Lukluk Long World
Danger for Pipol wea No Smoke
“Sapos man wea no smoke hem brithim cigarette smoke bilong nara man for 30 minute, diswan savve spoelem heart bilong hem,” hem nao samting wea Globe and Mail niuspepa talem long wanfala report abaotem wanfala survey wea olketa duim no longtaem go nomoa long Japan. Olketa wea duim research long Osaka City University iusim niu kaen technology for barava measurem hao smoke hem affectim olketa endothelial cell wea stap raonem heart and blood vessel bilong pipol wea no smoke. Taem olketa cell hia healthy, olketa mekem blood for ran gud long body long wei for stopem dirty for hipap long olketa wall bilong blood vessel and stopem blood for hipap tugeta. Olketa wea duim research faendem hao wei wea blood ran insaed heart bilong pipol wea no smoke “hem samting olsem 20 percent moabeta winim pipol wea smoke. Bat bihaen olketa brithim smoke for 30 minute nomoa,” wei wea blood bilong olketa ran hem semsem olsem pipol wea smoke. Man wea duim research, Dr. Ryo Otsuka sei, “diswan showimaot kliafala pruv hao diswan affectim heart bilong pipol wea no smoke long nogud wei.”
Olketa Rat and Man Resis for Kaikai
Australian Commonwealth Scientific and Industrial Research Organization (CSIRO) sei evriwea long world, taem wanfala baby born, tenfala rat born tu. Evriday, samting olsem 360,000 niu baby mas kasem kaikai, bat 3,600,000 baby rat tu mas kasem kaikai. Olsem example, Indonesia garem population bilong 230 million pipol, and samting olsem 60 percent long olketa depend long rice evriday for kasem strong. Nomata olsem, long datfala kantri, olketa rat kaikaim samting olsem 15 percent bilong rice harvest each year. “Datwan minim olketa rat kaikaim rice wea fit for feedim winim 20 million pipol long Indonesia for wanfala full year,” hem nao samting wea CSIRO scientist Dr. Grant Singleton hem talem.
Kokorako Supsup—Natural Medicine for Flu
For longtaem nao kokorako supsup hem kastom medicine for olketa sik olsem kof. Insaed buk Food—Your Miracle Medicine, Dr. Irwin Ziment, spesol doctor bilong lung long University of California long Los Angeles, explainim hao diswan hem waka: “Kokorako, wea semsem olsem staka kaikai wea garem protein, hem garem wanfala natural amino acid wea nem bilong hem cysteine, wea kamaot taem man wakem supsup. Cysteine garem spesol chemical wea barava klosap semsem olsem medicine wea garem nem acetylcysteine, wea doctor savve givim long patient wea garem brochitis and infection long lung.” Disfala medicine, wea bifor olketa tekem from feather and skin bilong kokorako, hem wanfala mucolytic, wea minim hem mekem nguru from nose, throat, and lung moa isi for kamaot. Kokorako supsup hem duim sem samting. For mekem datfala supsup hem barava waka gud, Dr. Ziment sei for putim garlic, onion, and hot spice olsem chili pepper insaed.
“Kastom Magic” Hem Kikbak
Reuters nius service hem sei: “Wanfala man from Ghana hem sutim nara man from sem vilij taem hem testim wanfala kastom magic wea for mekem bullet no kasem hem.” Samfala vilij pipol long northeast Ghana askem wanfala witch doctor for mekem kastom magic long olketa mekem bullet no savve kasem olketa. “Bihaen witch doctor hia rabem body bilong datfala man witim enikaen leaf evriday for tufala week,” report hia sei datfala man wea dae “volunteer for olketa sutim hem for chekim sapos datfala kastom magic hem waka.” Man hia dae stretawe from wanfala bullet bilong rifle. Bihaen, olketa neiba wea kros kasholem datfala witch doctor and killim hem nogud bikos kastom magic bilong hem fail. Taem olketa laekem protection from olketa difren tribe wea olketa faet witim, pipol long barava north part bilong Ghana planti taem go lukim olketa witch doctor.