Strong for Showimaot Interest

WEI for showimaot interest hem help for mekem tok garem laef. Nomata hem important for garem interesting information, for givim long wei wea showimaot feeling and interest bae help for kasholem interest bilong audience. Nomata wanem kaen living or fasin iu garem, iu savve mekem grow wei for showimaot interest.

Toktok Long Wei wea Showimaot Feeling. Taem hem story long wanfala woman bilong Samaria, Jesus talem hao olketa wea worshipim Jehovah mas worship “witim spirit and truth.” (John 4:24) Worship bilong olketa mas kam from heart wea tinghae, and hem mas long wei wea wan mind witim truth insaed Word bilong God. Taem man hem barava tinghae olsem, diswan bae showaot long wei wea hem toktok. Hem bae barava want for talem nara pipol abaotem olketa loving samting wea Jehovah provaedem. Feis, akson, and voice bilong hem bae barava showimaot wei wea hem feel abaotem datwan.

Sapos olsem, why nao wanfala speaker wea lovem Jehovah and bilivim samting wea hem talem maet no strong for showimaot interest taem hem givim tok? Diswan needim moa samting winim wei for redyim information wea hem bae talem nomoa. Hem mas barava interest and feel strong abaotem subject bilong hem. Tingim sapos hem kasem assignment for tok abaotem ransom sakrifaes bilong Jesus Christ. Taem datfala speaker givim tok bilong hem, mind bilong hem mas fulap, no long evri smol point nomoa, bat long feeling for tinghae long samting wea sakrifaes bilong Jesus savve duim for hem and audience bilong hem tu. Hem mas tingim feeling bilong hem for thankiu long Jehovah God and Christ Jesus for disfala nambawan samting wea tufala provaedem. Hem mas tingim barava nambawan hope bilong laef wea diswan givim for olketa man—hapi for olowe long perfect health long wanfala earth wea kamap paradaes moa! So, diswan mas affectim heart bilong hem.

Bible talem hao datfala scribe Ezra, wanfala teacher long Israel, ‘redyim heart bilong hem for lukluk long law bilong Jehovah and for duim and for teach long Israel.’ (Ezra 7:10) Sapos iumi duim olsem—no preparem information nomoa, bat heart bilong iumi tu—bae iumi tok from heart. Wei for talem truth from heart olsem savve barava helpem olketa wea lisin long iumi for mekem grow really love for truth.

Tingim Audience Bilong Iu. Narafala important wei for showimaot strong interest hem for biliv strong hao audience need for herem samting wea iu laek talem. Diswan minim taem iu preparem tok, iu mas no hipimap gudfala information nomoa, bat mas prea long Jehovah tu for helpem iu for iusim diswan for mekem audience kasem gud samting. (Ps. 32:8; Matt. 7:7, 8) Ting raonem why nao audience need for herem datfala information, gud samting wea olketa bae kasem from datwan, and hao nao iu savve givim long wei wea olketa bae tinghae long hem.

Waka long datfala information go kasem taem iu garem samting wea iu barava feel hapi long hem. Hem no minim datwan mas niu information, bat iu savve deal witim datfala subject long wei wea difren and interesting. Sapos iu preparem samting wea bae barava helpem audience for strongim wei wea olketa fren witim Jehovah, for tinghae long samting hem provaedem, for winim olketa hevi long living insaed disfala old system, or duim ministry long gudfala wei, then iu garem planti reason for strong for showimaot interest long tok bilong iu.

Waswe sapos iu kasem assignment for read long pablik? For read witim strong for showimaot interest, hem no inaf for talem and joinim olketa word long stretfala wei. Studyim datfala information. Sapos iu bae readim part long Bible, duim samfala research long datwan. Mek sure iu minim. Ting raonem gud samting wea iu and audience savve kasem from datwan, and readim long wei wea helpem audience for kasem datwan.

Waswe sapos iu prepare for field ministry? Reviewim subject wei iu bae storyim and olketa scripture wea iu plan for iusim. Tingim tu, wanem nao pipol ting abaotem distaem. Wanem nao olketa bin readim and herem long nius? Wanem nao olketa problem wea pipol feisim? Taem iu fit for showim pipol hao Word bilong God garem ansa long olketa problem hia, iu feel barava willing for duim diswan and iu bae story witim strong for showimaot interest.

Showimaot Interest Thru Long Tok wea Garem Laef. Barava klia wei for showimaot interest hem for givim tok long wei wea garem laef. Diswan shud showaot long feis bilong iu. Iu mas saond olsem iu barava biliv, no forcem idea bilong iu.

Diswan needim balance. Samfala maet want for strong for showimaot interest long evri point. Olketa maet needim help for luksavve hao taem man hem ova tumas long wei bilong hem or feeling wea hem showimaot, audience bae tingim hem nomoa and no datfala message. Long narasaed, olketa wea garem feeling for shame needim encouragement for showimaot moa feeling.

Sapos iu strong for showimaot interest hem bae mekem narawan feel olsem tu. Sapos iu lukluk long audience and iu showimaot interest long tok bilong iu, audience bae feelim diswan tu. Apollos showimaot feeling taem hem story, and Bible storyim hem olsem man wea savve tumas for toktok. Sapos iu shaen witim spirit bilong God, tok bilong iu wea garem laef bae muvim olketa wea lisin for duim samting.—Acts 18:24, 25; Rom. 12:11.

Strong for Showimaot Interest wea Fitim Information. Careful for no mekem audience taed tumas from iu ova tumas long wei wea iu showimaot interest long full tok bilong iu. Nomata eni encouragement wea iu givim for olketa followim samting wea iu talem, olketa bae missim datwan. Diswan strongim moa need for redyim kaen information wea letem iu givim long wei wea mekem audience interest. Trae for no givim tok long wei wea luk olsem iu no interest. Sapos iu careful for chusim information bilong iu, iu bae barava interest long hem. Bat for samfala point speaker bae need for showimaot moa interest winim olketa narawan, and iu shud tingting gud long wea nao insaed long tok for putim olketa point hia.

Hem barava important for storyim olketa main point witim strong for showimaot interest. Tok bilong iu mas garem olketa main point wea each sekson bilong tok lead go long hem. From olketa nao haefala part long tok, olketa nao olketa point wea bae muvim audience. Then, from audience barava sure long samting wea iu talem, iu need for muvim olketa, showimaot hao samting wea iu talem bae helpem olketa sapos olketa live followim. Wei wea iu strong for showimaot interest bae helpem iu for kasem heart bilong olketa wea lisin long iu. Iu kanduit forcem wei for showimaot interest. Iu mas garem reason for duim, and information bilong iu nao bae givim iu datfala reason.