Sermon lo Maunten

Afta Jesus chusim 12-fala aposol, Jesus kam daon from maunten lo wanfala ples wea staka pipol hipap lo hem. Evriwan hia kam from Galilee, Judea, Tyre, Sidon, Syria, and narasaed lo Jordan. Olketa tekem kam pipol wea safa from sik and samfala wea demon stap lo olketa. Jesus healim evriwan. Then hem sidaon lo datfala maunten and start for story. Hem storyim wat iumi mas duim if iumi laek fren witim God. Iumi mas luksavve iumi needim Jehovah and lane for lovem hem. Bat iumi no savve lovem God if iumi no lovem nara pipol. Iumi mas kaen and no fevarem eniwan, nomata olketa enemy blo iumi tu.

Jesus sei: ‘Hem no inaf for lovem olketa fren blo iu nomoa. Iu mas lovem olketa enemy blo iu tu and forgivim pipol from heart blo iu. If samwan hem feel nogud lo iu, go lo hem and sei sorre. Treatim olketa narawan lo sem wei wea iu laekem olketa for treatim iu.’

Jesus givim tu gud advaes abaotem olketa material samting. Hem sei: ‘Hem moa important for fren witim Jehovah winim for garem staka selen. Man savve stealim selen blo iu, bat hem no savve stealim frenship blo iu witim Jehovah. No wari tumas abaotem wat iu bae kaikaim, drinkim, or werem. Lukim olketa bird. God evritaem mek sure olketa garem inaf kaikai. Wei for wari bae no mekem iu laef longtaem. Tingim, Jehovah savve lo wat iu needim.’

No enitaem olketa pipol hia herem eniwan hem teach olsem Jesus. Bigman lo religion blo olketa no teachim datwan lo olketa. Why nao Jesus hem savve tumas hao for teach? Bikos evri samting wea hem teachim hem kam from Jehovah.