Taem Barava Nogud Samting Hem Happen

Nomata iu traem best for iu and marit partner bilong iu for garem famili wea hapi, samting wea iu no tingim savve seknomoa happen wea mekem hem no isi for iu gohed hapi. (Ecclesiastes 9:11) From God hem lovem iumi, hem givim help wea iumi needim taem iumi kasem olketa hard taem. Sapos iu followim olketa Bible principle long disfala sekson datwan bae helpem iu and famili bilong iu, nomata long taem wea barava nogud samting hem happen.

1 DEPEND LONG JEHOVAH

BIBLE HEM SEI: “Putim evri wari bilong iufala long hand bilong hem bikos hem tingim iufala.” (1 Peter 5:7) Hem gud for tingim God no kosim hard taem wea iu kasem. (James 1:13) Taem iu gohed for depend long God, hem bae barava helpem iu. (Isaiah 41:10) Bible hem sei: “Talem hem evri samting wea stap long heart bilong iufala.”—Psalm 62:8.

Iu savve kasem comfort tu taem iu readim and studyim Bible evriday. Taem iu duim olsem, bae iu luksavve Jehovah ‘hem comfortim iumi, nomata long eni hard taem wea iumi kasem.’ (2 Corinth 1:3, 4; Rome 15:4) God promis for givim iu ‘peace bilong hem wea winim nao wanem man savve minim.’—Philippi 4:6, 7, 13.

SAMTING IU SAVVE DUIM:

• Askem Jehovah for helpem iu for garem stretfala tingting and no duim eni krangge samting

• Ting raonem and disaedem wanem nao best samting for duim

2 DUIM SAMTING FOR HELPEM IU AND FAMILI BILONG IU

BIBLE HEM SEI: “Heart bilong man wea minim samting bae kasem savve, and ear bilong man wea wise bae laek for herem savve.” (Proverbs 18:15) Kasem information wea savve helpem iu for deal witim samting wea happen. Herem tingting bilong evriwan long famili mekem iu luksavve wanem iu savve duim for helpem olketa. Story witim olketa and lisin gud long olketa.—Proverbs 20:5.

Sapos samwan wea iu lovem hem dae, hem fitim for showimaot iu barava sorre. Nomata Jesus bat hem “krae” tu. (John 11:35; Ecclesiastes 3:4) Long taem olsem, hem important for mek sure iu rest gud. (Ecclesiastes 4:6) Datwan bae helpem iu for deal witim hard samting wea iu kasem.

SAMTING IU SAVVE DUIM:

• Evritaem story witim famili bilong iu, no long taem wea nogud samting hem happen nomoa. Datwan bae mekem olketa feel free for story witim iu taem problem hem kamap

• Story long olketa narawan wea kasem semkaen problem

3 ASKEM HELP

BIBLE HEM SEI: “Gudfala fren hem lovem iu olowe, and hem olsem brata wea iu savve depend long hem long taem bilong trabol.” (Proverbs 17:17) Olketa fren bilong iu laek for helpem iu, bat maet olketa no savve wanem for duim. No hol bak for talem long olketa samting wea iu needim. (Proverbs 12:25) Hem gud tu for askem olketa wea minim Bible for storyim olketa scripture wea savve helpem iu.—James 5:14.

Taem iu hipap evritaem witim pipol wea garem faith long God and wea trustim olketa promis bilong hem, datwan savve encouragem iu. Nara samting wea savve helpem iu hem for encouragem olketa narawan wea kasem hard taem. Story abaotem Jehovah and olketa promis bilong hem long olketa. Busy for helpem olketa narawan, and letem olketa wea lovem iu for helpem iu.—Proverbs 18:1; 1 Corinth 15:58.

SAMTING IU SAVVE DUIM:

• Story witim wanfala gud fren and letem hem helpem iu

• Talemaot feeling bilong iu and samting wea iu needim