“Perfect Laet”

SAPOS iu tasim electric laet bulb wea hem bin laet for lelebet taem, iu savve hao hem savve kamap barava hot. Hot wea datfala bulb mekem hem kamaot from energy wea hem no iusim. Wanfala laet bulb savve givim aot samting olsem 10 percent long energy for laet, and nara 90 percent olsem hot wea hem weistem nomoa. Disfala sismol insect wea olketa kolem fire-fly, wea savve mekem laet (lukim antap, mifala mekem moa big), hem moabeta for givim aot laet from hem savve iusim samting olsem 100 percent bilong energy bilong hem for datwan.

Olketa fire-fly westem smolfala energy olsem hot from laet wea olketa mekem, dastawe olketa kolem “perfect laet.” Hao nao olketa duim olsem? Insaed bele bilong wanfala fire-fly garem luciferin. Taem oxygen go insaed long bele thru long wanfala tube wea olketa kolem abdominal trachea, oxygen mix witim luciferin, and datwan nao mekem datfala yellow and red-green laet.

Olketa cell wea mekem laet bilong fire-fly garem tu uric-acid crystals, wea help for shaenim laet awe from bele bilong datfala insect. Olketa scientist sei olketa fire-fly iusim laet bilong olketa for switim partner and tu olketa difren kaen fire-fly showimaot difren kaen pattern bilong laet and wei for mumuv.

Bae iu barava agree hao wei wea Jehovah God creatim olketa sismol creature hia givim praise long hem! Tru nao, olsem man wea raetem psalm talemaot, “evri samting wea laef—letem hem praisem Jah.”—Psalm 150:6.

[Credit Line long page 31]

© Darwin Dale/Photo Researchers, Inc.