“Wanfala Taon Council Shud No Bossim Pipol”
FROM MAN WEA RAET FOR WEKAP! LONG CANADA
CANADIAN Charter of Rights and Freedoms hem protectim freedom bilong evri citizen bilong Canada. Constitution and olketa kot protectim freedom for toktok, pablisim samting, and worship.
Dastawe, taem datfala taon wea garem nem Blainville, wea hem wanfala community long northwest bilong Montreal, laek changem wanfala law for mekem olketa Witness mas kasem permit for visitim pipol long olketa haos for storyim Bible, Olketa Jehovah’s Witness interest long diswan nao. Datfala law bae barava affectim haos-tu-haos ministry bilong olketa. (Acts 20:20, 21) Bat why nao olketa laek changem datfala law? Olketa bigman bilong council talem hao staka pipol komplen abaotem wei wea Olketa Jehovah’s Witness visitim olketa. Bat, olketa record long police department showimaot hao insaed faevfala year wea go pas, no eniwan komplen abaotem waka bilong Olketa Jehovah’s Witness!
Nomata olsem, olketa mekem diswan kamap wanfala law long 1996. So, olketa lawyer for Olketa Jehovah’s Witness long Blainville talem datfala taon hao wei for trae stopem waka bilong Olketa Jehovah’s Witness hem againstim law bikos constitution bilong kantri givim evriwan freedom saed long religion. Olketa bigman bilong taon no lisin long datwan and olketa givim 17-fala fine long olketa Witness and kotem olketa. Olketa lawyer bilong olketa Witness go thru long kot for stopem wei wea Blainville hem laek for aotem freedom saed long religion and saed long right bilong pipol for story witim nara pipol—wea hem nao olketa right bilong evri citizen long Canada.
Diswan go long Quebec Superior Court and Honorable Justice Jean Crépeau nao deal witim disfala case long October 3 and 4, 2000. Bihaen hem lukluk long disfala case, judge givim disison for sapotim Olketa Jehovah’s Witness. Justice Crépeau talem hao olketa Witness followim example bilong firstfala Christian kongregeson long wei wea olketa visitim olketa haos long community for encouragem pipol for garem olketa hae standard saed long fasin and long spiritual saed. . . . For visitim haos bilong pipol hem wanfala waka for helpem community. Olketa Jehovah’s Witness visitim pipol long Blainville klosap evri fofala month and invaetem olketa for sharem olketa idea long olketa subject wea pipol interest long hem and wea helpem man.” Long judgment bilong hem, Justice Crépeau hem sei: “[Disfala Kot] laek talemaot hao olketa Jehovah’s Witness no need for kasem permit for duim ministry bilong olketa.”
Blainville appeal go long Quebec Court of Appeal for againstim disison bilong Justice Crépeau. Long June 17, 2003, kot hem lukluk long datfala appeal and long August 27, 2003, hem sapotim disison bilong firstfala judge. Taem datfala Kot storyim Canadian Charter of Rights and Freedoms, wea protectim freedom saed long religion and wea givim right for teachim and givimaot information saed long olketa biliv bilong religion, olketa givim go disison wea sei: “Datfala niu law barava stopem freedom bilong tingting, biliv, and right for talemaot tingting wea pipol long Blainville garem. . . Olketa pruv showimaot hao no eniwan long Blainville komplen abaotem waka bilong Olketa Jehovah’s Witness bat olketa komplen abaotem wei wea staka nara pipol kam long haos wea garem barava nogud fasin and wea trae forcem olketa for baem samting. No eni barava need stap for kontrolem wei wea pipol laek visitim narawan for story saed long religion. And nara samting, wanem olketa duim hem no barava stret, olketa hariap for duim datwan nomata olketa no story gud raonem datwan firstaem, hem no followim gudfala tingting and hem ova tumas saed long goal bilong olketa for protectim living bilong pipol long there. . . . Long wanfala community wea free and wea democratic, taon council shud no kamap boss long wei for disaed hu nao olketa pipol fit for letem kam long haos bilong olketa long evening or long weekend. Datfala first judge hem stret taem hem disaedem hao datfala niu law no savve stopem waka bilong Olketa Jehovah’s Witness.”
Olketa Jehovah’s Witness hapi hao olketa kot long Quebec followim datfala Charter of Rights long disfala case for stopem kaen wei olsem for daonem pipol wea no fitim wea savve spoelem freedom saed long religion for evri citizen long Quebec.
[Piksa long page 10]
(Lukim pablikeson for olketa nara information)
CANADA
Blainville
Montreal
U.S.A.
[Piksa long page 10]
Canadian Charter of Rights and Freedoms pro-tectim freedom bilong olketa citizen long Canada
[Piksa long page 11]
Distaem, olketa Witness garem freedom for preach long pablik long Blainville. Smol piksa: Meeting long Kingdom Hall bilong olketa