“Samfala Taem Mi Tingse Mi Dream Nomoa!”
Lourdes putim hand long mouth bilong hem wea seksek and lukluk long taon thru long window bilong hem. Hem woman from Latin-America wea safa from raf fasin bilong hasband bilong hem, Alfredo, for winim 20 year. Samting muvim Alfredo for change. Nomata olsem, hem still hard for Lourdes story abaotem datfala pain saed long body and feeling wea hem deal witim.
Lourdes hem sei long kwaet voice: “Diswan hem start tufala week nomoa bihaen mitufala marit. Wantaem, hem brekem tufala teeth bilong mi. Narataem mi kwiktaem muv and hand bilong hem smasem wanfala cupboard. Bat samting wea barava givim bigfala pain hem samting hem talem. Hem kolem mi ‘iusles rabis’ and deal witim mi olsem mi no garem eni savve. Mi want for lusim hem, bat hao nao mi savve go from mi garem thrifala pikinini?”
Alfredo tasim shoulder bilong Lourdes long kaenfala wei. Hem sei: “Mi garem hae position long waka bilong mi. Mi feel shame tumas taem mi kasem wanfala kot order. Mi trae for change, bat no longtaem bihaen mi duim sem samting moa.”
Hao nao samting hia change? Lourdes, wea start for luk relax explainim: “Woman wea ownim stoa long kona hem wanfala Jehovah’s Witness. Hem offer for helpem mi minim Bible. Mi lanem hao Jehovah God tinghae long olketa woman. Mi start for attendim olketa meeting bilong Olketa Jehovah’s Witness, nomata firstaem diswan mekem Alfredo kros fogud. Hem niu samting for mi stap witim olketa fren long Kingdom Hall. Mi sapraes for faendaot mi fit for garem biliv bilong mi, mi free for storyim olketa, and teachim long nara pipol tu. Mi luksavve God tinghae long mi. Diswan strongim mi.
“Wanfala bigfala change kamap wea mi bae nating forgetim. Alfredo hem go ahed for attendim Catholic Church evri Sunday, and hem komplen abaotem wei wea mi kaban witim Olketa Jehovah Witness. Mi luk stret long eye bilong hem and long kwaet wei wea no fraet mi sei: ‘Alfredo, tingting bilong iu, hem no tingting bilong mi.’ And hem no hitim mi! No longtaem bihaen, mi baptaes, and hem nating hitim mi moa insaed faevfala year wea go pas.”
Bat olketa change wea moa big kamap bihaen. Alfredo explainim diswan: “Samting olsem thrifala year bihaen Lourdes hem baptaes, wanfala wakfren bilong mi wea hem wanfala Jehovah’s Witness invaetem mi long haos bilong hem, and hem explainim olketa barava interesting samting from Bible. Mi no talem waef bilong mi, bat mi start for studyim Bible witim hem. No longtaem bihaen mi go witim Lourdes long olketa meeting. Planti long olketa tok wea mi herem storyim famili laef, and diswan mekem mi feel shame.”
Alfredo sapraes for lukim olketa member bilong kongregeson, olketa man tu, swipim floor bihaen long meeting. Taem hem go long haos bilong olketa, hem lukim olketa hasband helpem waef wasim pleit. Olketa smol samting hia showim Alfredo wanem kaen samting showimaot trufala love.
No longtaem bihaen, Alfredo hem baptaes, and distaem hem and waef bilong hem serve full-taem olsem olketa minister. Lourdes hem sei: “Planti taem hem helpem mi klinim tebol bihaen kaikai and stretem olketa bed. Hem praisem mi for kaikai wea mi kukim, and hem letem mi chusim samting—olsem wanem music mi laek for lisin long hem or wanem samting mifala savve peim for haos. Hem olketa samting wea Alfredo bae nating letem mi duim bifor! No longtaem go nomoa, hem firstaem for hem peim samfala flaoa for mi. Samfala taem mi tingse mi dream nomoa!”
[Piksa long page 10]
“Mi luksavve God hem tinghae long mi. Diswan strongim mi”
[Piksa long page 10]
Alfredo sapraes for lukim olketa member bilong kongregeson, olketa man tu, swipim floor bihaen long meeting
[Piksa long page 10]
Hem lukim olketa hasband helpem waef for wasim pleit
[Piksa long page 10]
“No longtaem go nomoa, hem firstaem for hem peim samfala flaoa for mi”