KAVA SUBJECT

Truth Abaotem Halloween

Hao, pipol savve celebratem Halloween lo ples wea iu stap? Lo United States and Canada, staka pipol celebratem Halloween evri year lo October 31. Bat, lo staka nara kantri raonem world tu, pipol celebratem olketa tradition wea connect witim Halloween. Lo samfala ples, pipol duim olketa celebration wea garem difren nem, bat wea semsem witim Halloween lo olketa samting hia: olketa contactim spirit world thru lo spirit blo dead pipol, olketa fairy, olketa witch, and even devil and olketa demon angel.—Lukim box “Olketa Celebration Raonem World wea Olsem Halloween.”

MAET iu samwan wea no biliv lo olketa supernatural spirit. Maet iu ting lo wei for celebratem Halloween and kaen celebration hia olsem fun nomoa and wei for teachim pikinini blo iu for garem gud imagination. Nomata olsem, staka pipol ting lo olketa celebration hia olsem harmful, and diswan nao olketa reason why:

Encyclopedia of American Folklore sei: “Main part blo Halloween hem for contactim olketa spirit force, and staka lo olketa hia threatenim pipol or mekem olketa fraet.” (Lukim box “Halloween Taem Laen.”) And olketa nara celebration wea semsem olsem Halloween tu garem pagan origin and barava connect witim ancestor worship. Nomata distaem, pipol raonem world iusim kaen celebration olsem for contactim wat olketa tingse hem spirit blo dead pipol.
Nomata pipol sei Halloween hem wanfala American celebration, each year pipol lo staka nara kantri start for celebratem tu. Bat, staka wea just start for celebratem olketa no idea dat olketa symbol, decoration, and tradition wea pipol followim lo Halloween hem garem pagan origin, wea staka nao connect lo supernatural being and spiritism.—Lukim box “Wea Nao Hem Kam From?”
Staka thousand Wiccan, wea keepim olketa Celtic ritual blo bifor, olketa still kolem Halloween lo Samhain, wea hem nem blo celebration hia bifor, and wea olketa ting lo hem olsem most holy naet blo year. Wanfala niuspepa, USA Today, hem quotem disfala toktok blo wanfala wea sei hem witch blo olketa: “Luk olsem olketa Christian no realizim dat olketa joinim mifala lo celebration blo mifala. . . . Mifala hapi tumas lo datwan.’”
Olketa celebration olsem Halloween againstim olketa Bible teaching. Bible givim disfala warning: “No eniwan lo iufala mas . . . duim spiritism, duim magic, hem sorcerer, wea iusim olketa charm, story witim olketa ghost or spirit, or story witim dead pipol.”—Deuteronomy 18:10, 11, The Jerusalem Bible; lukim tu Leviticus 19:31; Galatia 5:19-21.

Bikos lo olketa point wea iumi just storyim, hem bae wise if iu savve lo evil origin blo Halloween and kaen celebration olsem. From iu garem moa understanding lo diswan, maet bae iu tu wanfala lo staka wea no participate lo kaen celebration olsem.

“Luk olsem olketa Christian no realizim dat olketa joinim mifala lo celebration blo mifala. . . . Mifala hapi tumas lo datwan.’”—Niuspepa USA Today, wea quotem toktok blo wanfala wea sei hem witch

WEA NAO HEM KAM FROM?

Origin blo Samfala Halloween Tradition and Symbol

VAMPIRE, WEREWOLVE, WITCH, ZOMBIE: Olketa sei olketa creature hia stap lo evil spirit world.

LOLI: Olketa Celts bifor trae for mekem olketa wicked spirit hapi taem olketa givim loli lo olketa. Bihaen, church encouragem pipol wea duim disfala celebration for go from haos tu haos lo All Hallows’ Eve, for askem kaikai from pipol mekem olketa savve prea on behalf lo dead pipol. Gogo olketa kolem disfala tradition Halloween’s trick or treat.

COSTUME: Olketa Celts werem olketa frightening mask mekem olketa evil spirit bae tingse olketa tu spirit and bae no duim eniting for spoelem olketa. Gogo church hem mergem olketa pagan tradition hia witim olketa feast blo All Souls and All Saints. Bihaen, pipol wea celebratem go from haos tu haos and werem olketa costume blo olketa saint, angel, and devil.

PUMPKIN: Pipol savve displayim olketa turnip wea olketa karvem and laetem kandol insaed for raosem olketa evil spirit. Samfala sei kandol wea olketa laetem insaed turnip hem representim soul wea no savve aot from purgatory. Bihaen, staka iusim olketa pumpkin wea olketa karvem.

HALLOWEEN TAEM LAEN

FIFTH CENTURY B.C.E.

Olketa Celts celebratem festival blo Samhain lo end blo October, bikos olketa sei hem nao taem wea olketa ghost and demon wakabaot lo earth winim olketa narataem.

FIRST CENTURY C.E.

Olketa Roman conquerim olketa Celts and followim olketa spiritistic ritual blo Samhain.

SEVENTH CENTURY C.E.

Pope Boniface IV hem startim annual celebration blo All Saints’ Day for honorim olketa martyr.a

ELEVENTH CENTURY C.E.

November 2 hem day wea olketa markem olsem All Souls’ Day for celebratem dead pipol. Taem olketa celebratem All Saints’ Day and All Souls’ Day tugeta, olketa kolem lo Hallowtide.

EIGHTEENTH CENTURY C.E.

Olketa printim nem blo celebration Hallowe’en (Hallow Evening) olsem Halloween.

NINETEENTH CENTURY C.E.

Staka thousand pipol wea muv from Ireland go lo United States gohed celebratem olketa Halloween tradition blo olketa, and gogo olketa combinem witim olketa semkaen tradition from Britain and Germany, and Africa and olketa nara part lo world tu.

TWENTIETH CENTURY C.E.

Halloween hem kamap wanfala popular celebration lo United States.

TWENTY-FIRST CENTURY C.E.

Commercial world mekem Halloween kamap wanfala multibillion-dollar industry raonem world.

a Hallow hem wanfala old English word wea minim “saint.” All Hallows’ Day (wea olketa kolem tu lo All Saints’ Day) hem celebration for honorim olketa dead saint. Evening bifor All Hallows’ Day olketa kolem lo All Hallow Even, and bihaen olketa shortem nem hia go lo Halloween.