Leson 9
Olketa Servant Bilong God Mas Klin
Why nao iumi mas klin long evri samting? (1)
Wanem nao hem meanim for klin long spiritual way? (2)klin long fasin? (3) klin long mind? (4) klin long body? (5)
Iumi mas stap klia long wanem kaen toktok wea no klin? (6)
1. Jehovah God hem klin and holy. Hem talem olketa worshiper bilong hem for stap klin—long spiritual way, long fasin, mind, and body. (1 Peter 1:16) Iumi mas barava work hard for stap klin front long eye bilong God. Iumi stap long world wea no klin. Iumi mas faet againstim tu feeling bilong iumi seleva for duim rong samting. But iumi mas no givap.
2. Klin Long Spiritual Way: Sapos iumi want for servim Jehovah, iumi kanduit go ahed for followim eni teaching or kastom bilong giaman religion. Iumi mas lusim giaman religion and no supportim long eni way. (2 Corinthians 6:14-18; Revelation 18:4) Taem iumi learnim truth abaotem God, iumi mas careful for no letem pipol wea teachim giaman samting for giamanim iumi.—2 John 10, 11.
3. Klin Long Fasin: Jehovah laekem olketa worshiper bilong hem for showim aot fasin bilong trufala Kristian evritaem. (1 Peter 2:12) Hem lukim evri samting wea iumi duim, nomata taem iumi duim haed. (Hebrews 4:13) Iumi mas no duim dirty fasin and otherfala fasin wea no klin bilong disfala world.—1 Corinthians 6:9-11.
4. Klin Long Mind: Sapos iumi fulimap mind bilong iumi withim gudfala and klinfala tingting, fasin bilong iumi bae klin tu. (Philippians 4:8) But sapos iumi tingim evritaem olketa samting wea no klin, diswan bae leadim iumi for duim badfala samting. (Matthew 15:18-20) Iumi mas stap klia long olketa hapitaem wea savvy spoelem mind bilong iumi. Iumi savvy fulimap mind bilong iumi withim klinfala tingting taem iumi studyim Word bilong God.
5. Klin Long Body: From olketa stand for God, olketa Kristian mas keepim body and kaleko bilong olketa klin. Iumi mas wasim hand bihaen iumi go long toilet, and iumi mas wasim hand bifor iumi kaikai or holem kaikai. Sapos iumi no garem gudfala ples for toilet, iumi mas buryim siti bilong iumi long graon. (Deuteronomy 23:12, 13) Way for stap klin long body hem helpem man for stap healthy. Haos bilong wanfala Kristian mas stap gud and klin long insaed and aotsaed. Hem mas wanfala gudfala example for pipol lukim.
6. Toktok wea Klin: Olketa servant bilong God mas talem trufala samting evritaem. Pipol wea savvy liar bae no kasem Kingdom bilong God. (Ephesians 4:25; Revelation 21:8) Olketa Kristian no tok swear. Olketa no listen long or talem olketa joke or story abaotem dirty fasin. From toktok bilong olketa hem klin, olketa different from narafala pipol long work, skul, and long ples wea olketa stap.—Ephesians 4:29, 31; 5:3.
[Olketa piksa long page 18, 19]
Olketa servant bilong God mas klin long evri samting