Waswe, Wei for Safa Bae Finis?

BIBLE HEM SEI

“God . . . bae draem evri tias long eye bilong olketa. No eniwan bae dae, safa, krae, or feelim pain.”​—Revelation 21:3, 4, Contemporary English Version.

GUD SAMTING WEA IU SAVVE KASEM FROM DISWAN

Iu savve sure God no kosim olketa problem bilong iumi.—James 1:13.

Taem iu safa, hem bae comfortim iu for savve God hem minim feeling bilong iu.—Zechariah 2:8.

Iu garem hope wei for safa bae finis.—Psalm 37:9-11.

WASWE, IUMI SAVVE TRUSTIM WANEM BIBLE TALEM?

Yes. Tingim tufala reason:

• God barava les for lukim pipol safa and man spoelem narawan. Bible hem sei Jehovah God feel sorre taem nara pipol spoelem pipol bilong hem bifor.—Judges 2:18.

  God barava no hapi long pipol wea spoelem narawan. Olsem example, Bible sei God hem heitim man wea killim dae nara man.—Proverbs 6:16, 17.

• God tingim iumi wanwan. Evri man savve long “hard taem wea hemseleva kasem wea mekem hem sorre,” bat Jehovah tu hem savve!—2 Chronicles 6:29, 30, New World Translation.

  Klosap nao Jehovah bae iusim Kingdom bilong hem for finisim wei wea olketa man safa. (Matthew 6:9, 10) Go kasem datfala taem, hem comfortim olketa wea traem best for savve long hem.—Acts 17:27; 2 Corinth 1:3, 4.