Work bilong Dadi and Mami

U.S. NATIONAL Institute bilong Mental Health hem raetem result bilong wanfela survey wea they duim long olketa dadi and mami wea win—wea olketa pikinini bilong them winim 21 year they, “full-grown pipol wea work hard and wea luk olsem they stap gud midlwan long olketa pipol.” They askim olketa dadi and mami hia: ‘Long experience bilong yuseleva, wanem nao best advice wea yu savvy givim long otherfela dadi and mami?’ Planti long them ansa olsem: ‘Showim aot staka love long olketa pikinini bilong yu,’ ‘givim gudfela discipline,’ ‘spendem taem tugeta,’ ‘teachim pikinini bilong yu for luksavvy long samting wea stret and wea rong,’ ‘mekem grow way for respectim each other,’ ‘really listen long them,’ ‘offerim gudfela kaonsel winim way for toktok strong,’ and ‘luksavvy long really samting.’

But, no dadi and mami nomoa they insaed long way for mekem youngfela pipol kamap gudfela full-grown man. Olketa teacher tu garem important work long diswan. Wanfela savvyman wea savvy givim kaonsel long skul hem say: “Main goal bilong education hem for supportim dadi and mami for mekem olketa young pipol for grow gud long mind, body, and feeling.”

So dadi and mami and olketa teacher garem sem goal—for mekem olketa young wan grow ap for kamap full-grown pipol wea mature and balance and wea enjoyim laef, and savvy faendem ples wea fitim them midlwan long pipol wea they stap withim.

Work Tugeta, No Againstim Each Other

But, olketa problem savvy kamap taem dadi and mami fail for work tugeta withim olketa teacher. For example, samfela dadi and mami nating care long education bilong pikinini bilong them; samfela they trae for againstim olketa teacher. Wanfela magasin long France hem say olsem abaotem diswan: “No teacher nomoa hem luk aftarem education bilong pikinini. Dadi and mami, wea wantim tumas for pikinini bilong them for win, they lukluk insaed olketa skulbuk, judge-im and tok againstim way wea olketa teacher they teach, and feel no gud taem pikinini bilong them garem no gud mark.” Olketa samting olsem savvy spoelem paoa wea olketa teacher garem.

Olketa Jehovah’s Witness ting olketa pikinini bilong them bae kasem barava gudfela samting sapos dadi and mami work tugeta withim olketa teacher, showim aot barava interest long education bilong olketa pikinini bilong them. They savvy way for work tugeta olsem hem barava important, from work bilong yu olsem wanfela teacher hem kamap moa hard distaem.

Olketa Problem long Skul Distaem

From skul hem part long living bilong olketa man, olketa problem long living hem kasem olketa skul tu. Olketa problem long saed bilong fashion they kamap moa big long olketa year wea just go past. The New York Times hem story olsem abaotem samting wea happen insaed wanfela skul long United States: “Olketa student sleep long class, they tok no gud long each other insaed olketa skul building wea no gud raeting hem coverim olketa wall, they tok daonem olketa gudfela student. . . . Klosap every student they garem problem olsem way for luk aftarem baby, for deal withim dadi or mami wea stap long prison and deal withim olketa raf student. Long every skul day, klosap wanfela long every faevfela student they no kam skul.”

Samting wea barava no gud tumas hem problem bilong raf fashion wea kamap moa big long olketa skul everywea. Way for sutim man withim gun and busarem hem, hem change-im way for faet wea pipol hitim each other nomoa. Pipol use-im gun or naef planti taem, they attackim pipol long no gud way, and olketa pikinini they kwiktaem for duim raf fashion nomata they young nomoa.

Hem tru, no every kantri they face-im olketa barava no gud problem olsem. But, planti teacher everywea long world they face-im samting wea niuspepa long France, Le Point hem talem: “They no respectim teacher distaem; hem no garem any paoa distaem.”

Way olsem for no respectim olketa wea garem paoa hem mekem danger kamap for every pikinini. So olketa Jehovah’s Witness trae for putim insaed long pikinini bilong them fashion for obeyim and respectim olketa wea garem paoa, olketa fashion wea planti pikinini long skul distaem they no garem.