Olketa Brata and Sista Evriwea lo World wea Wan Mind

FOR samting olsem 1,500 years, nation blo Israel nao pipol wea garem nem blo God. Then Jehovah “chusim samfala wea no Jew tu for garem nem bilong hem.” (Acts 15:14) Pipol wea garem nem blo Jehovah nao olketa witness blo hem, nomata olketa stap lo olketa difren ples lo earth, olketa wan mind lo tingting and wat olketa duim. Pipol wea garem nem blo God wan mind bikos lo disfala komand wea Jesus talem lo olketa follower blo hem wea sei: “So iufala go and teachim pipol long evri kantri for kamap disaepol bilong mi. Baptaesim olketa hia long nem bilong Dadi and bilong Son and bilong holy spirit. Teachim olketa for followim evri samting wea mi laekem iufala for duim.”​—Matt. 28:19, 20.

² Taem iu dedicate lo Jehovah and baptaes, iu wanfala disaepol blo Jesus Christ. Iu joinim olketa brata and sista evriwea lo world wea wan mind and no letem kantri, tribe, or selen divaedem olketa. (Ps. 133:1) From datwan, iu lovem and respectim olketa brata and sista blo iu lo kongregeson. Maet bifor iu no laekem samfala lo olketa bikos olketa kam from difren race, kantri, or garem difren education baekgraon. Iumi olketa brata and sista garem love for each other wea mekem iumi barava fren gud winim olketa fren wea iumi garem bifor lo religion or famili.​—Mark 10:29, 30; Col. 3:14; 1 Pet. 1:22.

CHANGIM TINGTING

³ If samfala faendem hard for lusim wei for no laekem pipol from difren race, kantri, and olketa nara difren wei for ting daonem pipol, olketa savve tingim olketa Christian wea Jew lo first century wea mas lusim wei for ting daonem pipol from nara ples. Taem Jehovah talem Peter for go lo haos blo Cornelius, bigman blo olketa soldia blo Rome, Jehovah redyim Peter for datfala assignment.​—Acts, chap. 10.

⁴ Lo wanfala vision, Peter kasem komand for killim dae and kaikaim samfala animal wea lo biliv blo olketa Jew hem no klin. Taem Peter no laek for duim datwan, wanfala voice from heven sei: “God mekem olketa samting hia for klin nao, so iu no sei olketa samting hia hem no klin.” (Acts 10:15) Peter needim disfala toktok from God for redyim tingting blo hem for datfala assignment, wea hem kasem wea hem nao for go lo wanfala man wea no Jew. Taem Peter obeyim direction blo Jehovah, hem talem lo olketa wea hipap lo there: “Iufala savve finis law bilong mifala hem stopem olketa Jew for no visitim or fren gud witim eniwan wea hem no wanfala Jew. Bat God hem showim long mi finis for mi mas no sei nara pipol olketa no klin. Dastawe taem iu sendem samfala man for tekem mi kam, mi no les for kam.” (Acts 10:28, 29) Bihaen, Peter lukim hao Jehovah acceptim Cornelius and famili blo hem.

⁵ Saul blo Tarsus, wea hem wanfala Pharisee wea savve gud lo law, mas hambol and associate witim olketa wea bifor hem no laekem olketa. Hem followim tu advaes blo olketa. (Acts 4:13; Gal. 1:13-20; Phil. 3:4-11) Tingim wat pipol olsem Sergius Paulus, Dionysius, Damaris, Philemon, Onesimus, and olketa narawan mas duim for changem tingting blo olketa taem olketa acceptim datfala gud nius and kamap disaepol blo Jesus Christ.​—Acts 13:6-12; 17:22, 33, 34; Philem. 8-20.

GOHED KEEPIM WAN MIND EVRIWEA LO WORLD

⁶ For sure, love blo olketa brata and sista lo kongregeson nao helpem iu for fren witim Jehovah and joinim organization blo hem. Iu lukim love wea hem mark blo olketa tru disaepol blo Jesus Christ, wea sei: “Mi givim wanfala niu law long iufala. Iufala mas lovem iufala evriwan. Mi lovem iufala, and iufala tu mas lovem iufala evriwan long sem wei. Sapos iufala lovem iufala evriwan, pipol bae savve iufala olketa disaepol bilong mi.” (John 13:34, 35) Taem iu luksavve love wea showaot lo kongregeson hem smol part nomoa lo love wea olketa brata and sista evriwea lo world garem, datwan mekem iu for tinghae go moa lo Jehovah and organization blo hem. Iu lukim dat profesi abaotem wei wea pipol blo Jehovah lo olketa last day bae hipap tugeta for worshipim hem witim peace and wan mind hem fulfill.​—Mic. 4:1-5.

⁷ From staka samting mekem pipol divaed distaem, samfala ting hem hard for mekem pipol “from evri kantri and tribe and pipol and languis” for wan mind. (Rev. 7:9) Tingim hao pipol from olketa kantri wea education and technology hem hae, olketa difren from pipol wea still followim olketa kastom. Lukim hao pipol lo sem race and kantri raoa abaotem religion. From pipol tinghae tumas lo kantri blo olketa, datwan mekem pipol divaed winim enitaem bifor. And if iu tingim hao pipol difren saed lo selen and olketa nara samting wea mekem pipol for divaed, for pipol from evri kantri and languis wan mind, hem wanfala mirakol wea only Olmaeti God nomoa savve duim.​—Zech. 4:6.

⁸ Bat disfala wei for wan mind hem really happen, and taem iu dedicate lo Jehovah and baptaes, iu part lo datwan. From iu kasem gud samting from datfala wei for wan mind, iu garem responsibility tu for gohed keepim. Iumi duim datwan taem iumi followim advaes blo aposol Paul wea stap lo Galatia 6:10 wea sei: “Iumi mas duim gudfala samting long evriwan taem iumi garem chance for duim olsem, main wan nao olketa wea garem sem biliv.” Iumi followim tu disfala kaonsel: “Iufala mas no laek raoa olowe and mas no praod, bat iufala mas hambol and ting long narawan olsem hem winim iufala. Evritaem tingim olketa narawan and no tingim iufala seleva nomoa.” (Phil. 2:3, 4) Taem iumi trainim iumiseleva for garem tingting blo Jehovah abaotem olketa brata and sista, and no tingim nomoa wik point blo olketa, iumi bae hapi and gohed garem peace and fren gud witim olketa.​—Eph. 4:23, 24.

TINGIM EACH OTHER

⁹ Olsem aposol Paul storyim lo illustration blo hem, kongregeson hem no divaed bat evriwan waka tugeta for helpem each other. (1 Cor. 12:14-26) Maet iumi stap farawe from samfala lo olketa brata and sista blo iumi lo world, bat datwan no minim iumi no tingim olketa. If samfala brata and sista blo iumi kasem persecution, datwan affectim iumi tu. If samfala needim help or olketa safa bikos lo disaster, war or ethnic tenson, evriwan bae traem best for faendem wei lo hao for givim spiritual and olketa material samting.​—2 Cor. 1:8-11.

¹⁰ Iumi evriwan shud prea for olketa brata and sista blo iumi evriday. Samfala kasem temptation for duim nogud samting. Maet iumi herem olketa narawan kasem hard taem. Samfala olketa workmate and famili againstim olketa and iumi no savve. (Matt. 10:35, 36; 1 Thess. 2:14) Iumi tingim olketa bikos iumi part lo famili blo olketa brata and sista blo iumi evriwea lo world. (1 Pet. 5:9) Iumi garem tu olketa wea waka hard for Jehovah wea lead lo preaching waka and lo kongregeson. And tu samfala brata stap wea lukaftarem waka evriwea lo world. Evriwan hia needim prea blo iumi, datwan showim iumi lovem and tingim olketa, nomata maet iumi no savve go for helpem olketa.​—Eph. 1:16; 1 Thess. 1:2, 3; 5:25.

¹¹ From staka nogud samting happen lo world lo olketa last day, pipol blo Jehovah mas redi for helpem each other. Samfala taem olketa disaster happen, olsem olketa earthquake and flood and bigfala waka stap for helpem olketa. Olketa Christian lo first century showim gud example lo diswan. From olketa tingim kaonsel blo Jesus, olketa disaepol lo Antioch hapi for sendem go olketa material samting lo olketa brata and sista lo Judea. (Acts 11:27-30; 20:35) Bihaen, aposol Paul encouragem olketa lo Corinth for sapotim relief waka wea olketa organizem. (2 Cor. 9:1-15) Distaem tu taem olketa brata and sista kasem hard taem and needim help, organization and olketa brata and sista kwiktaem for duim samting and givim wat olketa needim.

IUMI PIPOL WEA DUIM WILL BLO JEHOVAH

¹² Iumi olketa brata and sista evriwea lo world organize for duim wat Jehovah laekem. Distaem wat Jehovah laekem nao hem for iumi preachim disfala gud nius abaotem Kingdom evriwea lo earth. (Matt. 24:14) Taem iumi duim waka blo Jehovah, hem laekem iumi for followim olketa hae standard blo hem. (1 Pet. 1:14-16) Iumi shud willing for stap anda lo narawan, and waka hard for gohed talemaot disfala gud nius. (Eph. 5:21) Winim enitaem bifor, distaem hem no taem for aftarem olketa samting wea iumiseleva laekem, bat for putim Kingdom blo God hem main samting lo laef. (Matt. 6:33) Taem iumi tingim diswan and waka tugeta for talemaot datfala gud nius, datwan mekem iumi satisfae distaem, and bae iumi kasem blessing wea stap for olowe.

¹³ Iumi Olketa Jehovah’s Witness iumi spesol from iumi klin and strong for duim waka blo God, datwan mekem iumi difren from evri pipol lo world. (Titus 2:14) Wei wea iumi worshipim Jehovah hem mekem iumi difren. Iumi olketa brata and sista evriwea lo world wan mind for worshipim Jehovah and iumi story lo wanfala languis blo truth and duim samting followim truth wea iumi story abaotem. Hem profesi wea Jehovah talem thru lo profet Zephaniah, hem sei: “Lo datfala taem mi bae changem languis blo olketa pipol go lo wanfala pure languis, mekem evriwan lo olketa savve kol lo nem blo Jehovah, mekem olketa wan mind for worshipim hem.”​—Zeph. 3:9.

¹⁴ Then Jehovah iusim Zephaniah for story abaotem olketa brata and sista evriwea lo world wea stap distaem, hem sei: “Olketa Israelite wea stap yet bae no duim samting wea no raeteous. Olketa bae no laea, and mouth blo olketa bae no garem tongue wea laea. Olketa bae kaikai and leidaon, and no eniwan bae mekem olketa fraet.” (Zeph. 3:13) From iumi minim truth wea stap lo Bible, and changem tingting and wei blo iumi followim standard blo Jehovah, datwan mekem iumi fit for wan mind for waka tugeta. Iumi duim olketa samting wea lo tingting blo olketa man, hem hard for eniwan duim. Yes, iumi pipol wea difren, pipol blo God, wea givim honor lo hem evriwea lo earth.​—Mic. 2:12.