Workim Olketa Bible Buk for Praisim God

Pipol savvy gud long way wea Olketa Witness Bilong Jehovah preach abaotem Kingdom bilong God thru long olketa buk. Start long 1920 Watch Tower Society iusim olketa volunteer workman from midlwan long olketa Witness for workim olketa magasin and buk for givim aot long pipol. Diswan hem for workim inaf buk evritaem wea no kost tumas.

For samting olsem 70 year, Society hem workim staka Bible buk, firstaem long Brooklyn and then long olketa narafala kantri. Planti volunteer workman nao duim evri work hia.

Bihaen long 1970 olketa change-im oldfala way for workim and printim buk and iusim computer, phototypesetting, and offset printing. Problem nao hem olketa machine wea olketa kampani sellim savvy printim fewfala langwis nomoa. But, Society workim finis olketa buk long samting olsem 160 langwis, and need hem stap for workim long moa langwis.

So, olketa kolem kam samfala volunteer workman for workim wanfala multilanguage electronic phototypesetting system. Diswan work gud tumas. Olketa workim wanfala program wea olketa savvy raetem toktok, compose-im, and duim phototypesetting, wea nem bilong hem MEPS. Diswan savvy workim winim 210 langwis. Olketa savvy addim moa langwis long diswan.

Distaem olketa duim transleson and iusim MEPS long winim 100 kantri. Olketa volunteer workman from olketa kantri hia kasem training for workim and luk aftarem olketa machine hia. Distaem Society workim olketa magasin long 127 langwis long 33 kantri, and long 5-fala long olketa kantri hia, olketa printim olketa buk and Bible tu.

For duim disfala work hem needim pipol—samfala for raetem, transletem, checkim, printim, workim olsem buk, and for sendem go aot. Samfala moa garem work for raetem olketa leta long olketa kongregeson. Samfala plantim kaikai, kukim kaikai, duim klining, wasim kaleko, and samfala samting olsem. Olketa volunteer workman nao duim evri work hia long planti different kantri. Evriwea long world long 1996, olketa garem 16,966 volunteer workman long olketa different office, factory, hom, and farm.

Hu nao olketa pipol hia? Olketa man and woman, wea single and wea marit, young and olo, evriwan Witness Bilong Jehovah wea dedicate finis. Samfala duim disfala work for 40, 50, and maet 60 year finis. Olketa spendem samting olsem 44 hour evri week long assignment bilong olketa, and work extra taem sapos need kamap. Olketa iusim evening and weekend for preachim gud nius from haos tu haos, and duim otherfala work bilong kongregeson.

Evriwea long world, olketa workman hia kasem ples for stap and kaikai long wanfala haos bilong Society, wea olketa kolem Bethel Hom. And tu, olketa kasem lelebet selen for peim kost for transport long ministry and for samting wea olketa seleva needim.

Start kam long 1920, olketa volunteer workman workim winim naen billion Bible, buk, magasin, and tract long winim 200 langwis for givim aot evriwea long world. Olketa duim part bilong olketa mekem disfala gud nius for olowe savvy go aot olsem gudfala toktok long evri nation and tribe and langwis and pipol.—Revelation 14:6, 7.

• Wanem kaen printing system nao Watch Tower Society garem, and why?

• Hu nao duim evri work hia, and hao nao living bilong olketa?

[Piksa long page 24]

Olketa volunteer duim olketa work for workim olketa Bible buk long factory, hom, office, and farm, long Brooklyn and Wallkill, New York, U.S.A.

[Piksa long page 25]

Olketa volunteer duim olketa different work wea join withim way for workim Bible and Bible buk

Spain

Germany

Finland

Canada

Denmark

Sweden

South Africa

Brazil

Netherlands

Australia