Introduction
“Followim example bilong olketa wea kasem samting wea God promisim bikos olketa garem faith and olketa patient.”—HEBREW 6:12.
1, 2. Hao nao wanfala traveling overseer ting lo olketa Bible character wea faithful, and why nao bae hem naes for kamap fren blo olketa?
BIHAEN wanfala sista lisin lo tok blo wanfala olo traveling overseer, hem sei: “Hem storyim olketa Bible character hia olsem hem storyim olketa old fren blo hem.” Datfala brata spendem staka year for studyim toktok blo God and teachim datwan. Gogo, olketa man and woman lo Bible wea garem faith, olketa kamap olsem olketa old fren blo hem wea hem savve gud lo olketa for full laef blo hem.
2 Hem bae naes tumas for olketa Bible character kamap olketa fren blo iumi. Hao, olketa real lo iu? Imaginim if iu wakabaot and story witim olketa, for spendem taem for savve gud lo olketa faithful wan olsem Noah, Abraham, Ruth, Elijah, and Esther. Tingim hao olketa bae helpem iu for kasem gud samting lo laef blo iu, olketa savve givim naes advaes and encouragement!—Readim Proverbs 13:20.
3. (a) Hao nao iumi savve kasem gud samting from wei for lane abaotem olketa man and woman lo Bible wea garem faith? (b) Olketa wanem kwestin nao bae iumi storyim?
3 Lo taem wea ‘pipol wea raeteous bae laef bak,’ bae iumi savve meetim olketa and iumi garem chance for fren gud tugeta. (Acts 24:15) Nomata olsem, distaem tu iumi savve kasem gud samting from wei for lane abaotem olketa man and woman lo Bible wea garem faith. Hao nao iumi savve for duim datwan? Aposol Paul sei: “Followim example bilong olketa wea kasem samting wea God promisim bikos olketa garem faith and olketa patient.” (Heb. 6:12) Bifor iumi studyim example blo olketa man and woman wea garem faith, bae iumi storyim samfala kwestin wea kamap taem iumi readim wanem Paul hem talem. Olketa kwestin hia nao: Wat nao faith, and why nao iumi needim datwan? Hao nao iumi savve followim example blo olketa faithful wan bifor?
Wat Nao Faith, and Why Nao Iumi Needim?
4. Wat kaen tingting nao pipol garem abaotem faith, and why nao datwan hem no stret?
4 Faith hem wanfala naes fasin, wea olketa man and woman wea bae iumi study abaotem lo disfala pablikeson olketa barava tinghae lo hem. Staka pipol distaem no tinghae lo faith, olketa tingse for garem faith, hem minim iu bilivim samting bat iu no garem pruv lo datwan. Bat, datwan hem no stret. Faith no minim wei for bilivim nomoa eni samting, hem no just wanfala feeling, and hem winim wei for biliv. For bilivim nomoa eni samting hem danger tumas. Olketa feeling savve change enitaem, and wei for just biliv nomoa lo God, hem no inaf bikos even “olketa demon tu bilivim datwan and olketa fraet fogud.”—Jas. 2:19.
5, 6. (a) Wanem tufala samting wea iumi no lukim nao iumi garem faith lo hem? (b) Hao strong nao faondeson blo faith blo iumi? Storyim example.
5 Tru faith hem strong winim wei for just bilivim nomoa eni samting. Lukim hao Bible explainim datwan. (Readim Hebrew 11:1.) Paul sei faith hem focus lo tufala samting wea iumi no savve lukim. First samting, faith hem focus lo olketa samting wea really stap distaem bat iumi “no savve lukim.” Eye blo iumi no savve lukim olketa samting wea stap lo heven olsem Jehovah God, Son blo hem, or Kingdom blo hem wea rul lo heven distaem. Mek-tu samting, faith hem focus lo olketa samting wea iumi “hope long hem,” wea no happen yet. Distaem iumi no savve lukim yet datfala niu world wea Kingdom blo God klosap for mekem kamap. So waswe, datwan minim faith blo iumi lo olketa samting hia wea iumi no lukim and iumi hope lo hem, no garem eni pruv?
6 Barava nomoa nao! Paul explainim dat tru faith hem garem strongfala faondeson. Taem Paul sei faith hem wei for ‘sure samting wea iumi hope for hem bae kamap tru,’ hem iusim wanfala toktok wea savve minim “title blo land.” Tingim, sapos samwan disaed for givim iu wanfala haos, hem maet givim iu title blo datfala land and sei: “Diswan nao niu ples blo iu.” Hem no minim bae iu stap lo datfala pis pepa, bat datfala document hem strongfala pruv dat iu ownim datfala haos, nomata iu no stap insaed yet. Lo sem wei tu, faith hem garem strongfala pruv wea mekem iumi sure dat evri promis blo God wea stap lo Bible bae kamap tru.
7. Tru faith hem join witim wanem?
7 So, tru faith hem join witim wei for barava bilivim and garem strong pruv, wea mekem iumi trustim evri samting wea Jehovah talem bae kamap tru. Faith nao mekem iumi luksavve Jehovah hem Dadi wea lovem iumi and iumi sure olketa samting wea hem promisim bae kamap tru. Bat samfala samting moa hem join witim tru faith. Faith hem olsem samting wea laef, wea needim kaikai for hem gohed laef. Faith mas showaot lo wat man hem duim, sapos nomoa bae hem dae.—Jas. 2:26.
8. Why nao faith hem barava important?
8 Why nao faith hem barava important? Paul givim wanfala interesting ansa. (Readim Hebrew 11:6.) Hem hard for iumi worshipim Jehovah or for mekem hem hapi sapos iumi no garem faith. So faith hem barava important bikos if iumi no garem datwan, hard for iumi fren gud witim Dadi blo iumi lo heven, Jehovah, and givim praise lo hem, wea hem nao main samting wea iumi olketa man shud duim.
9. Wat nao showimaot Jehovah luksavve iumi needim faith?
9 Jehovah savve iumi needim faith, dastawe hem givim olketa example for teachim iumi hao for garem and showimaot faith. Christian kongregeson kasem blessing from wei wea Jehovah givim olketa example blo olketa faithful man wea lead. Bible sei: “Garem sem faith olsem olketa.” (Heb. 13:7) And hem givim iumi nara samting tu. Paul raet abaotem ‘bigfala sekson blo olketa witness,’ olketa man and woman lo bifor wea showimaot gudfala example lo wei for garem faith. (Heb. 12:1) List wea Paul raetem wea stap lo Hebrew chapter 11, hem samfala nomoa lo olketa faithful wan bifor. Bible storyim olketa tru story abaotem olketa man and woman, young and old, olketa from difren baekgraon, wea garem faith, and wea savve teachim iumi for garem faith nomata iumi stap lo world wea pipol no garem faith.
Hao Nao Iumi Savve Garem Sem Faith Olsem Olketa Narawan?
10. Hao nao wei for study seleva savve helpem iumi for garem sem faith olsem olketa faithful man and woman wea Bible storyim?
10 Hem hard for iu followim example blo samwan sapos iu no savve gud lo hem firstaem. Taem iu readim disfala pablikeson, bae iu lukim dat staka research nao olketa duim for helpem iu for savve gud lo olketa man and woman hia wea garem faith. Hem gud for iu duim research blo iuseleva tu. Taem iu duim study seleva, iusim olketa research tul wea iu garem for dig go moa insaed lo Bible. Taem iu ting raonem wat iu studyim, trae for imaginim wat nao gohed and baekgraon blo datfala Bible story. Trae for piksarem datfala ples, imaginim olketa smel, herem olketa saond, olsem sapos iu nao lo there. Trae for garem sem feeling olsem pipol lo datfala story. Taem iu duim datwan, olketa faithful man and woman bifor, bae olketa kamap real lo iu, bae iu savve gud lo olketa, gogo bae olketa kamap olsem olketa old fren blo iu.
11, 12. (a) Hao nao Abram and Sarai savve kamap olsem klos fren blo iu? (b) Hao nao example blo Hannah, Elijah, or Samuel savve helpem iu?
11 Taem iu barava savve gud lo olketa, bae iu laek for followim example blo olketa. For example, tingim sapos iu kasem wanfala niu assignment. Maet, organization blo Jehovah invaetem iu for duim moa samting lo ministry. Maet olketa askem iu for muv lo territory wea needim staka pablisa for preach, or maet olketa askem iu for duim difren wei for preach wea iu no duim bifor. Taem iu kasem datfala assignment and prea abaotem, hao nao wei for ting raonem example blo Abram bae helpem iu? Abram and Sarai willing for lusim gudfala laef blo olketa lo Ur and olketa kasem bigfala blessing from datwan. Taem iu gohed followim example blo olketa, bae iu feel olsem iu savve gud lo olketa winim enitaem bifor.
12 And tu, hao sapos samwan hem treatim iu nogud and mekem iu feel discourage and no laek go lo olketa meeting? If iu ting raonem example blo Hannah and hao hem no letem wei wea Peninnah treatim hem for stopem hem for worshipim Jehovah, datwan bae helpem iu for mekem stret disison and bae iu feel olsem Hannah hem best fren blo iu tu. And tu, if iu discourage from iu feel iusles, maet iu bae feel klos lo Elijah taem iu study abaotem wei wea hem ranawe and hao Jehovah comfortim hem. And olketa young wan wea kasem pressure from olketa skulmate, olketa savve kasem gud samting taem olketa study abaotem hao Samuel deal witim nogud influence blo olketa son blo Eli lo tabernacle.
13. If iumi followim example blo faith blo wanfala Bible character, waswe, datwan minim faith blo iuseleva hem no important? Explainim.
13 Waswe, wei for followim example blo faith blo olketa Bible character hem minim faith blo iuseleva hem no important lo Jehovah? Barava nomoa nao! Tingim, Bible encouragem iumi for followim example blo olketa wea garem faith. (1 Cor. 4:16; 11:1; 2 Thess. 3:7, 9) Interesting samting, samfala wea bae iumi study abaotem lo disfala buk, olketa tu followim faithful example blo olketa wea laef bifor olketa. Example, taem iumi readim Chapter 17 blo disfala buk, bae iumi lukim hao Mary hem quotem toktok blo Hannah taem hem story, so datwan showimaot Mary followim example blo Hannah. Hao, datwan minim Mary no garem strong faith? Nomoa! Example blo Hannah helpem Mary for garem strong faith wea mekem hem garem gudfala nem witim Jehovah God.
14, 15. Wat nao samfala samting wea insaed lo disfala pablikeson, and hao nao iumi savve iusim gud?
14 Olketa designim disfala buk for helpem iu for strongim faith blo iu. Olketa chapter lo disfala buk, hem from olketa Wastaoa article start from 2008 kasem 2013, wea garem title “Followim Faith Bilong Olketa.” Bat, hem garem tu olketa niu information. Each chapter garem olketa kwestin for story raonem and hao for iumi applyim. Disfala buk garem staka piksa wea garem olketa naes kala and tu, olketa piksa wea stap finis lo olketa article bifor, olketa mekem big and hem luk naes go moa. Nara gud samting for helpem iumi tu, hem olketa time line and map. Disfala buk Garem Sem Faith Olsem Olketa hem wanfala tul wea olketa designim for iusim lo personal study, famili study, and lo kongregeson Bible study. And maet olketa famili enjoyim tu for readim big tugeta olketa story hia.
15 Disfala buk bae barava helpem iu for garem sem faith olsem olketa faithful servant blo Jehovah lo bifor. And bae hem helpem iu for garem strongfala faith taem iu fren moa klos witim Dadi blo iu lo heven, Jehovah!