Olketa Education Program

FROM they ting hae tumas long Bible education work bilong them, samfela pipol maet ting say they no interest long education bilong disfela world. But datwan hem no tru. For teachim otherfela pipol, teacher mas learn firstaem, and diswan meanim hem mas kasem proper training and instruction. So for join withim education bilong world wea they kasem, for planti year nao olketa Jehovah’s Witness they kasem gudfela samting from olketa different education program and skul wea Watch Tower Society they duim. Diswan helpem olketa Witness and otherfela pipol tu for kamap moabeta long mind, fashion, and spiritual way.

For example, long planti kantri olketa Witness face-im wanfela spesel challenge—hao for teachim pipol wea no savvy hao for read and raet from they skul lelebet nomoa or nating go long skul. For deal withim disfela need, Watch Tower Society hem organize-im samfela program for teachim pipol for read and raet.

For example, long Nigeria, they mekem skul for read and raet start kam long year 1949. Olketa skul hia helpem planti thousand pipol long Nigeria for learn for read. Wanfela survey show aot hao winim 90 percent bilong olketa Jehovah’s Witnesses long Nigeria savvy read and raet, but long datfela kantri, samting olsem 50 percent bilong population nomoa savvy read and raet. Long Mexico, olketa Jehovah’s Witness garem olketa class for read and raet start kam long 1946. Long wanfela year, they teachim winim 6,500 pipol for read and raet. Kam kasem distaem, they helpem winim 100,000 pipol for read and raet. Long olketa year wea go past, olketa class for read and raet they kamap long planti otherfela kantri tu, olsem Bolivia, Cameroon, Nepal, and Zambia. Olketa Jehovah’s Witness printim winim seven million copy bilong datfala buk Waka Hard for Read and Raet long winim 100 languis.

Olketa bigman bilong education long olketa kantri wea they duim olketa program olsem for read and raet they luksavvy long diswan. For example, long Mexico wanfela man bilong gavman hem raet olsem: “Mi ting hae long way wea yufela work withim mifela, and long saed bilong gavman, mi laek for givim bigfela congratulation for barava nambawan work wea yufela duim for helpem pipol for savvy hao for read and raet. . . . Mi hope yufela bae win long education work bilong yufela.”

Nara Training Moa

Bikos they ting long work for teachim Bible olsem barava important samting, olketa Jehovah’s Witness trae hard for kamap moabeta long way for meanim olketa Bible teaching long otherfela pipol. For example, insaed winim 119,000 kongregeson everywea long world, olketa student kasem training wea helpem olketa for read and tok long pablik. Olketa wea young tumas tu, taem they savvy hao for read, they savvy join and kasem disfela training, wea savvy helpem them long otherfela different way, olsem long skul bilong them tu. Planti teacher say olketa Witness student savvy talemaot tingting bilong them long barava gudfela way.

And tu, each kongregeson bilong olketa Jehovah’s Witness garem long Kingdom Hall bilong them, or ples wea they havem meeting, wanfela library wea garem olketa Bible study buk, dictionary, and otherfela reference buk. Everywan wea attendim olketa meeting long Kingdom Hall savvy use-im disfela library. Insaed long olketa kongregeson they encouragim way for read, and they encouragim each famili for garem wanfela famili library wea garem olketa different kaen buk for fitim samting wea olketa pikinini and full-grown pipol needim.

Extra Training

Watch Tower Society hem garem tu olketa skul for trainim olketa man and woman for kamap missionary, and hem garem olketa skul for trainim olketa man wea garem ministerial responsibility insaed long olketa kongregeson. Olketa skul hia show aot moa hao olketa Jehovah’s Witness they ting hae tumas long education.