Revelation wea John Kasem

Taem aposol John hem prisoner lo island blo Patmos, Jesus mekem hem for lukim 16-fala vision, or lukim olketa samting wea bae happen lo future. Olketa vision hia showim hao nem blo Jehovah bae holy, Kingdom blo hem bae kam, and hao bae hem duim will blo hem lo earth olsem lo heven.

Lo first vision, John lukim Jehovah sidaon lo nambawan throne blo hem lo heven, twenti-fo elder wea werem white kaleko and putim olketa gold kraon lo hed blo olketa stap raonem Hem. Olketa laetning and saond blo thunder kamaot from datfala throne. Then Twenti-fo elder hia baodaon front lo Jehovah and worshipim hem. Lo mek-tu vision, John lukim wanfala big crowd from evri nation, pipol, and languis wea worshipim Jehovah. Datfala Lamb, wea hem Jesus, lukaftarem olketa and leadim olketa go lo wata blo laef. Bihaen, lo mek-thri vision, Jesus start for rul olsem King lo heven, witim 24-fala elder. Lo mek-fo vision, John lukim Jesus faet witim datfala dragon, wea hem Satan, and olketa demon blo hem. And Jesus aotem olketa from heven and torowem olketa kam daon lo earth.

Then John lukim datfala Lamb and 144,000 standap lo Maunt Zion. Hem lukim tu wanfala angel wea flae lo skae, and gohed talem pipol for fraet lo God and givim glory lo hem.

Lo mek-faev vision, hem lukim olketa faet lo war blo Armageddon. Lo datfala war, Jesus and army blo hem winim wicked system blo Satan. Lo last vision, John lukim evriwan lo heven and lo earth stap gud. Satan and olketa wea saedem hem finis nao. Evriwan lo heven and lo earth mekem nem blo Jehovah holy and worshipim hem nomoa.