1. Waswe, God Nao Mekem Iumi Safa?

Why Iumi Need for Savve

Bikos staka pipol sei hem will blo God for iumi safa.

Samting for Tingim

Samfala bigman blo religion sei God nao mekem iumi safa. Example, olketa sei:

• God nao kosim natural disaster for panisim pipol.

• Olketa pikinini dae bikos God laekem olketa for stap witim hem lo heven.

• Lo taem blo war, God saed witim army blo religion blo olketa. Olketa talem datwan nomata war mekem staka pipol safa.

Bat luk olsem wanem olketa bigman hia teachim hem no tru. Sapos olsem, masbi God no hapi lo olketa.

Ansa From Bible

God no mekem iumi for safa.

Bible showimaot God garem olketa gudfala fasin nomoa. Olsem example:

“Wei blong [God] hemi gud tumas, an hemi stret olowe nomoa . . . an hemi no save duim eni nogud samting.”—DIUTRONOMI 32:4.

“God hu hemi garem evri paoa, hemi no save duim eni ravis samting.”—JOB 34:10.

“God . . . hemi no save spoelem stretfala wei.”—JOB 34:12.

God no hapi lo olketa religion wea teachim olketa laea samting abaotem hem.

God no hapi tu lo olketa religion wea sei God kosim iumi for safa, and hem no hapi taem olketa religion sapotim war.

“Olketa profet ya i gohed fo talemaot laea profesi blong olketa long nem blong mi, bat mi no siusim olketa o sendem olketa kam, an mi no givim toktok long olketa fo talemaot. Olketa talemaot nomoa olketa laea . . . wea i kam from tingting blong olketa seleva.”—JEREMAEA 14:14.

Jesus tok againstim olketa religion wea no duim wanem God laekem.

“No evriwan wea sei long mi, ‘Lord, Lord,’ bae go insaed long Kingdom bilong God bat man wea duim wanem Dadi bilong mi long heven laekem nao, bae go insaed. Long datfala day staka pipol bae sei long mi: ‘Lord, Lord, mifala talemaot olketa toktok bilong God long nem bilong iu, raosem olketa demon long nem bilong iu, and duim olketa mirakol long nem bilong iu. Bat mi bae sei long olketa: Mi nating savve long iufala! Iufala go from mi bikos iufala olketa man for duim olketa nogud samting!’”—MATTHEW 7:21-23.