Wei for Obey Sevem Laef Bilong Olketa

JESUS CHRIST talem warning firstaem hao system bilong olketa Jew, wea main samting insaed diswan hem temple long Jerusalem, bae finis. Hem no talem day wea diswan bae happen. Bat hem talem olketa samting wea bae lead go long datfala wei for distroe. Hem tok strong long olketa disaepol bilong hem for gohed for luk aot and no stap long ples wea danger.

Jesus tok olsem: “Taem iufala lukim olketa army camp raonem Jerusalem, then iufala mas savve end bilong hem klosap for kam nao.” Hem sei tu: “Taem iufala lukim datfala barava rabis samting wea savve spoelem samting evribit . . . hem standap long wanfala holy ples, . . . then olketa long Judea mas start for ranawe go long olketa maunten.” Jesus tok strong long olketa disaepol for no go bak and trae for sevem olketa material samting bilong olketa. Olketa mas ranawe kwiktaem sapos olketa laek for sevem laef bilong olketa.—Luke 21:20, 21; Matthew 24:15, 16.

For stopem wei wea olketa Jew againstim gavman for longfala taem, Cestius Gallus leadim army bilong Rome go long Jerusalem long 66 C.E. Hem barava go insaed datfala taon and raonem datfala temple. Evriwea insaed datfala taon pipol fraet and konfius. Olketa wea gohed for luk aot luksavve hao bigfala trabol bae start nao. Bat waswe, eni chance stap for ranawe? Seknomoa, Cestius Gallus and army bilong hem go bak. Olketa Jew wea faet againstim olketa go aftarem olketa. Chance kamap nao for ranawe from Jerusalem and area bilong Judea!

Long year 67 C.E., army bilong Rome kam bak moa anda long komand bilong Vespasian and son bilong hem Titus. Full kantri insaed war long datfala taem. Long start bilong 70 C.E., olketa bilong Rome buildim wanfala wall witim olketa bigfala sharp stik raonem full Jerusalem. No eni wei for ranawe nao. (Luke 19:43, 44) Olketa sekson insaed datfala taon killim dae each other. Bihaen, olketa bilong Rome killim dae or tekem olsem prisoner eniwan wea laef yet. Datfala taon and datfala temple distroe evribit. Josephus, man for raetem history bilong olketa Jew long first century, hem sei winim wan million Jew safa and dae long datfala taem. Olketa no buildim moa datfala temple kam kasem distaem.

Sapos olketa Christian stap yet insaed Jerusalem long 70 C.E., olketa bae dae or kamap olketa slave olsem evri narawan wea stap insaed datfala taon. Bat, olketa man for raetem history bifor talem hao olketa Christian obeyim warning bilong God and olketa ranawe from Jerusalem and area bilong Judea and olketa go long olketa maunten long east saed bilong Jordan River. Samfala go stap long Pella, long province bilong Perea. Olketa lusim Judea and olketa no go bak. From olketa obeyim warning bilong Jesus diswan sevem laef bilong olketa.

Waswe, Iu Ting Strong Long Olketa Warning From Olketa wea Iu Fit for Trustim?

Bihaen olketa herem planti warning bat no lukim eniting happen, planti pipol no ting hevi long evri warning wea olketa herem. Bat, wei for ting strong long olketa warning maet sevem laef bilong iu.

Long China long 1975, warning abaotem wanfala earthquake kamap. Olketa bigman kwiktaem duim samting. Pipol obeyim olketa. From diswan planti thousand pipol no dae.

Long April 1991 long Philippines, pipol long olketa vilij saed long Mount Pinatubo lukim smoke and asis kamaot from maunten. Bihaen olketa lukluk long datwan for tufala month, Philippine Institute of Volcanology and Seismology talem warning hao danger hem klosap tumas. Kwiktaem nomoa, olketa aotem planti thousand pipol from datfala area. Early long June 15, hem bosta big and winim eit cubic kilometer bilong datfala maunten flae go ap long skae and foldaon antap long datfala area. Wei wea olketa obeyim warning sevem laef bilong planti thousand pipol.

Bible talem warning abaotem end bilong disfala world wea stap distaem. Iumi distaem stap insaed olketa last day. Taem end hia kakam klosap, waswe, iu gohed for luk aot? Waswe, iu duim eni samting for stap klia from area wea danger? Waswe, iu garem feeling for hariap taem iu warnim olketa narawan for duim sem samting?

[Piksa long page 20]

Wei for obeyim olketa warning sevem laef bilong planti pipol taem Mount Pinatubo hem bosta

[Piksa long page 21]

Olketa Christian wea obeyim warning bilong Jesus no dae taem Jerusalem hem distroe long 70 C.E.