Timothy—Niu Helper Bilong Paul

YOUNG man wea iu lukim long hia witim aposol Paul hem Timothy. Timothy stap witim famili bilong hem long Lysʹtra. Mami bilong hem, hem Euʹnice and grandmami hem Loʹis.

Diswan nao mek-thri taem Paul visitim Lysʹtra. Firstaem wea Paul and Barʹna·bas kam long hia for preach, hem samting olsem wan year bifor. Distaem Paul hem kam bak moa witim Silas.

Waswe, iu savve wanem nao Paul talem Timothy? Hem askem hem: ‘Waswe, iu laek for kam witim mitufala Silas? Mifala needim help bilong iu for preach long pipol wea stap long olketa farawe ples.’

Timothy hem sei: ‘Ia, mi laek for kam.’ So no longtaem bihaen, Timothy lusim famili bilong hem and go witim Paul and Silas. Bat bifor iumi lane abaotem gogo bilong olketa, iumi lukim wanem nao happen long Paul. Samting olsem 17 year go pas finis from taem wea Jesus kam long hem long road wea go for Damascus.

Remember hao Paul go long Damascus for spoelem olketa disaepol bilong Jesus, bat distaem, hemseleva wanfala disaepol! Bihaen, samfala enemy plan for killim dae Paul bikos olketa no laekem wei wea hem teach abaotem Jesus. Bat olketa disaepol helpem Paul for ranawe. Olketa putim hem insaed long wanfala basket witim rope and isisi daonem hem aotsaed long wall bilong taon.

Bihaen, Paul go for preach long Antioch. Long hia olketa kolem olketa follower bilong Jesus olketa Christian. Paul and Barʹna·bas go from Antioch long wanfala preaching gogo long olketa kantri farawe. Wanfala taon olketa visitim hem Lysʹtra, hom bilong Timothy.

Distaem, wanfala year bihaen, Paul kam bak long Lysʹtra. Taem Timothy go witim Paul and Silas, waswe, iu savve wea nao olketa go? Luk long disfala map, and bae iumi lane abaotem samfala ples hia.

Firstaem, olketa go long I·coʹni·um wea no farawe, then long narafala taon, Antioch. Bihaen olketa go ap long Troʹas, and then long Phi·lipʹpi, Thes·sa·lo·niʹca and Be·roeʹa. Waswe, iu savve lukim Athens long disfala map? Paul hem preach long there. Bihaen, olketa preach for wan and haf year long Corinth. Then olketa stap lelebet taem long Ephʹe·sus. And then olketa kam bak long ship for Caes·a·reʹa, and go ap long Antioch, and Paul stap long there.

So Timothy hem travel plande handred kilometer for helpem Paul preachim “gud nius” and for startim plande Christian kongregeson. Taem iu grow big, waswe, bae iu wanfala faithful servant bilong God olsem Timothy?