Olketa Full-Taem Minister Leadim Preaching Work
Maet firstfala Witness Bilong Jehovah wea kam lukim iu hem wanfala full-taem pioneer minister or wanfala missionary. From Olketa Witness Bilong Jehovah no kasem pei for ministry bilong olketa, maet iu askim hao nao pipol hia duim ministry full taem.
Evri Witness Bilong Jehovah wea dedicate and baptaes they minister, but planti garem famili or otherfala responsibility wea stopem olketa for spendem staka hour insaed wan week long ministry bilong olketa. But, planti thousand Witness evriwea long world mekem living bilong olketa simple and duim part-taem work for peim kost bilong diskaen simple living and then spendem 1,000 hour or winim datwan insaed wanfala year long ministry.
Hem tru, olketa full-taem pioneer minister no garem staka selen for olketa seleva, but for olketa diswan hem wanfala way for lukaotem Kingdom bilong God firstaem. And olketa kasem planti blessing. Way wea olketa fit for story long pipol abaotem Word bilong God for 90 hour or moa long wanfala month hem gudfala experience. Full-taem minister mekem savvy bilong hem for ministry kamap moabeta and tu hem garem taem for go back long evriwan wea interest. Olketa kasem barava gudfala samting from diswan. Olketa garem material samting wea olketa needim, and olketa satisfy long samting wea olketa garem.—Matthew 6:33.
Long February 1943, Watch Tower Society startim Watchtower Bible School Bilong Gilead. Purpose bilong diswan hem for trainim olketa full-taem pioneer minister wea garem gudfala savvy for serve olsem missionary long different kantri. Insaed long disfala faev-month course olketa duim bigfala study long Bible, history bilong Bible, organization bilong Jehovah, and samfala subject wea readyim olketa for duim service long different kantri.
Society peim pasis for kasem missionary assignment and provide-im gudfala kaikai and ples for stap long missionary hom. Hem provide-im lelebet selen tu for each missionary for peim samting wea hem needim. Olketa missionary duim work long missionary hom olsem for go long stoa, kukim kaikai, and klining. Diswan mekem olketa missionary fit for spendem 140 hour long wanfala month for preach from haos tu haos and conductim Bible study withim pipol wea interest.
Planti missionary hia go long ples wea farawe from hom and famili bilong olketa. Olketa change for fitim different kaen living and kastom, kaikai, weather, and learnim narafala langwis. Olketa duim disfala work bikos olketa love-im pipol and barava want for helpem pipol for savvy long Kingdom bilong God.
From 1943 kasem 1997, Watchtower Bible School Bilong Gilead conductim 103 class and sendem aot 7,227 missionary. Under long direction bilong Society, olketa hia leadim work for teach abaotem Bible wea kamap moa big long Africa, Central and South America, Orient, and South Pacific, and olketa duim bigfala work long Europe.
Nomata Olketa Witness Bilong Jehovah duim ministry full taem olsem pioneer or olsem missionary or part taem, olketa no kasem selen for diswan. Olketa iusim taem, selen, and strong bilong olketa seleva for helpem pipol kasem savvy wea lead go long laef olowe.—John 17:3.
• Hao nao samfala Witness Bilong Jehovah fit for givim full taem bilong olketa long ministry, and why nao olketa duim diswan?
• Hao nao olketa minister kasem training for missionary work?
• Hao nao olketa supportim olketa missionary long assignment bilong olketa long different kantri?
[Piksa long page 22]
Left saed: Gilead School classroom, Brooklyn, N.Y., U.S.A.
Raet saed: Missionary teachim Word bilong God long Papua New Guinea
[Piksa long page 23]
Olketa pioneer minister and missionary preachim Word bilong God long olketa different kantri
Brazil
Dominican Republic
Spain
Sierra Leone, Africa