LESON 2
Hao For Hambol
WANEM NAO HEM MINIM FOR HAMBOL?
Man wea hambol showimaot respect. Hem no mekhae long hemseleva, and no tingse hem important winim narawan. Hem bae laek for savve long olketa narawan and willing for lane from olketa.
Samfala pipol tingse hem nogud for man hambol. Bat hem gud for hambol bikos man bae luksavve hem garem olketa wik point and hem no fit for duim samfala samting.
WHY HEM IMPORTANT FOR HAMBOL
Pipol laekem man wea hambol. Wanfala buk sei: “Staka taem pipol wea hambol savve fren gud witim olketa narawan.” Buk sei tu: “Olketa wea hambol faendem hem isi for story witim nara pipol.”
Pikinini wea hambol bae kasem gud samting. Sapos pikinini lane for hambol, datwan bae helpem hem distaem and taem hem big. Olsem example, datwan bae helpem hem for kasem waka. Doctor Leonard Sax sei: “Sapos young wan wea interview for waka hem praod and tingse hem no garem eni wik point, maet hem no kasem waka hia. Bat young wan wea hambol and barava lisin and story gud long man wea duim interview maet kasem datfala waka.”
TEACHIM PIKININI FOR HAMBOL
Helpem pikinini for garem balance tingting abaotem hemseleva.
BIBLE PRINCIPLE: “Sapos eniwan tingse hem important, hem laea long hemseleva, bikos hem nating important nomoa.”—Galatia 6:3.
No talem toktok wea maet no tru. Sapos iu evritaem encouragem pikinini witim kaen toktok olsem “iu savve kamap doctor, lawyer, or pilot,” staka taem datwan no savve kamap tru. Sapos pikinini garem olketa goal wea hem fit for kasem and hem waka hard for kasem datwan, diswan bae helpem hem for win long laef.
Praisem pikinini for gud samting hem duim. No evritaem talem pikinini hem spesol bikos datwan bae no helpem hem for hambol. Bat praisem hem for olketa gud samting wea hem duim.
Markem spialaen taem pikinini iusim social media. Staka taem long social media, pipol mekhae long olketa seleva and wanem olketa duim. Sapos pikinini duim datwan evritaem, diswan bae no helpem hem for hambol.
Encouragem pikinini for sei sorre kwiktaem. Taem pikinini duim mistek, helpem hem for luksavve long datwan and for sei sorre.
Teachim pikinini for garem wei for tinghae.
BIBLE PRINCIPLE: “Showimaot iufala thankiu long God.”—Colossae 3:15.
Tinghae long creation. Helpem pikinini for tinghae long olketa samting wea God wakem, and for luksavve iumi needim staka samting hia for gohed laef. Olsem example, storyim hao iumi needim air for brithim, wata for drinkim, and kaikai.
Tinghae long pipol. Helpem pikinini for no jealous long narawan from hem garem savve winim hem, bat encouragem pikinini for lanem samting from narawan.
Talemaot thankiu. Teachim pikinini for talem thankiu, and tu, for barava tinghae long samting. Sapos iumi talem thankiu evritaem, diswan bae helpem iumi for hambol.
Teachim pikinini hao hem gud for helpem narawan.
BIBLE PRINCIPLE: “Ting long narawan olsem hem winim iufala. Evritaem tingim olketa narawan and no tingim iufala seleva nomoa.”—Philippi 2:3, 4.
Givim waka long pikinini. Sapos iu no givim pikinini waka long haos, datwan maet mekem hem tingse hem important tumas and hem shud no duim eni waka! Pikinini shud waka firstaem then plei bihaen. Teachim pikinini hao disfala waka savve helpem olketa long famili and olketa bae tinghae and respectim hem from hem duim datwan.
Hem gud for pikinini duim samting for narawan. Taem pikinini duim olsem, datwan bae helpem hem for garem gudfala wei. Helpem hem for luksavve long hu nao needim help. Talem hem wanem nao hem savve duim for helpem datfala man. Praisem pikinini taem hem helpem narawan.