Purpose bilong Disfela Brochure

WANFELA Dutch savvyman, Spinoza, hem raet olsem: “Mi trae for no laf long samting wea olketa man duim, no krae long them, no hate-im them, but for meanim them.” Olsem wanfela teacher, yu face-im challenge for trae for meanim tingting, living, and belief bilong olketa student wea stap long care bilong yu, and olketa student wea they pikinini bilong olketa Jehovah’s Witness tu. Samfela taem, olketa student hia bae no want for followim or duim samfela samting. But taem olketa samting olsem kamap from belief bilong student long saed bilong religion and fashion, yu need for savvy long diswan. Watch Tower Bible and Tract Society (pablising agency bilong olketa Jehovah’s Witness) hem workim disfela brochure and hem for helpem yu for meanim gud olketa Witness student. Mifela hope yu bae readim gud diswan.

For meanim belief bilong religion bilong narafela man hem no meanim yu mas acceptim or followim them, and for givim information hem no meanim for preach long yu. Disfela brochure hem no for pushim religion bilong olketa Witness long yu or long olketa student bilong yu. Mifela wantim nomoa for talem yu abaotem olketa principle and belief wea samfela dadi and mami they teachim long samfela student bilong yu, for helpem yu meanim and work withim olketa Witness pikinini. Hem tru, samting wea olketa pikinini learnim and samting wea they duim maet they no semsem everytaem, from each pikinini hem go ahed for learn for mekem grow conscience bilong hemseleva.

Olsem planti dadi and mami, olketa Jehovah’s Witness wantim pikinini bilong them for kasem gudfela samting from skul bilong them. Dastawe, they teachim olketa pikinini bilong them for work tugeta withim olketa teacher bilong them. Long narafela saed, olketa Witness dadi, mami and pikinini they hapi taem olketa teacher they meanim and respectim them.

Olketa Jehovah’s Witness they olketa Kristian wea pipol savvy long them everywea long world. But, samfela taem pipol no meanim them. So, mifela hope disfela brochure bae helpem yu for meanim gud olketa Witness pikinini wea stap long care bilong yu. But moa important, mifela hope yu bae savvy why nao, long samfela samting, they bae stap different.