Wanfala Boy wea Sleep

SEI! Wanem nao happen long hia? Waswe, boy wea leidaon long graon hem garekil nogud? Lukim! wanfala man wea kamaot from datfala haos hem Paul! Waswe, iu savve lukim Timothy long there tu? Waswe, boy hia foldaon from window?

Ia, datwan nao samting wea happen. Paul hem givim wanfala tok long olketa disaepol hia long Troʹas. Hem savve hem bae no lukim olketa moa for longfala taem bikos hem bae go long wanfala ship long next day. So hem gohed for toktok go kasem midolnaet.

Disfala boy Euʹty·chus hem sidaon long window, gogo hem sleep. Then hem foldaon nao from datfala window wea hem thri storey hae! Dastawe olketa pipol hia wari tumas. Taem olketa man pikimap disfala boy, samting wea olketa tingim hem tru nao. Hem dae finis!

Taem Paul lukim boy hia hem dae, hem leidaon antap long hem and holem hem. Then hem sei: ‘No wari. Boy hia olraet nomoa!’ And hem olraet nao! Diswan hem wanfala mirakol! Paul mekem hem laef bak! Olketa pipol hapi fogud.

Evriwan go bak moa long rum antap and kaikai. Paul hem gohed for toktok go kasem daylaet. Bat for sure, Euʹty·chus no sleep moa! Then Paul, Timothy and olketa wea gogo witim olketa go insaed long ship. Waswe, iu savve wea nao olketa go?

Paul hem just finisim mek-thri preaching gogo bilong hem, and hem go bak nao long hom bilong hem. Long disfala gogo, Paul hem stap for thrifala year long bigfala taon bilong Ephʹe·sus. So disfala gogo hem moa long winim mek-tu gogo bilong hem.

Bihaen olketa lusim Troʹas, ship hem stop long Mi·leʹtus for lelebet taem. From Ephʹe·sus hem tu-thri kilometer nomoa from there, Paul askem olketa older man long datfala kongregeson for kam long Mi·leʹtus mekem hem savve story witim olketa for lastfala taem. Bihaen, taem ship hem redi for go, olketa sorre tumas for lukim Paul hem go!

Gogo, ship hia hem kam bak long Caes·a·reʹa. Taem Paul hem stap long there long haos bilong disaepol Philip, profet Agʹa·bus hem givim warning long Paul. Hem sei Paul bae kamap wanfala prisoner taem hem go long Jerusalem. And hem nao samting wea happen. Then, bihaen hem stap long prison for tufala year long Caes·a·reʹa, olketa sendem Paul long Rome for hem kot front long Caesar, ruler bilong Rome. Bae iumi lukim samting wea happen taem hem gogo long Rome.