Hao Olketa Jehovah’s Witness Tingim Education
Olsem every dadi and mami, olketa Jehovah’s Witness tingting strong abaotem future bilong olketa pikinini bilong them. So they ting long education olsem samting wea barava important. “Education mas helpem pipol for kamap gudfela member long ples wea they stap. Hem mas helpem them tu for meanim gud living bilong pipol bilong them bifor, and so garem living wea mekem them moa hapi.”
OLSEM disfela toktok from The World Book Encyclopedia hem talem, wanfela main goal bilong skul hem for trainim olketa pikinini for everyday living, insaed long diswan hem for mekem them fit for luk aftarem wanfela famili long future. Olketa Jehovah’s Witness believim diswan hem wanfela holy responsibility. Bible seleva hem say: “Tru nao sapos anywan no luk aftarem olketa wea bilong hem, and diswan hem moa tru long famili bilong hem, hem lusim Kristian faith and hem moa worse winim man wea no garem any faith.” (1 Timothy 5:8) Olketa year wea they go long skul hem readyim olketa pikinini for olketa responsibility wea they bae kasem long laef. From diswan, olketa Witness ting long education olsem samting wea barava important.
“Education mas helpem pipol for kamap gudfela member long ples wea they stap. Hem mas helpem them tu for meanim gud living bilong pipol bilong them bifor, and so garem living wea mekem them moa hapi.”—The World Book Encyclopedia
Olketa Witness trae hard for followim disfela Bible komand: “Nomata wanem yufela duim, duim withim whole heart bilong yufela, olsem yufela duim for Lord and no for olketa man.” (Colossians 3:23, Today’s English Version) Disfela principle hem fitim every part long living everyday, insaed diswan hem skul tu. So, olketa Witness encouragim olketa young wan bilong them for study gud and ting hae long olketa work wea they kasem long skul.
“Nomata wanem yufela duim, duim withim whole heart bilong yufela, olsem yufela duim for Lord.”—Colossians 3:23, Today’s English Version
Bible hem teachim them tu for stap under long olketa law bilong kantri wea they stap insaed. So taem law hem say they mas go long skul go kasem taem they kasem wanfela age, olketa Jehovah’s Witness obeyim datfela law.—Romans 13:1-7.
Gudfela way for relax, music, samting wea man interest for duim, exercise-im body, go long library and museum, they important part long education wea balance
Nomata Bible showim aot hao education hem important for trainim pikinini for everyday living, hem showim aot tu hao diswan hem no only and main goal bilong education. Gudfela education mas mekem grow insaed long olketa pikinini hapi bilong living and mas helpem them for balance gud withim otherfela pipol. So, olketa Jehovah’s Witness ting long otherfela activity aotsaed long classroom olsem important tu. They savvy hao gudfela way for relax, music, samting wea man interest for duim, exercise-im body, go long library and museum, and samfela samting moa, they important part bilong education wea balance. And tu, they teachim olketa pikinini bilong them for respectim pipol wea moa olo and for lukaotem chance for helpem them.
Waswe long Extra Education?
From planti niu samting kamap long saed bilong science, way for kasem work for shilling hem change everytaem. From diswan, planti young pipol mas work long olketa samting wea they nating kasem any training long hem bifor. From diswan, way bilong them for work and training wea themseleva kasem, and way wea they willing for change, bae barava important samting long them. Dastawe, hem gud for olketa student for kamap full-grown man wea garem, olsem savvyman Montaigne hem talem, ‘wanfela hed wea use-im savvy winim wanfela hed wea fulap withim savvy.’
Way for no garem work for shilling, wea affectim olketa rich and poor kantri, planti taem hem problem for olketa young pipol wea no garem savvy wea fitim work wea stap. So, sapos way for kasem work for shilling hem needim extra training winim samting wea fitim law, then hem responsibility bilong dadi and mami for guide-im olketa pikinini bilong them for decide for kasem extra education or no moa. They mas tingting raonem olketa gudfela samting wea savvy kamaot from diswan and olketa sakrifaes wea they mas duim taem they kasem extra training olsem.
But, maet yu agree hao way for win long laef hem meanim moa samting winim way for rich long material samting nomoa. Long fewfela year wea go past, olketa man and woman wea busy tumas long work bilong them for shilling, they lusim every samting taem kampani finisim them from work bilong them. Samfela dadi and mami they sakrifaesim famili laef bilong them and taem wea they fit for spendem withim olketa pikinini bilong them, and they misstim gudfela chance for helpem olketa pikinini for grow ap, from dadi and mami they busy tumas long work for shilling.
Tru nao, education wea balance hem meanim moa samting winim way for rich long material samting for mekem yumi barava hapi. Jesus Kraest say: “Olketa raetem finis: ‘Man hem no savvy laef long bred nomoa, but long every toktok wea kamaot from mouth bilong God.’” (Matthew 4:4, New International Version) Olsem olketa Kristian, olketa Jehovah’s Witness luksavvy hao hem important for mekem grow olketa spiritual fashion and for readyim themseleva for luk aftarem olketa samting wea they needim long material way tu.