Olketa Fren Bilong God Bae Stap Long Paradaes

Paradaes bae no olsem world wea iumi stap insaed distaem. No enitaem God laekem world for fulap witim trabol and sorre, pain and safa. Long future, God bae mekem earth for kamap wanfala paradaes. Paradaes bae olsem wanem? Letem iumi lukim wanem nao Bible hem talem:

Gudfala pipol. Paradaes nao bae hem hom bilong olketa fren bilong God. Olketa bae duim gud samting for narawan. Living bilong olketa bae followim olketa raeteous wei bilong God.—Proverbs 2:21.

Planti kaikai. Long Paradaes, no eniwan bae hangre. Bible hem sei: “Planti grain [or, kaikai] bae stap long earth.”—Psalm 72:16.

Gudfala haos and waka. Long datfala Paradaes earth, evri famili bae garem haos bilong olketa seleva. Evriwan bae duim waka wea mekem olketa barava hapi.—Isaiah 65:21-23.

Peace raonem world. Wei wea pipol faet and dae long war bae nomoa nao. Word bilong God hem sei: “[God] hem finisim olketa war.”—Psalm 46:8, 9.

Gudfala health. Bible hem promisim: “No eniwan [long Paradaes] bae sei: ‘Mi sik.’” (Isaiah 33:24) And tu, no eniwan bae polio or blind or earpas or no savve toktok.—Isaiah 35:5, 6.

End bilong pain, sorre, and dae. Word bilong God hem sei: “Dae bae nomoa, sorre and krae and pain bae nomoa tu. Evri samting bifor hem finis nao.”—Revelation 21:4.

Nogud pipol bae nomoa nao. Jehovah hem promisim: “Olketa wicked pipol . . . bae finis evribit from earth; and olketa wea giaman, olketa bae aot from earth.”—Proverbs 2:22.

Pipol bae lovem and respectim evriwan. Olketa fasin for no followim law, hardfala living, fasin for greedy, and heitim pipol bae nomoa nao. Pipol bae garem wan mind and bae garem living wea followim olketa raeteous wei bilong God.—Isaiah 26:9.