Showimaot Feeling

FEELING hem wanfala barava important part long laef bilong olketa man. Taem wanfala man talemaot feeling bilong hem, hem showimaot wanem nao stap long heart bilong hem, hem wanem kaen man, wei wea hem feel abaotem pipol and samting wea happen. From olketa experiencem hard samting long laef—or from kastom bilong olketa—planti pipol haedem feeling bilong olketa. Bat Jehovah encouragem iumi for mekem grow gudfala fasin and then showimaot long wei wea fitim.—Rom. 12:10; 1 Thess. 2:7, 8.

Taem iumi story, olketa word wea iumi iusim maet talemaot feeling long stretfala wei. Bat sapos iumi no talemaot olketa word witim feeling wea fitim, olketa wea lisin maet daotem trufala fasin bilong iumi. Long narasaed, sapos iumi talem olketa word witim feeling wea fitim, toktok bilong iumi savve here naes tumas and maet kasem heart bilong olketa wea lisin.

Showimaot Feeling. Planti taem olketa feeling join witim wei wea iumi ting abaotem pipol. So, taem iumi tok abaotem olketa fasin bilong Jehovah wea iumi laekem tumas, and taem iumi talemaot thankiu for gudfala fasin bilong hem, voice bilong iumi mas garem feeling. (Isa. 63:7-9) And taem iumi story long narafala pipol, wei bilong iumi for toktok shud showimaot naesfala feeling tu.

Wanfala man wea garem leprosy hem kam long Jesus and begim hem for healim hem. Tingim saond bilong voice bilong Jesus taem hem sei: “Mi wantem. Kamap klin.” (Mark 1:40, 41) Tingim tu taem datfala woman wea garem sik wea blood ran olowe for 12-fala year hem kam bihaen long Jesus long kwaet wei and tasim end long kaleko bilong hem. Taem hem luksavve olketa lukim hem, datfala woman hem seksek and kam long front, hem foldaon long leg bilong Jesus and talemaot front long evriwan why nao hem tasim kaleko bilong Jesus and hao hem kasem healing. Tingim wei wea Jesus sei long hem: “Dota, faith bilong iu nao mekem iu gud bak moa; go long peace.” (Luke 8:42b-48) Kam kasem distaem, feeling wea Jesus showimaot long olketa taem hia tasim heart bilong iumi tu.

Taem iumi feel sorre long pipol and barava want for helpem olketa, olsem Jesus duim, datfala feeling hem showaot long wei wea iumi story long olketa. Kaen wei for toktok witim feeling olsem hem tru wan, no ova tumas. Feeling wea iumi showimaot savve barava affectim wanem pipol duim. Klosap evri samting wea iumi storyim long field ministry givim iumi chance for showimaot kaen feeling olsem, especially taem iumi pruvim samting, or feel sorre or encouragem man.

Sapos iu garem feeling for narafala pipol, showimaot long feis bilong iu. Taem iu showimaot feeling, audience bae feel olsem iu interest long olketa. Sapos feeling no showaot long feis bilong iu, audience bilong iu maet tingse iu no really kea long olketa. Iu no savve werem feeling olsem wanfala mask wea kavarem feis—feeling bilong iu mas tru wan.

Feeling shud showaot long voice bilong iu tu. Sapos voice bilong iu saond raf, maet hem hard for iu showimaot feeling taem iu tok. Bat sapos iu trae hard, gogo, iu savve duim. Wanfala samting wea maet helpem iu hem for tingim hao wei for katem saond mekem toktok no garem feeling. Lane for talemaot olketa part bilong word wea garem naesfala saond. Diswan bae helpem toktok bilong iu for garem moa feeling.

Bat samting wea moa important hem wanem nao iu tingim. Sapos iu tingim olketa wea iu story witim and iu barava want for helpem olketa, datfala feeling bae showaot long wei wea iu toktok.

Tok wea garem laef and wea interesting savve muvim audience, bat iu need for showimaot kaenfala feeling tu. Hem no inaf for muvim tingting nomoa, iumi mas muvim heart tu.

Showimaot Samfala Difren Kaen Feeling. Story bilong man wea kasem trabol maet showimaot olketa feeling olsem wari, fraet, and sorre. Hapi hem wanfala feeling wea shud showaot evritaem long laef bilong iumi and wea showaot taem iumi story long nara pipol. Long narasaed, iumi mas kontrolem samfala nara feeling. Olketa feeling wea no fitim Christian fasin. (Eph. 4:31, 32; Phil. 4:4) Evri difren kaen feeling savve showaot thru long olketa word iumi chusim, saond bilong voice, strong taem iumi toktok, lukluk bilong feis, and olketa akson.

Bible storyim evri difren kaen feeling bilong man. Samfala taem hem nemem olketa feeling. Long narataem, hem storyim samting wea happen or talem wanfala toktok wea showimaot olketa feeling. Taem iu readim big kaen information olsem, bae hem affectim iu and olketa wea lisin long bigfala wei moa sapos voice bilong iu showimaot olketa feeling hia. For duim datwan iu need for tingim olsem iu nao datfala man wea iu read abaotem. Bat, wanfala tok hem no wanfala show, so mas careful for no ova tumas. Read long wei wea mekem audience feel olsem olketa barava insaed long samting iu read abaotem.

Fitim Datfala Information. Olsem wei for strong for showimaot interest, feeling wea iu talemaot hem depend long bigfala wei long wanem iu talem.

Openem Bible long Matthew 11:28-30 and lukluk gud long wanem hem talem. Then readim wei wea Jesus tok againstim olketa scribe and Pharisee long Matthew chapter 23. Hem hard for tingim Jesus no showimaot strongfala feeling taem hem talemaot toktok hia.

Wanem kaen feeling nao iu tingse hem fitim for showimaot taem man readim story olsem Genesis chapter 44 abaotem strongfala wei wea Judah hem ask for brata bilong hem Benjamin? Lukim feeling wea showaot long verse 13, samting wea verse 16 showimaot abaotem feeling bilong Judah abaotem reason for datfala bigfala trabol, and wanem Joseph seleva duim olsem Genesis 45:1 storyim.

So, nomata iumi readim samting or iumi toktok, for duim long gudfala wei iumi mas tingim no olketa word and idea nomoa, bat tu olketa feeling wea mas join witim datwan.