Welkam Long Theocratic Ministry Skul

LONG klosap 200 kantri raonem full earth, planti million student kasem gud samting evri week from Theocratic Ministry Skul education. Samfala olketa niu. Olketa narawan bin attendim disfala skul for planti year finis. Disfala skul hem go ahed long planti thousand difren ples. Nomata wea nao iu stap long earth, iu savve kasem disfala education program. Pipol bilong evri age, tribe, and education kasem disfala theocratic education wea hem free.

Taem skul hem start long olketa kongregeson bilong Olketa Jehovah’s Witness long 1943, olketa talem purpose bilong hem witim disfala toktok: “For redyim evri ‘faithful man,’ olketa wea herem Word bilong God and pruvim olketa garem faith long hem, for kamap ‘fit for teachim narawan’ . . . witim goal for mekem each wan . . . garem savve for talemaot long pablik datfala hope wea stap insaed long hem.” (Course in Theocratic Ministry, p. 4) Goal bilong disfala skul hem semsem kam kasem distaem.

Wanem nao best samting eniwan long iumi savve duim witim wei for toktok wea God givim long iumi? Bible hem ansa: “Evri samting wea laef—letem hem praisem Jah.” (Ps. 150:6) Taem iumi duim olsem, iumi mekem heart bilong Dadi bilong iumi long heven hem hapi. Iumi pruvim long hem hao heart bilong iumi hem tinghae long gudfala fasin and love bilong hem. Iumi no sapraes hao olketa Christian evritaem kasem encouragement for “givim wanfala sakrifaes bilong praise long God, hem nao, frut bilong mouth wea talemaot nem bilong hem long pablik”! (Heb. 13:15) Witim goal for helpem iu kamap moabeta for iusim savve wea God givim long iu for praisem Jehovah, mifala welkamim iu olsem wanfala student insaed long Theocratic Ministry Skul.

Nomata skul hem planti taem deal witim hao for read long pablik and hao for toktok and teach gud, man bae kasem staka nara gudfala samting from Theocratic Ministry Skul education. Taem iu tekpart, bae iu kasem help for mekem grow olketa difren kaen savve wea important olsem, hao for duim reading seleva, lisin and rememberim samting, duim study, duim research, ting raonem and organizem samting, story witim narawan, ansarem olketa kwestin, and raetem olketa idea. Bible and olketa Bible pablikeson bae provaedem faondeson for study and olketa koment and tok insaed long skul. Taem iu fulimap mind bilong iu witim olketa nambawan truth wea insaed long Word bilong God, iu bae lane for garem tingting bilong God. Datwan bae bigfala help long evri part bilong laef! Taem hem storyim wei wea Word bilong God hem important tumas, man for givim education long mek-20 century, William Lyon Phelps hem raet: “Iumi fit for kolem evriwan wea garem bigfala savve abaotem Bible, olketa wea garem education. . . . Mi bilivim hao, for garem savve abaotem Bible and no wanfala college course hem moa important winim wei for garem college course bat no garem Bible.”

Hao for Kasem Gudfala Samting Evribit

Hem tru, for kasem gudfala samting evribit from Theocratic Ministry Skul education, iuseleva olsem student mas trae hard. Aposol Paul barava encouragem Christian fren bilong hem Timothy: “Ting raonem evri samting hia; tingting strong long olketa, mekem wei wea iu muv ahed savve showaot klia long evriwan.” (1 Tim. 4:15) Wanem nao olketa gudfala wei wea iu savve trae hard long hem?

Traem best bilong iu for attendim Theocratic Ministry Skul evri week. Iusim long wisefala wei disfala buk, Kasem Gud Samting From Theocratic Ministry Skul Education. Raetem nem bilong iu long spes wea olketa putim long firstfala page. Evritaem iu attendim disfala skul, tekem kam buk hia. Disfala buk hem wanfala buk for iu raet insaed long hem tu. Taem iu readim olketa important point wea savve helpem iu insaed long buk hia, andalaenem olketa. Iusim bigfala spes long each saed bilong olketa page for raetem daon olketa gudfala point wea iu lanem long skul.

Each year, iu bae kasem wanfala copy bilong program for followim long Theocratic Ministry Skul. Disfala schedule bae garem tu information long hao olketa bae conductim skul. Iu savve keepim schedule hia insaed long disfala buk for mekem iu isi for faendem.

Taem iu preparem session bilong each week, no forgetim wei wea Bible nao main buk wea iumi iusim. Mek sure iu readim olketa part bilong Bible wea schedule markem for datfala week. Sapos iu savve readim firstaem information bilong olketa difren part bilong program, diswan bae barava helpem iu tu.

Taem skul hem go ahed, evriwan bae garem olketa chance for talem koment. Iusim evribit olketa chance hia. For tekpart olsem hem wanfala important part bilong wei for rememberim wanem nao iu herem and for iu savve fit for iusim diswan long laef bilong iu.

Evri student bae garem olketa chance for givim olketa tok or demonstration front long kongregeson. Mekius long each wan long olketa chance hia. Barava trae hard for kamap moabeta long point for toktok wea olketa assignim long iu. Goal bilong kaonsel wea iu bae kasem hem for helpem iu go ahed for kamap moabeta. Acceptim disfala help witim hapi. Insaed long buk bilong iu, raetem daon olketa idea long wanem iu savve duim for helpem iu for kamap moabeta. From hem hard for wanfala man for lukim hemseleva long sem wei wea olketa narawan lukim hem, olketa loving kaonsel and idea wea skul provaedem wea garem faondeson long Bible savve barava helpem iumi for muv ahed. Diswan hem tru nomata sapos iu insaed long skul for planti year finis.—Prov. 1:5.

Waswe, bae iu laek for muv ahed kwiktaem? Iu savve duim olsem sapos iuseleva trae hard. Studyim firstaem information for evri student tok. Sapos olketa needim wanfala volunteer speaker, iu bae fit for volunteer, and datwan bae givim iu moa experience. Taem narawan givim tok, lisin gud long hao hem iusim datfala information. Iumi lane from each other.

Sapos iu fit for duim, iu savve muv ahed long wei wea moa fast taem iuseleva nao go ahed for studyim full buk. Bihaen iu lane gud insaed long next 15-fala study, go ahed witim study bilong iu insaed long “Program for Mekem Grow Savve Olsem Speaker and Teacher,” wea start long page 78. Firstaem, studyim each leson, and duim olketa exercise wea join witim each wan. Iusim samting wea iu lanem long ministry bilong iu. Diswan savve barava helpem wei wea iu muv ahed olsem wanfala speaker and man wea teachim Word bilong God.

Theocratic Ministry Skul education bilong iu bae help for redyim iu for olketa samting wea moa important long laef. From iumi stap laef bikos long will bilong God, wei wea iumi praisem hem, minim iumi luksavve hao diswan nao reason why iumi laef. Jehovah God hem fit for kasem best praise wea man savve givim. (Rev. 4:11) Education wea iumi kasem insaed long disfala skul hem helpem iumi for duim diswan, mekem iumi savve garem kliafala tingting, duim samting long wisefala wei, and talemaot long gudfala wei olketa nambawan truth insaed long Word bilong God.