LESON 19
Hao, Olketa Jehovah’s Witness Nao Tru Christian?
Mifala Olketa Jehovah’s Witness sure mifala olketa tru Christian. Why nao olsem? Olketa biliv blo mifala hem followim wanem? Why nao mifala garem nem Olketa Jehovah’s Witness? Wat nao mifala duim wea showim mifala lovem each other?
1. Olketa biliv blo Olketa Jehovah’s Witness hem followim wanem?
Jesus sei: ‘Toktok bilong God hem tru.’ (John 17:17) Olketa Jehovah’s Witness evritaem bilivim nomoa samting wea Bible teachim olsem Jesus. Example nao, tingim history blo Olketa Jehovah’s Witness wea bifor nem blo olketa hem olketa Bible Student. Samting olsem year 1870, datfala grup start for studyim gud Bible for savve lo tru samting wea Bible teachim. Biliv blo olketa kam from Bible nomata hem difren from biliv blo olketa nara church. Then olketa storyim olketa samting hia wea olketa lanem from Bible lo nara pipol.a
2. Why nao mifala kolem mifala Olketa Jehovah’s Witness?
Jehovah kolem pipol wea worshipim hem olketa witness blo hem bikos olketa talem pipol tru samting abaotem hem. (Hebrew 11:4–12:1) Lo bifor, God sei lo pipol blo hem: “Iufala . . . nao i witnes blong mi.” (Readim Aesaea 43:10.) Bible sei Jesus hem “datfala Faithful Witness.” (Revelation 1:5) So, lo 1931 mifala tekem nem Olketa Jehovah’s Witness. Mifala hapi for garem datfala nem.
3. Hao nao Olketa Jehovah’s Witness followim wei blo Jesus for showim love?
Jesus lovem tumas olketa disaepol and sei olketa olsem famili blo hem. (Readim Mark 3:35.) Olketa Jehovah’s Witness tu olsem wanfala famili evriwea lo world wea garem wan mind. So mifala kolem each other brata and sista. (Philemon 1, 2) Mifala obeyim tu disfala komand: “Lovem evri brata bilong iufala.” (1 Peter 2:17) Mifala showim love lo staka difren wei, olsem for helpem olketa nara Witness evriwea lo world lo taem wea olketa needim help.
DIG GO MOA
Bae iumi lanem history blo Olketa Jehovah’s Witness and lukim samfala pruv moa wea showim mifala olketa tru Christian.
Olketa biliv blo olketa tru Christian kam from Bible and olketa storyim lo nara pipol
4. Olketa biliv blo mifala kam from Bible
Jehovah sei gogo bae iumi minim gud truth wea stap lo Bible. Readim Daniel 12:4 (NW), then discussim tugeta disfala kwestin:
Taem pipol blo God gohed for studyim gud Bible, wat nao bae kamap “staka”?
Lukim hao wanfala grup blo olketa Bible student studyim Bible, wea wanfala hem Charles Russell. Pleim VIDEO, then discussim tugeta disfala kwestin.
Olsem iumi lukim lo video, wat nao Charles Russell and olketa nara Bible Student duim for studyim Bible?
Maet iu laek savve
Samfala taem mifala mekem olketa change lo samfala biliv blo mifala. Why nao olsem? Olsem taem sun kamap lo morning then isisi braet lo evri samting, God helpem pipol blo hem for isisi minim gud truth insaed Bible. (Readim Proverbs 4:18, NW.) Nomata Bible no change, mifala mekem samfala change lo olketa biliv blo mifala taem mifala minim gud Bible.
5. Mifala duim samting followim nem blo mifala
Why mifala garem nem Olketa Jehovah’s Witness. Pleim VIDEO, then discussim tugeta kwestin hia.
Why nao datfala nem Olketa Jehovah’s Witness fitim mifala?
Why nao Jehovah chusim pipol for witness for hem? Olketa bae talemaot lo pipol hem nao tru God, bikos pipol talem staka laea samting abaotem hem. Iumi storyim tufala.
Samfala religion teachim olketa member blo olketa God laekem olketa for iusim image lo worship blo olketa. Readim Levitikas 26:1, then discussim tugeta olketa kwestin hia:
Wat nao tru samting wea scripture hia storyim? Hao nao tingting blo Jehovah abaotem olketa idol?
Samfala bigman blo religion teachim pipol Jesus hem God. Readim John 20:17, then discussim tugeta olketa kwestin hia:
Wat nao tru samting wea scripture hia storyim? Hao, God and Jesus tufala wan nomoa?
Hao nao tingting blo iu taem iu savve Jehovah sendem olketa Witness blo hem for talem iu tru samting abaotem hem and Son blo hem?
6. Mifala lovem each other
Bible sei olketa Christian shud waka tugeta olsem olketa difren part lo body. Readim 1 Corinth 12:25, 26, then discussim tugeta olketa kwestin hia:
Wat nao olketa tru Christian shud duim taem olketa nara Christian kasem hard taem?
Wat nao tingting blo iu abaotem love wea Olketa Jehovah’s Witness showim for each other?
Taem olketa nara Jehovah’s Witness kasem hard taem lo eni ples lo earth, olketa nara Witness evriwea lo world kwiktaem duim samting for help. For lukim wanfala example, pleim datfala VIDEO. Then discussim tugeta kwestin hia.
Hao nao relief waka wea Olketa Jehovah’s Witness duim showim olketa garem love?
Olketa tru Christian showim love lo olketa wea needim help
SAMFALA SAVVE TALEM: “Jehovah’s Witness hem wanfala niu religion.”
Start lo wat taem nao Jehovah kolem pipol wea worshipim hem olketa witness?
MAIN POINT
Olketa Jehovah’s Witness nao olketa tru Christian. Mifala olsem wan famili evriwea lo world. Olketa biliv blo mifala kam from Bible and mifala talemaot tru samting abaotem Jehovah.
Review
Why nao mifala tekem datfala nem Olketa Jehovah’s Witness?
Hao nao mifala treatim each other?
Iu tingse, Olketa Jehovah’s Witness nao olketa tru Christian?
FAENDAOT MOA
Lanem samfala samting moa abaotem history blo mifala.
Olketa Jehovah’s Witness Showimaot Faith, Part 1: Lusim Darkness and Kam lo Laet (1:00:53)
Lukim wanfala example lo hao Olketa Jehovah’s Witness helpem pipol for luksavve lo olketa laea teaching.
Kasem ansa for olketa kwestin wea iu maet garem abaotem Olketa Jehovah’s Witness.
“Olketa Kwestin wea Staka Pipol Askem Abaotem Olketa Jehovah’s Witness” (Page lo jw.org)
Stephen savve spoelem pipol from nara kantri bikos hem heitim olketa. Read abaotem samting wea hem lukim lo Olketa Jehovah’s Witness wea mekem hem for change.
“Laef Bilong Mi Barava Nogud Tumas” (Wastaoa, September 1, 2015)
a Start lo 1879, olketa pablisim Wastaoa magasin for explainim truth lo Bible.