Busy Olsem Wanfala Carniolan Bee

From man wea raet for Wekap! long Slovenia

EVRIWAN savve hao olketa bee waka hard tumas. Bat wankaen bee hem winim evri narawan saed long diswan—hem nao Carniolan bee.a Disfala honeybee hem nem followim distrik bilong Carniola, wea distaem stap long west Slovenia. Bifor, only ples wea disfala bee hem stap hem long Balkan Peninsula and long north hem kasem olketa Carpathian Maunten. Bat distaem, from olketa man wea keepim bee laekem hem tumas, pipol evriwea long world savve long Carniolan bee and hem stap long staka difren ples.

Why nao pipol laekem tumas disfala Carniolan bee? Witim wei wea Carniolan bee savve wakem staka nambawan honey and cold weather and sik no affectim hem tumas, hem kwaet and hem no garem fasin for faet. Nomata hem wei bilong olketa for flae olsem wanfala grup—wea savve mekem moa hard for keepim staka—olketa savve daonem disfala fasin long wei for chusim olketa bee wea olketa laek keepim for bornem olketa nara bee. Bat why nao pipol ting long Carniolan bee olsem bee wea moa busy winim olketa narakaen bee? Wanfala reason hem bikos olketa go aot from haos bilong olketa moa early long morning winim olketa nara bee. So, olketa garem moa taem for kolektem swit wata from olketa plant for wakem honey, and olketa savve tekem kam datwan from farawe.

“Pipol for Keepim Bee”

History bilong wei for keepim olketa bee long Slovenia hem start longtaem bifor kam and hem barava interesting. Wanfala scientist from Slovenia, Janez Gregori, kolem olketa wantok bilong hem “pipol for keepim bee.” Tru nao, pipol bilong Slovenia savve tumas hao for keepim olketa bee nomata long mek-eit century C.E. From datfala taem kam kasem mek-19 century, olketa keepim olketa bee insaed hol bilong olketa tree. Long samfala part bilong Slovenia, olketa kolem olketa hol hia korita, wea minim container. Bat long mek-15 century, taem olketa wakem sawmill, olketa changem olketa container hia wea olketa wakem from tree wea garem hol witim olketa haos bilong bee wea olketa wakem from olketa pis timba wea olketa katem. From sheip bilong olketa, olketa mekfani and kolem olketa truge, wea minim coffin box.

From staka pipol laekem honey and wax bilong bee, wei for keepim olketa bee hem kamap important bisnis saed long selen and diswan mekem gavman interest tumas. From diswan olketa givim samfala man nomoa right for keepim olketa bee. Iumi savve minim why nao gavman interest long diswan from olketa needim wax bilong bee for wakem olketa kandol, especially for olketa church and monastery, and from honey nao only swit kaikai wea olketa garem long datfala taem. Long mek-16 century, bihaen olketa farmer start for growim buckwheat, wea kamap kaikai for olketa bee long autumn season, olketa wakem staka moa honey winim bifor. No longtaem bihaen, Carniola hem sellim staka honey and wax bilong bee long olketa nara kantri. Valvasor, savveman from Carniola long mek-17 century talem hao kasem midol long mek-17 century, Carniola sellim “planti thousand quintal” bilong honey evri year long Salzburg, Austria.b

Staka Moa Pipol Savve Long Carniolan Bee

Insaed olketa year wea go pas, Carniola sharem staka important savve abaotem wei for keepim olketa bee and hao for duim diswan. Start long 1770, Empress Maria Theresa markem Anton Janša, man from Upper Carniola for kamap first teacher saed long wei for keepim olketa bee long skul for diswan long Vienna, Austria. Kasem end bilong mek-19 century, olketa man wea duim research long olketa bee luksavve hao strongfala Carniolan bee fitim wanem olketa man wea keepim bee long planti ples olketa needim. Long datfala taem tu Carniolan bee kasem nem bilong hem and start for kasem planti ples raonem world. Start long mek-20 century, namba bilong olketa haos bilong bee wea Carniola sellim long olketa nara kantri hem savve “fulimap olketa carriage bilong train,” and each haos garem wanfala famili bilong olketa Carniolan bee.

Long datfala taem, haos bilong bee wea olketa wakem from olketa pis timba kasem datfala nem kranjič, wea minim “haos bilong olketa Carniolan bee.” Wanfala interesting samting abaotem datfala kranjič hem spesol wei wea olketa paintim olketa box hia bifor. (Lukim datfala box “Painting Long Olketa Haos Bilong Bee,” long page 24.) Distaem long Slovenia winim 7,000 man keepim olketa bee and lukaftarem winim 160,000 haos bilong bee. Long taon bilong Radovljica, wanfala spesol museum stap wea showim history bilong wei for keepim olketa bee long Slovenia.

Saen wea Showaot Evriwea

From bifor kam pipol bilong Slovenia ting long bee olsem saen bilong wei for waka hard and gudfala wisdom. Long 1693, firstfala organization saed long science hem kamap long Slovenia and olketa kolem Society of the Industrious (Society Bilong Olketa wea Waka Hard), and bee nao saen wea stand for olketa. Olketa member kolem olketa seleva apes, wea long Latin languis hem minim “olketa bee.” From pipol bilong Slovenia ting long bee olsem samting wea piksarem wei for no westem eni samting, bee hem kamap saen tu saed long selen. Iu savve lukim piksa bilong bee long kava bilong olketa passbuk and long baksaed bilong samfala coin bilong Slovenia.

Pipol bilong Slovenia laekem olketa bee tumas bikos olketa tu pipol wea waka hard. Olketa garem wanfala toktok wea sei, “Lukluk long olketa bee, and followim example bilong olketa.” So enitaem iu lukim olketa bee wea busy or iu teistim honey—swit samting wea kamaot from hard waka bilong olketa—maet iu tingim olketa Carniolan bee wea waka hard tumas.

[Olketa Footnote]

[Piksa long page 24]

Painting Long Olketa Haos Bilong Bee

Long ples wea olketa keepim bee long Slovenia, haos bilong olketa bee stap tugeta olsem olketa smol box insaed wanfala big box and olketa short saed feisim front. Savve wea pipol garem for paintim piksa long front timba bilong haos bilong olketa bee hem kamap big tumas start long mek-18 century go kasem mek-20 century. Nomata samting olsem 3,000 example bilong olketa spesol painting hia stap yet, hem smol namba nomoa bilong full namba bilong olketa haos bilong bee wea pipol buildim and paintim olsem.

Klosap evri piksa long olketa timba hia hem saed long religion, olsem “olketa saint” and samfala story from Bible. Bat insaed olketa piksa hia hem samfala tu wea showim olketa animal and waka wea pipol duim, and tu samfala fani samting. Samfala piksa showimaot samting saed long famili. Olsem example, samfala showim tufala demon wea iusim ston file for mekem tongue bilong woman wea tok laea for kamap moa sharp, and olketa nara painting showim wanfala waef wea pullim hasband bilong hem kam bak from wanfala ples for drink alcohol.

Pipol praisem olketa painting hia and sei olketa nao “rich samting saed long kastom bilong Slovenia,” olsem “wanfala old encyclopedia bilong wisdom bilong bifor,” and “art wea really bilong Slovenia.” Bat olketa painting hia garem purpose tu. From staka haos bilong bee stap long sem area, wanfala bee isi for mistek and go long rong haos, and sapos olsem, olketa nara bee bae killim hem dae. Olketa man wea keepim olketa bee tingse olketa painting hia wea kalakala, and wei wea each wan hem difren, savve helpem each bee for faendem haos bilong hemseleva.

[Olketa piksa]

“Adam and Eve”

“Taem Olketa Sellim Joseph Go Long Egypt”

“Jesus Arrive Long Jerusalem”

Olketa haos bilong olketa bee long Slovenia witim olketa piksa long front timba

[Credit Line]

All apiary photos: Z dovoljenjem upravitelja rojstne hiše pisatelja Josipa Jurčiča

[Piksa long page 21]

(Lukim pablikeson for olketa nara information)

AUSTRIA

ITALY

SLOVENIA

Carniola

CROATIA

ADRIATIC SEA

[Credit Line]

Map: Mountain High Maps® Copyright © 1997 Digital Wisdom, Inc.

[Piksa long page 22]

Coin bilong Slovenia wea showim piksa bilong Carniola bee wea planti pipol savve long hem

[Piksa long page 23]

Pipol savve hao Carniolan bee hem kwaet and no garem fasin for faet

[Piksa long page 23]

Olketa young bee

[Piksa long page 23]

Queen bee and olketa waka bee wea stap raonem hem

[Credit Line]

Foto: Janez Gregori