Olketa Sendem Paul Go lo Rome

Mek-thri preaching trip blo Paul hem finis lo Jerusalem. Lo there nao olketa arrestim hem and putim hem lo prison. Lo naet, Paul lukim insaed wanfala vision, Jesus sei lo hem: ‘Bae iu go lo Rome and preach lo there.’ Olketa tekem Paul from Jerusalem go lo Caesarea, and hem stap lo prison for tu years. Taem olketa tekem hem go lo Governor Festus, Paul sei: ‘Mi laekem King blo Rome nao for judgem case blo mi.’ Festus sei: ‘From iu laekem King lo Rome for judgem case blo iu, bae iu mas go lo hem nao.’ So olketa sendem Paul lo wanfala ship wea go for Rome, and tufala Christian brata, Luke and Aristarchus go witim hem.

Taem olketa lo sea, bigfala wind hem blow and sea hem raf tumas and datwan gohed for staka day. Evriwan tingse bae olketa dae nao. Bat Paul sei lo olketa: ‘Wanfala angel talem mi insaed dream, hem sei: “Paul, iu no fraet. Iu bae kasem Rome, iu and evriwan lo ship bae sef.” Iufala no fraet! Iumi bae no dae.’

Datfala storm hem gohed for 14 days. Gogo, olketa lukim land nao. Datwan hem island lo Malta. Datfala ship hem rek and hem brek nao, bat 276 pipol wea stap lo ship hia olketa arrive sef lo land. Samfala swim go and olketa narawan iusim olketa part blo datfala ship and float go lo shore. Pipol lo Malta lukaftarem olketa and wakem fire for keepim olketa warm.

Thrifala month bihaen, olketa soldia tekem Paul go lo Rome insaed nara ship. Taem hem arrive, olketa brata kam for meetim hem. Taem Paul lukim olketa, hem kasem encouragement and hem thankiu lo Jehovah. Nomata Paul hem wanfala prisoner, olketa letem hem for stap lo wanfala haos wea hem rentim and wanfala soldia gardim hem. Hem stap lo there for tu years. Pipol kam for lukim hem and hem preach lo olketa abaotem Kingdom blo God and teachim olketa abaotem Jesus. And tu, Paul raetem olketa leta for olketa kongregeson lo Asia Minor and Judea. Jehovah iusim Paul for spredim gud nius lo olketa nation.