaed wan minute, and wall bilong heart wea 17 centimeter waed hem mekem blood pressure wea klosap thri taem winim bilong man. For deal witim disfala pressure long wei wea sef, carotid artery, wea karem blood go long brain, and jugular vein, wea karem blood kam bak long heart, need for big. Olketa blood vessel hia tu and haf centimeter waed and garem olketa elastic tissue for strongim olketa, wea mekem olketa vessel hia isi for change sheip and strong.

Taem giraffe daonem hed, olketa valve insaed jugular vein stopem blood for go bak kwiktaem long brain. Long botom part bilong brain, datfala big carotid artery join witim nara samting wea garem spesol design wea olketa kolem extra spesol net. Long hia blood wea ran big go long brain taem giraffe daonem hed hem slow daon taem hem go insaed spesol net bilong olketa smol blood vessel wea kontrolem blood pressure and protectim brain from blood wea ran strong. Disfala spesol net kamap big taem giraffe daonem hed and hem kamap smol taem hem apim hed, wea balancem blood pressure wea barava katdaon and danger for animal haf dead.

Nek bilong giraffe hem spesol design tu. Olketa scientist sapraes for faendaot hao barava long nek bilong giraffe garem sem namba long olketa bon insaed backbone olsem bilong rat or olketa nara animal wea savve susum pikinini bilong olketa! Bat, no olsem olketa nara animal hia, giraffe garem olketa longfala bon long backbone wea each wan join tugeta witim ball and socket, wea mekem hem isi tumas for bend. So, giraffe savve bendim nek bilong hem for klinim evri nara part long body or for kasem olketa hae branch bilong wanfala tree for kaikai.