Kingdom Nius No. 34
Why Nao Laef Fulap Withim Planti Problem?
Waswe, wanfela paradaes wea free from trabel savvy kamap?
OLKETA BIGFELA PROBLEM KAMAP WORSE—WHY?
From bifor pipol garem problem everytaem. Nomata planti ting say way bilong science savvy stretem them, olketa bigfela problem kamap moa worse.
Brekem Law: Fewfela pipol feel safe for wakabaot long road or stap long haos bilong themseleva. Long wanfela kantri long Europe, pipol duim no gud samting long klosap 1-fela long every 3-fela pipol.
Environment: Dirty long air, land, and wata hem go ahed for kamap big tumas. Long samfela kantri, wanfela long every fofela man no garem klinfela wata.
Poor: Winim anytaem bifor, planti pipol distaem they poor and hangre. Long samfela kantri, winim 90 percent long pipol they poor; 30 percent long pipol long world wea savvy duim work, samting olsem 800 million, no garem work or no garem work wea fitim them—and olketa namba hia go ahed for kamap moa big.
Hangre: Nomata yu garem inaf kaikai, planti million pipol no garem. Long samfela poor kantri, each year samting olsem 13 million pipol, main wan nao pikinini, dae from hangre.
War: No long taem go nomoa, planti hundred thousand dae insaed faet wea kamap midlwan long olketa different tribe. And long mek-20 century, winim wan hundred million pipol dae insaed olketa war.
Otherfela Problem: For join withim olketa problem on top, way wea famili brek daon hem kamap moa worse, planti young girl babule nating, namba bilong olketa wea no garem haos kamap big tumas, way for tekem drug hem big tumas, and dirty fashion kamap everywea. Dastawe, wanfela member bifor bilong U.S. gavman hem say: “Planti samting distaem show aot . . . living bilong man kamap no gud tumas.” Insaed long 30 year wea go finis, namba bilong pipol long U.S. hem kamap 41 percent moa big, but raf fashion hem kwiktaem kasem 560 percent, olketa pikinini wea dadi and mami bilong them no marit kasem 400 percent, divorce kasem 300 percent, young pipol wea killim dae olketa seleva hem winim 200 percent. Sem samting tu happen long olketa otherfela kantri.
Why Nao Olketa Problem Kamap Worse?
Creator bilong yumi givim ansa. Word bilong hem kolem disfela taem wea fulap withim olketa problem olsem “olketa last day,” wanfela taem wea “hardfela taem” bae kamap. (2 Timothy 3:1) Olketa last day bilong wanem? Well, Bible hem say bilong “end bilong disfela world.”—Matthew 24:3, King James Version.
Olketa problem bilong distaem wea kamap big tumas show aot klia hao end bilong disfela system hem klosap nao, diswan meanim tu end bilong badfela fashion and olketa wea duim diswan. (Matthew 24:3-14; 2 Timothy 3:1-5; Revelation 12:7-12) Klosap nao God bae duim samting and stretem every bit olketa problem bilong distaem.—Jeremiah 25:31-33; Revelation 19:11-21.
OLKETA RELIGION BILONG DISFELA WORLD THEY FAIL
Winim way for help for stretem olketa problem bilong distaem, olketa religion mekem moa problem kamap. Insaed olketa war, olketa Catholic killim dae Catholic, olketa Protestant killim dae Protestant—planti million they dae. No long taem go nomoa long Rwanda, wea planti they Catholic, planti hundred thousand killim dae each other! (Lukim piksa long left saed.)
Waswe, Jesus bae go long war withim wanfela gun or bush naef long hand bilong hem and killim dae olketa disaepol bilong hem bikos they kam from different ples from hem? No moa nao! “Man wea love-im God,” Bible say hem, “mas love-im brata bilong hem tu.” (1 John 4:20, 21) Olketa religion bilong disfela world fail for duim diswan. “They talemaot long pablik they savvy long God, but olketa work bilong them show aot they denyim hem.”—Titus 1:16.
And tu, from they no really keepim olketa mark bilong Bible long saed bilong fashion, olketa religion bilong world share for mekem fashion bilong pipol kamap barava no gud tumas everywea long world.
Jesus hem say yu bae luksavvy long giaman religion and tru religion from ‘olketa fruit bilong hem’—samting wea olketa member bilong hem duim. Hem say tu: “Every tree wea no garem gudfela fruit bae they katem and throwim insaed long fire.” (Matthew 7:15-20) Word bilong God encouragim yumi for ranawe from religion wea garem badfela fruit and wea bae finis every bit.—Revelation 18:4.
Trufela Religion Hem No Fail
Trufela religion “garem gudfela fruit,” main wan nao love. (Matthew 7:17; John 13:34, 35) Wanem sekson wea they olketa Kristian brata, wea garem wan mind everywea long world nao showim aot love olsem? Hu nao olketa wea no killim dae otherfela insaed sem religion or any otherfela pipol?—1 John 3:10-12.
Pipol savvy olketa Jehovah’s Witness garem datkaen “gudfela fruit.” Everywea long world, long winim 230 kantri, ‘they hammerim finis sword bilong them for kamap samting for digim graon.’ (Isaiah 2:4) Love wea they garem for pipol hem show aot tu long way wea they obeyim komand bilong Kraest for preachim “gud nius” bilong Kingdom bilong God everywea long world. (Matthew 24:14) They live followim and mek hae long olketa haefela mark bilong fashion wea Bible teach abaotem.—1 Corinthians 6:9-11.
Trufela religion hem no fail. Hem leadim pipol go long only Wan wea fit for stretem olketa problem bilong man. Klosap nao dat Wan bae bringim kam wanfela niu world every bit. Hu nao dat Wan? (Please lukim back page.)
WANFELA PARADAES WEA FREE FROM TRABEL BAE KAMAP
Sapos yu fit, waswe, bae yu stretem every problem wea mekem man suffer? Yes, yu bae duim! Waswe, fitim yumi for ting say loving Creator bilong yumi, wea hem nomoa garem paoa and wisdom for stretem olketa problem bilong man, bae no duim diswan?
Bible show aot God bae duim samting long olketa man thru long gavman bilong hem wea stap long heven wea Jesus Kraest rulim. Hem bae “smasem” olketa no gud gavman wea stap long earth. (Daniel 2:44; Matthew 6:9, 10) And why nao olsem? Taem hem story long God, man for raetem psalm hem ansa: “For mekem pipol they savvy hao yu, wea nem bilong yu Jehovah, yu nomoa Most Hae ovarem whole earth.”—Psalm 83:18.
Taem disfela world hem finis, waswe, anywan bae stap laef? “World hem ready for finis,” Bible hem say, “but man wea duim will bilong God bae stap olawe.” (1 John 2:17) Olketa man wea laef bae stap long wea for olawe? Bible hem givim ansa: “Olketa wea raeteous bae stap long disfela earth, and olketa bae stap olawe long hem.”—Psalm 37:9-11, 29; Proverbs 2:21, 22.
Insaed long niu world bilong God, “dae bae no moa, sorry and fashion for krae and pain bae no moa tu.” (Revelation 21:4) Way for brekem law, poor, hangre, sik, sorry, and dae bae finis! Olketa wea dae finis tu bae laef back moa! “Wanfela resurrection bae kamap.” (Acts 24:15) And earth bae change and kamap wanfela really paradaes.—Isaiah 35:1, 2; Luke 23:43.
Wanem nao yumi mas duim for enjoyim laef insaed long niu world bilong God? Jesus hem say: “Diswan nao meanim laef olawe, for olketa mas kasem savvy long yu, only trufela God, and long dat wan wea yu sendem kam, Jesus Kraest.” (John 17:3) Planti million pipol wea garem honest heart everywea long world they go ahed for kasem datfela savvy. Diswan helpem them for deal withim planti problem wea kasem them distaem, but samting wea moa important, hem mekem them barava trustim hao olketa problem wea they no savvy stretem, bae God hem stretem insaed long niu world bilong Hem.
[Picture Credit Line on page 2]
WHO photo by P. Almasy
[Picture Credit Line on page 3]
Jerden Bouman/Sipa Press