LESON 10
Hao Nao Bae Iu Luksavve Long Tru Religion?
1. Waswe, wanfala religion nomoa hem tru?
“Keakea long olketa laea profet.”—MATTHEW 7:15.
Wanem Jesus teachim long olketa disaepol showimaot wanfala religion nomoa hem tru. Hem olsem wanfala road wea pipol savve followim for kasem laef olowe. Jesus sei “samfala pipol nomoa faendem” datfala road. (Matthew 7:14) God hem hapi long worship wea followim nomoa wanem Bible talem. Olketa wea worshipim God long stretfala wei olketa garem wan mind bikos olketa bilivim sem samting.—Readim John 4:23, 24; 14:6; Ephesus 4:4, 5.
Watchim disfala video Waswe, God Acceptim Evri Difren Kaen Wei for Worship?
2. Wanem warning nao Jesus talem for olketa tru Christian?
“Olketa sei olketa savve long God, bat samting wea olketa duim showimaot olketa nating savve long hem.”—TITUS 1:16.
Jesus hem sei olketa laea profet bae spoelem tru religion. Olketa laea profet hia bae luk olsem olketa tru Christian and sei olketa Christian tu. Hao nao bae iu luksavve sapos olketa hia tru Christian or nomoa? Wei bilong olketa and wanem olketa duim nao bae showimaot datwan.—Readim Matthew 7:13-23.
3. Hao nao bae iu luksavve long olketa tru Christian?
Tingim faevfala samting hia:
Olketa tru Christian bilivim Bible hem kam from God. Olketa traem best for followim wanem Bible talem. So tru religion hem difren from religion wea followim tingting bilong man. (Matthew 15:7-9) Olketa tru Christian no duim samting wea difren from wanem olketa teachim.—Readim John 17:17; 2 Timothy 3:16, 17.
Olketa tru follower bilong Jesus mekhae long nem bilong God, Jehovah. Jesus mekhae long nem bilong God taem hem teachim pipol for savve long datfala nem. Hem helpem pipol for savve long God and teachim olketa for prea for nem bilong God for holy. (Matthew 6:9) Long ples wea iu stap, wanem religion nao teachim pipol for savve long nem bilong God?—Readim John 17:26; Rome 10:13, 14.
Olketa tru Christian preach abaotem Kingdom bilong God. God sendem Jesus kam long earth for talemaot gud nius abaotem Kingdom bilong God. Datfala Kingdom nomoa bae stretem evri problem bilong olketa man. Jesus gohed for story abaotem datfala Kingdom go kasem taem hem dae. (Luke 4:43; 8:1; 23:42, 43) Hem sei olketa follower bilong hem bae preach abaotem datfala Kingdom. Olketa bilong wanem religion nao go from haos tu haos for preach long pipol abaotem Kingdom bilong God?—Readim Matthew 24:14.
Olketa tru follower bilong Jesus no olsem pipol long world. Iu bae luksavve long olketa bikos olketa no joinim politik or teksaed long olketa raoa bilong pipol. (John 17:16; 18:36) And tu, olketa no followim nogud wei bilong pipol long world.—Readim James 4:4.
Olketa tru Christian lovem olketa evriwan. Wanem olketa lanem from Bible helpem olketa for respectim evri difren kaen pipol. Nomata olketa false religion strong for sapotim war, olketa tru Christian no duim datwan. (Micah 4:1-3) Bat olketa tru Christian iusim taem and wanem olketa garem for helpem and encouragem olketa narawan.—Readim John 13:34, 35; 1 John 4:20.
4. Which religion nao iu tingse hem tru wan?
Long tingting bilong iu, which religion nao teachim wanem Bible talem, mekhae long nem bilong God, and talemaot Kingdom bilong God nomoa savve stretem evri problem bilong olketa man? Olketa pipol long which religion nao showimaot love and no sapotim war?—Readim 1 John 3:10-12.