Snow Leopard​—Meetim Spesol Animal Hia

FROM MAN WEA RAET FOR WEKAP! LONG FINLAND

SNOW LEOPARD hem wanfala spesol animal wea hard for man minim. Tu-thri pipol nomoa bin lukim hem long ples bilong hem, and man no garem staka savve abaotem hem.

Disfala snow leopard hem main animal pipol interest tumas for lukim long Helsinki Zoo, long Finland. Fasin bilong disfala animal, wea hem wankaen puskat—wea staka pipol ting hem luk naes winim evri narawan—nao mekem hem barava interesting.

Puskat Antap Long World

Nomata hem stap long winim twelvfala kantri, from Bhutan go kasem Russia, pipol staka taem tingim olketa snow leopard stap long olketa maunten bilong Himalayas nomoa. Olketa maunten hia—wea no eni nara maunten long world hae winim—barava luk naes. Bat hem no ples wea fitim olketa man. Tru nao, no eni nara ples long world hem moa cold or hae winim olketa maunten hia bilong Central Asia.

Nomata olsem, disfala snow leopard hem hapi for stap long ples wea 3,000 go kasem 4,500 meter hae. Thick wool bilong hem protectim hem from cold, and olketa bigfala hol bilong nose bilong hem mekem hem fit for kasem oxygen wea hem needim from maunten air hem short long oxygen. Olketa waed finger bilong snow leopard mekem hem muv isi thru long deep snow. Bat waswe long olketa haefala maunten? Diswan hem no problem bikos longfala tail bilong hem kontrolem gogo bilong hem, wea mekem hem savve jamp samting olsem 15 meter from wansaed bilong steep ples go long narasaed, diswan winim jamp bilong gray kangaroo.

Hevi bilong snow leopard hem midolwan 27 and 45 kilogram and hem 60 centimeter tol and 2 meter long from nose kasem tail. Bat samting wea mekem snow leopard hem barava spesol nao hem fasin bilong hem. Man wea boss long Helsinki Zoo, Leif Blomqvist, hem sei: “Hem garem barava kwaet fasin. Disfala snow leopard savve isi for fren witim olketa man, and long morning long zoo, hem savve kam for greetim wan wea lukaftarem hem.” Blomqvist talem tu hao olketa lukim disfala kwaet fasin long olketa baby tu. “Olketa no laek ranawe taem olketa wakman bilong zoo weim and nilam olketa,” hem sei. Bat waswe long olketa narakaen leopard wea sem age? “For duim diswan bae barava hard,” Blomqvist hem talem. “Iu needim kaleko for protectim iu and glove, from olketa faet bak and barava raf.”

Why Nao Man No Lukim Tumas?

For plei kaskas witim wanfala snow leopard bae hard tumas from disfala white and gray puskat hem olsem kala bilong maunten nomoa. Disfala gud wei for haedem hemseleva hem wanfala reason why olketa lukim tu-thri snow leopard nomoa long ples bilong hem. Samfala wea duim research gogo long olketa raf maunten for studyim disfala spesol puskat bat nating lelebet lukim!

Wei wea snow leopard laek stap seleva mekem hem moa hard for man savve lukim. Witim diswan, territory olketa gogo long hem big tumas from kaikai bilong olketa hem olketa wild sheep or goat wea no staka tumas long olketa maunten. Sorre tumas, pipol for hunt—wea greedy for kasem thick wool bilong snow leopard—garem blame tu for wei wea namba bilong olketa hem gogo daon, and distaem snow leopard hem wanfala long olketa animal wea gogo for finis evribit.a Olketa zoo duim staka samting for protectim disfala spesol animal.

Snow Leopard Long Helsinki

Helsinki Zoo bin win saed long wei for mekem grow namba bilong olketa snow leopard. Long 1976, disfala zoo kasem waka for keepim record bilong olketa snow leopard. Disfala record hem bigfala help long wei for lukaftarem olketa snow leopard wea olketa keepim.

Semkaen record buk stap for staka difren kaen animal long zoo, especially olketa animal wea gogo for finis evribit. Wanfala record buk hem garem evri information abaotem wanfala kaen animal. Olketa zoo garem responsibility for talem man wea raetem disfala record buk abaotem olketa baby wea born, sapos eniwan go aot or olketa tekem kam, and sapos eni animal hem dae. Olketa iusim record buk hia for chusim wanem tufala animal long zoo nao for garem pikinini. “From olketa animal olsem no staka, hem isi for olketa bilong sem mami and dadi nomoa garem pikinini wea gogo mekem olketa kamap nogud,” Blomqvist hem explainim.

Winim wan handred baby born long Helsinki Zoo seleva, and olketa sendem staka long olketa go long olketa zoo long olketa difren kantri. For mekem olketa mix gud, olketa zoo savve exchangem samfala snow leopard bilong olketa. Olketa garem staka difren kaen snow leopard distaem so olketa no need for kasem samfala moa from olketa maunten.

Staka zoo, insaed diswan hem zoo long Helsinki, help for lukaftarem and sevem olketa animal taem olketa trae for protectim blood laen bilong olketa. And olsem iumi evriwan savve, olketa givim pipol wea visitim zoo chance for enjoyim wei for lukluk long olketa animal. Tru nao, snow leopard hem samting wea man hard for forgetim and hem mekem Creator kasem honor, wea wakem “evri samting hem mekem luk naes.”—Ecclesiastes 3:11.

[Footnote]

[Credit Line long page 29]

Page 28: Midol: ©Aaron Ferster, Photo Researchers; page 29: Raet saed antap: © Korkeasaaren Eläintarha/Markku Bussman; botom: ©T. Kitchin/V. Hurst, Photo Researchers

[Credit Line long page 30]

Chuck Dresner/Saint Louis Zoo