Iu Need for Lane Abaotem God

For kamap fren bilong God, iu need for lane abaotem hem. Waswe, olketa fren bilong iu savve long nem bilong iu, and iusim? Yes. God laekem iu for savve and iusim nem bilong hem tu. Nem bilong God hem Jehovah. (Psalm 83:18; Matthew 6:⁠9) Iu mas lanem tu olketa samting wea hem laekem and no laekem. Iu need for savve hu nao olketa fren bilong hem and hu nao olketa enemy bilong hem. Man needim taem for savve long samwan. Bible sei hem wise for markem taem for lane abaotem Jehovah.—⁠Ephesians 5:​15, 16.

Olketa fren bilong God duim samting wea hem hapi long hem. Tingim olketa fren bilong iu. Sapos iu no treatim olketa gud and iu duim olketa samting wea olketa heitim, waswe, bae olketa go ahed for fren witim iu? Nomoa nao! Long sem wei tu, sapos iu want for kamap fren bilong God, iu need for duim samting wea hem hapi long hem.—⁠John 4:​24.

No evri religion lead go for fren witim God. Jesus, wea hem barava klos fren bilong God, hem story abaotem tufala road. Wanfala road hem waed and hem fulap witim pipol. Datfala road lead go for dae. Nara road hem smol and lelebet pipol nomoa gogo long hem. Datfala road lead go for laef olowe. Diswan minim hao sapos iu want for fren witim God, iu mas lanem stretfala wei for worshipim hem.—⁠Matthew 7:​13, 14.