Jesus Teachim Olketa Disaepol Hao for Prea

Evri samting wea olketa Pharisee duim hem for mekem pipol tinghae lo olketa. If olketa duim gud samting datwan hem for mekem pipol lukim nomoa. Olketa prea lo olketa pablik ples mekem evriwan savve lukim olketa. Olketa Pharisee memorizim olketa long prea and repeatim lo olketa sinagog and lo street mekem pipol savve herem olketa. So pipol sapraes taem Jesus sei lo olketa: ‘No prea olsem olketa Pharisee. Olketa tingse God bae hapi lo staka toktok wea olketa talem, bat hem no hapi lo datwan. Prea hem samting between iu and Jehovah. No talem sem samting evritaem. Jehovah laekem iu for storyim feeling blo iu.

‘Iufala shud prea olsem: “Dadi blo mifala lo heven, mifala laekem nem blo iu for holy. Mifala laekem Kingdom blo iu for kam. Duim will blo iu lo earth, olsem iu duim lo heven.”’ Jesus talem tu dat olketa shud prea for God provaedem kaikai for each day, for hem forgivim sin blo olketa, and prea for olketa samting wea olketa needim.

Jesus sei: ‘Gohed for prea. Gohed for askem Dadi blo iufala Jehovah, for olketa gud samting. Evri mami or dadi laek for givim gud samting lo pikinini blo hem. If son blo iu ask for bred, bae iu givim hem wanfala ston? If hem ask for fish, bae iu givim hem wanfala snek?’

Then Jesus storyim leson. Hem sei: ‘If iufala savve givim gud samting lo pikinini blo iufala, haomas moa Dadi blo iufala Jehovah, bae hem givim holy spirit tu lo iufala! Only samting wea iufala need for duim hem for askem hem.’ Hao, iu followim advaes blo Jesus? Wat nao olketa samting wea iu prea abaotem?