Chapter 2
Mek Hae long Jehovah olsem Tru God
1. (a) Hu nao trufela God? (b) Taem yumi learn abaotem hem, hao nao diswan mas affectim laef bilong yumi?
APOSOL Paul raet long olketa otherfela Kristian abaot hao, nomata planti god they stap, “for yumi, wanfela God wea hem Father nomoa stap . . . and wanfela Lord nomoa, Jesus Kraest.” (1 Cor. 8:5, 6) Datfela “wanfela God” wea Paul story abaot hem Jehovah, Creator bilong every samting. (Deut. 6:4; Rev. 4:11) Pipol wea garem honest heart wea learn abaot olketa fashion bilong hem and olketa samting wea hem duim for olketa man barava want for kam klos long hem. Wanem samting nao kam aot from diswan? They want for mek hae long dat Wan wea they barava ting hae long hem, long samting wea they talem and duim. Taem love bilong olketa for God hem grow, diswan muvim them for talem other pipol abaotem hem, and tu they barava trae hard for followim hem. Bible encouragim yumi everywan for duim diswan, taem hem say: “Kamap pipol wea followim fashion bilong God, olsem olketa pikinini wea hem love-im and go ahed for wakabaot long love.” (Eph. 5:1, 2) For followim datfela kaonsel, yumi need for barava savvy gud long Jehovah.
Fashion bilong Jehovah
2. Wanem nao samfela nambawan fashion bilong God wea muvim yumi for praisim hem?
2 Insaed long Bible, planti toktok stap wea show aot olketa nambawan fashion bilong God. Taem yu read abaotem them, tingting gud abaot olketa fashion hia and hao they important long yu. For example: “God hem love.” (1 John 4:8) “Every way bilong hem followim justice.” (Deut. 32:4) ‘Withim hem wisdom hem stap.’ (Job 12:13) Hem garem “staka power.” (Isa. 40:26) Taem yu tingim olketa fashion hia, waswe, diswan muvim yu for praisim God from yu barava ting hae long hem?
3. Wanem otherfela fashion bilong Jehovah they gud tumas?
3 Bible hem talem yumi moa abaot nambawan fashion bilong hem taem hem say Jehovah hem “wanfela God wea show aot mercy and love, hem no savvy kros kwiktaem and loving-kaeness and truth bilong hem they big tumas.” (Ex. 34:6) “Yu, O Jehovah, yu gud tumas and ready for forgive.” (Ps. 86:5) “Long saed bilong Jehovah, eye bilong hem lukluk raonem earth for givim strong long olketa wea givim whole heart bilong them long hem.” (2 Chron. 16:9) “God hem no saed withim anywan, but long every nation man wea fraet long hem and duim raeteous fashion nao hem laekem.” (Acts 10:34, 35) Jehovah “givim planti samting” and hem “datfela hapi God.” (Jas. 1:5; 1 Tim. 1:11) Hem barava gud tumas for servim disfela God wea winim everywan and for lukim way wea hem luk aftarem yumi long loving way!
4. (a) Wanem kaen way for worship nao Jehovah wantim, and why nao diswan hem important? (b) Wanem nao Psalm 34:3 invite-im yumi for tek part long hem?
4 For fitim otherfela fashion bilong hem, hem “wanfela God wea wantim pipol for worshipim mi nomoa.” (Ex. 20:5) For servim hem long way wea hem bae acceptim, yumi mas worshipim hem nomoa. Yumi kanduit for love-im world tu, wea Satan nao hem god. (1 John 2:15-17; 2 Cor. 4:3, 4) Jehovah hem luksavvy sapos anywan liar for followim raeteous fashion. Hem barava savvy no just long samting wea yumi duim but feeling bilong yumi long datwan tu, and wanem kaen fashion nao yumi trae for showim aot. Sapos yumi really love-im raeteous fashion, hem bae helpem yumi. (Jer. 17:10; Prov. 15:9) From fashion bilong Jehovah, planti million pipol everywea long earth they hapi for acceptim disfela invitation bilong man wea raetem psalm long Bible: “O mek hae long Jehovah withim mi, yufela pipol, and letem yumi praisim nem bilong hem tugeta.” (Ps. 34:3) Waswe, yu wanfela long olketa hia?
5. Wanem nao bae helpem yumi for barava kasem gudfela samting from study bilong yumi abaot fashion bilong Jehovah?
5 Way wea yu want for tok abaotem God bae kamap moa big, and sapos yu lukluk gud long olketa nambawan fashion bilong hem, diswan bae helpem yu for followim fashion bilong hem. Faend aot (1) wanem nao each fashion, and hao hem different from otherfela fashion bilong hem, (2) way wea Jehovah showim aot fashion hia and hu nao hem showim aot long hem, and tu (3) hao yu savvy showim aot and hao hem mas affectim tingting bilong yu.
6. Use-im love olsem example, and showim hao yu savvy lukluk long olketa fashion bilong Jehovah. Duim diswan long way for answerim olketa question long end bilong disfela paragraf, and use-im tu olketa scripture long answer bilong yu.
6 Tingim wanfela example. Taem Bible say, “God hem love,” wanem nao hem meanim? (1 John 4:8) Hem tru, samfela different kaen love they stap. Greek word wea they use-im long disfela scripture hem a·gaʹpe, hem love wea moa big winim every other wan, olsem Jehovah God seleva showim aot. Love olsem hem nating selfish. Taem yu tingim datwan, answerim olketa question long daon long toktok bilong yuseleva, and use-im olketa scripture wea they raetem.
Hao nao disfela fashion show aot long olketa work bilong Jehovah long creation? (Acts 14:16, 17)
Wanem nao barava nambawan example long love bilong Jehovah for olketa man? (John 3:16) Waswe, Jehovah duim diswan from gudfela fashion bilong man? (Rom. 5:8)
Hao nao samting wea Jehovah duim thru long Son bilong hem mas affectim way wea yumi use-im laef bilong yumi? (2 Cor. 5:14, 15, 18, 19)
Olsem olketa Kristian, wanem nao samfela way wea yumi savvy show aot yumi garem sem kaen love for otherfela Kristian? (1 Cor. 13:4-7; 1 John 4:10, 11; 3:16-18)
Yumi mas show aot love long hu moa, and hao? (Matt. 5:43-48; 28:19, 20; Gal. 6:10)
7. Taem yu study seleva, hao nao yu savvy faendem sem kaen samting abaot otherfela fashion bilong Jehovah?
7 Waswe, yu laek for faend aot moa abaot samfela otherfela fashion bilong Jehovah? Taem yu study seleva, trae firstaem for luk long “justice” and “wisdom,” then maet “loving-kaeness” and “mercy.” Use-im olketa index bilong olketa pablikeson bilong Watch Tower and wanfela Bible concordance, and yu bae faendem staka nambawan samting for helpem yu.
Helpem Other Pipol for Learnim Truth Abaotem God
8. (a) Wanem nao olketa god wea pipol bilong world they worshipim? (b) Hu nao bihaenem every samting hia wea olabaot, and why nao yu answer olsem?
8 Long way wea againstim worship bilong trufela God, olketa man worshipim planti million otherfela god. Long mek-for century, Kristendom start for believe long wanfela “Trinity,” wea olketa long Babylon, Egypt, Hindu and Buddhist they teachim firstaem. For join withim disfela belief abaot God, pipol worshipim olketa strongfela ruler, olketa man bilong sport and man wea singsing olsem god bilong them. Shilling, way for ting hae long seleva and sex they kamap olketa god tu wea pipol strong for worshipim. Hu nao bihaenem every samting olsem? “God bilong disfela system,” Satan the Devil. (2 Cor. 4:4; 1 Cor. 10:20) Long planti different kaen giaman way, hem trae for tanem pipol awe from Jehovah, or mekem worship bilong them divaed.
9. Wanem nao best way for helpem samwan for learnim truth abaotem God?
9 Hao nao yumi savvy helpem olketa pipol olsem, nomata olketa wea say they Kristian or other pipol, for savvy long truth abaotem God? Wanfela barava nambawan way hem for showim them long gudfela way wanem Bible seleva talem abaot trufela God and fashion bilong hem. Then yumi need for supportim diswan long way for garem living wea showim aot olketa fashion bilong God.—1 Pet. 2:12.
10. Taem yumi tok withim man wea believim Trinity, why nao hem no wise for ting yumi savvy gud long samting wea hem believim?
10 But waswe sapos samfela member bilong olketa church bilong Kristendom argue withim yu, and say belief bilong them long “Trinity” hem kam from Scripture? Firstfela samting, yu mas savvy, nomata samfela church talemaot meaning bilong “Trinity” teaching, planti man garem idea bilong themseleva abaotem diswan. Askim them for talemaot tingting bilong them, and then helpem them for markem samting wea they believim withim wanem Bible bilong themseleva talem. Go-go, encouragim them tu for markem teaching bilong church withim Word bilong God.
11. Story abaot each wan long faevfela main point, and use-im olketa question and scripture wea stap long disfela paragraf for meanim way wea “Trinity” teaching hem nating fitim olketa Scripture.
11 Taem yu tingting long way wea yu want for helpem honest pipol, lukluk long hao yu savvy use-im olketa scripture wea stap long daon for meanim olketa point wea kam from olketa scripture hia:
(1) Samfela man wea believim Trinity strongim idea wea say threefela Person they stap (Father, Son and Holy Ghost) but wanfela God nomoa.
But waswe, Acts 2:4, 17 show aot “Holy Ghost,” or “holy spirit,” hem wanfela person?
Why nao hem gud for lukim haomas person nao each wan long olketa scripture hia they tok abaot? (John 17:20-22; Acts 7:56; Rev. 7:10)
(2) Samfela they believe every member bilong “Trinity” they garem sem glory, no anywan hem moa big or moa small winim narawan, but everywan they semsem and everywan stap olawe tu.
Waswe, olketa Scripture agree withim diswan? (For answerim, lukim John 14:28; Matthew 24:36; Revelation 3:14.)
(3) Samfela pipol point go long John 1:1 olsem proof bilong “Trinity.” They say Greek scripture hia no use-im disfela word (“wanfela”) so datfela scripture hem: “Word hem God,” hem no “wanfela god.”
But haomas person nao John 1:1 tok abaot? Threefela? Or tufela? Hao nao John 1:18 againstim “Trinity” teaching?
Hem tru olketa bilong Greek no use-im disfela word “wanfela” long langwis bilong hem, but planti langwis they use-im, and they use-im for meanim samting long kliafela way. Sapos samwan hem ting hem rong for use-im disfela word “wanfela” long John 1:1, waswe, hem bae tek-aotem long Acts 28:6 wea King James Version and otherfela Bible transleson they use-im? (Narafela way for transletim John 1:1, olsem An American Translation hem duim, hem olsem “Word hem divine,” wea meanim hem garem olketa sem fashion olsem God.)
(4) Pipol wea believim Trinity they say tu hao long Genesis 1:1, 26, Hebrew word wea they transletim “God” hem El·o·himʹ and long Hebrew datwan meanim “olketa God.”
Why nao datwan no supportim teaching bilong threefela Person insaed “wanfela God”?
Sapos Genesis 1:1 showim aot wanfela “Trinity,” wanem nao Judges 16:23 showim aot, wea use-im el·o·himʹ for “god,” withim Hebrew word wea meanim wanfela, no planti?
Why nao Hebrew word wea they use-im for God insaed olketa Scripture hia hem meanim planti? Diswan hem wanfela way wea Hebrew langwis hem use-im word hia for meanim samting wea gud tumas or hae tumas. Sapos they tok abaot planti person, otherfela word wea they use-im withim datfela word bae meanim planti tu, but long olketa Scripture hia they no duim olsem.
(5) From way wea olketa church mek hae long Jesus (and tu way wea nem bilong Jehovah hem no stap long planti Bible transleson), samfela pipol ting long Jesus nomoa taem anywan tok abaot God.
But wanem example long saed bilong worship nao Jesus provide-im for yumi followim? (Luke 4:8)
12. Why nao Jesus fit for kolem Father bilong hem “only tru God”?
12 Nomata olketa Scripture tok abaot Jesus olsem “wanfela god,” and “Maeti God,” Jesus mek hae and say olsem abaot Father bilong hem, “God bilong mi and God bilong yu.” (John 1:1; 20:17; Isa. 9:6) Hem agree withim Moses, wea say: “Jehovah hem trufela God; no anywan moa olsem hem.” (Deut. 4:35) Jehovah barava different every bit from olketa samting wea pipol worshipim olsem idol, olketa man wea they mek hae long hem and Satan the Devil. From hem different from olketa samting olsem, Jesus kolem Jehovah, “only tru God.”—John 17:3.
“Wakabaot long Nem bilong Jehovah”
13, 14. Wanem nao insaed long way for “savvy” and ‘wakabaot long’ nem bilong Jehovah?
13 Bihaen long staka year wea they konfius abaot God, planti pipol hapi tumas taem they lukim nem bilong God, Jehovah, insaed long Bible bilong them. (Ex. 6:3) But they bae kasem gudfela samting olawe from disfela savvy sapos they ‘wakabaot long nem bilong Jehovah olawe.’ (Mic. 4:5) Diswan meanim moa samting winim way for savvy nomoa long nem bilong Jehovah or way for say they Jehovah’s Witness.
14 Long saed bilong nambawan nem bilong God, Psalm 9:10 say: “Olketa wea savvy long nem bilong yu bae trustim yu, . . . O Jehovah.” Wanem nao datwan meanim? Hem meanim moa samting winim way for savvy nomoa long nem bilong Jehovah, from datwan hem no meanim way for trust long Jehovah. “Savvy” long nem bilong God long hia hem meanim way for ting hae long fashion bilong Jehovah, respectim power bilong hem, obeyim olketa komand bilong hem. Long sem way, ‘wakabaot long nem bilong Jehovah’ meanim way for dedicate long hem and stand for hem olsem wanfela worshiper bilong hem, really use-im laef bilong yumi for fitim will bilong God. (Luke 10:27) Waswe, yu duim datwan?
15. Wanem nao yumi needim for servim Jehovah olawe?
15 Sapos yumi want for servim God olawe, samting moa mas muvim yumi for duim diswan winim way for ting hem wanfela work nomoa. Aposol Paul encouragim Timothy, wea servim Jehovah for planti year finis: “Trainim yuseleva withim way for love-im God olsem goal bilong yu.” (1 Tim. 4:7) Love hem kam from heart; and hem grow taem yumi ting hae long person wea yumi love-im. “Way for love-im God” hem meanim barava bigfela respect for Jehovah. Yumi love-im hem from yumi ting hae long hem and olketa way bilong hem. Diswan mekem yumi wantim everywan for ting hae long nem bilong hem. Yumi mas mekem grow “way for love-im God” olsem goal long laef bilong yumi sapos yumi want for wakabaot long nem bilong Jehovah, datfela trufela God, olawe.—Ps. 37:4; 2 Pet. 3:11.
Samting for Review
● Wanem kaen fashion nao Jehovah garem? Hao nao yumi kasem gudfela samting taem yumi meanim gud each wan long olketa fashion bilong hem?
● Hao nao yumi savvy helpem other pipol for learnim truth abaotem God?
● Wanem nao insaed long way for “savvy” long Jehovah and ‘wakabaot long nem bilong hem’?