September

God givim paoa lo Jesus for finisim evri problem wea kasem iumi. Olketa mirakol wea Jesus duim showimaot hem fit finisim olketa problem wea iumiseleva hard for finisim. For example, hem garem paoa for mekem iumi free from sin wea hem nao main samting wea kosim sik and dae. (Matt. 9:​1-6; Rome 5:​12, 18, 19) Olketa mirakol wea hem duim pruvim hem savve “healim enikaen sik” and resurrectim olketa wea dae tu. (Matt. 4:23; John 11:​43, 44) And tu, hem garem paoa for kontrolem big wind and mekem pipol kamap free from olketa wicked spirit. (Mark 4:​37-39; Luke 8:2) Hem barava comfortim iumi for savve Jehovah givim bigfala paoa olsem lo Son blo hem! Iumi savve sure olketa promis blo God bae kamap tru anda lo Kingdom. Olketa mirakol wea Jesus duim showimaot wanem hem bae duim lo future evriwea lo earth taem hem King lo Kingdom blo God lo heven. w23.04 3 ¶5-7

Sapos iu lo wanfala big kongregeson and staka taem olketa no kolem iu nomata iu handsap, maet datwan mekem iu ting for givap. Bat hem gud for no givap for trae for koment. Preparem tu-thri koment for each meeting, then if conductor no chusim iu lo start, iu still garem chance for koment lo meeting. Taem iu preparem Wastaoa Study article, ting abaotem hao datfala paragraf join witim theme blo article. If iu duim olsem, bae iu garem staka naes koment for givim lo full article. And tu, maet hem gud for preparem koment lo olketa paragraf wea storyim olketa deep truth wea maet no isi for explainim. Why nao olsem? Bikos staka nao maet no handsap lo datfala paragraf. Hao sapos bihaen tu-thri meeting, iu still no garem chance for koment? Story witim conductor bifor lo meeting, and talem hem paragraf wea iu laek ansa lo hem. w23.04 21-22 ¶9-10

Joseph willing for followim direction blo Jehovah dastawe hem gud hasband. Thrifala taem hem kasem direction from God for famili blo hem. Each taem, hem stretawe obey, nomata hem mas mekem samfala big change. (Matt. 1:20; 2:​13-15, 19-21) From hem followim direction blo God, Joseph protectim, sapotim, and provaed for Mary. Masbi olketa samting wea Joseph duim mekem Mary barava lovem and respectim hem! Iufala hasband savve followim example blo Joseph taem iufala lukaotem advaes lo Bible lo hao for lukaftarem famili. Taem iufala followim disfala advaes, nomata iufala mas mekem samfala big change, iufala showim iufala lovem waef and datwan bae strongim marit blo iufala. Wanfala sista lo Vanuatu wea marit for winim 20 year finis sei: “Taem hasband blo mi lukaotem and followim direction blo Jehovah, mi barava respectim hem. Mi feel sef and trustim olketa disison blo hem.” w23.05 21 ¶5

Olketa Jew wea lusim Babylon mas kamap “holy pipol” blo God. (Deut. 7:6) Nomata olsem, olketa still need for changem samfala wei blo olketa for mekem Jehovah hapi. Staka Jew wea born lo Babylon luk olsem olketa getius lo tingting and wei blo olketa lo Babylon. Sixti-naen year bihaen olketa first Jew go bak lo Israel, Governor Nehemiah sapraes for faendaot hao olketa pikinini wea born lo Israel no even lanem languis blo olketa Jew. (Deut. 6:​6, 7; Neh. 13:​23, 24) So hao nao olketa young wan hia savve lane for lovem and worshipim Jehovah, if olketa no minim Hebrew languis, wea hem nao main languis wea olketa raetem lo Law blo God? (Ezra 10:​3, 44) Olketa Jew hia need for mekem samfala big change lo laef blo olketa, bat bae hem moa isi for olketa duim datwan lo Israel, ples wea klin worship isisi for kamap moa.—Neh. 8:​8, 9. w23.05 15 ¶6-7

Maet samting kamap wea disturbim goal blo iumi nomata iumi barava laek kasem goal or iumi forcem iumiseleva for duim datwan. For example, maet samting iumi no expectim hem tekem taem wea iumi markem for kasem goal blo iumi. (Eccl. 9:11) Maet iumi kasem hard taem wea mekem iumi feel discourage and wikdaon. (Prov. 24:10) From iumi no perfect, maet datwan tu mekem iumi duim samting wea no helpem iumi for kasem goal blo iumi. (Rome 7:23) Or maet iumi just feel taed. (Matt. 26:43) Wat nao savve helpem iumi for winim samting wea disturbim iumi for kasem goal blo iumi? Tingim hao nomata iu no kasem goal samfala taem datwan no minim iu fail nao. Bible sei iumi savve feisim problem staka taem. Nomata olsem, Bible sei tu bae iumi kasem goal blo iumi. Tru nao, taem iu no givap iu pruvim lo Jehovah iu laek for mekem hem hapi. Jehovah barava hapi for lukim iu waka hard for kasem goal blo iu! w23.05 30-31 ¶14-15

Taem iu pioneer, iu savve lane for waka witim olketa difren brata and sista. And tu, hem helpem iu for savve hao for budgetim selen and for no spend winim wat iu kasem. (Phil. 4:​11-13) Wanfala gud wei for startim full-taem service hem for auxiliary pioneer, and datwan bae helpem iu for redi for regular pioneer. Taem iu pioneer, door hem open for iu duim olketa nara full-taem service, olsem for waka lo Bethel or construction. Evri brata shud garem aim for qualify for kamap elder mekem olketa savve helpem olketa lo kongregeson. Bible sei man wea reach aot for disfala responsibility, “gud samting nao hem laek for duim.” (1 Tim. 3:1) First, brata mas qualify for kamap ministerial servant. Olketa ministerial servant helpem olketa elder lo staka difren wei. Olketa elder and ministerial servant willing for helpem olketa brata and sista and strong for waka tugeta witim olketa lo ministry. w23.12 28 ¶14-16

Taem King Josiah teenager, hem start for lukaotem Jehovah. Hem laek for lane abaotem Jehovah and for duim wat Jehovah laekem. Nomata olsem, laef hem no isi for disfala young king. Lo datfala taem, staka pipol worshipim olketa false god. So for Josiah sapotim tru worship, hem need for no fraet. And hem nao wat hem duim! Bifor Josiah 20 years old, hem start for aotem false worship from Israel. (2 Chron. 34:​1, 2) Nomata if iu barava young, iu savve disaed for followim example blo Josiah for lukaotem Jehovah and for lane abaotem olketa naesfala wei blo Jehovah. Taem iu duim diswan, bae iu laek for dedicate lo Jehovah. Hao nao dedication blo iu savve affectim laef blo iu evriday? Luke, wea baptaes taem hem 14 years sei: “Start from distaem, for servem Jehovah bae hem main samting lo laef blo mi and bae mi traem best for mekem hem hapi.” (Mark 12:30) Iu bae kasem blessing if iu laek for duim sem samting! w23.09 11 ¶12-13

Taem aposol Paul raetem disfala leta, kongregeson lo Thessalonica just start and no kasem wan year yet. Luk olsem, olketa elder lo datfala kongregeson no garem staka experience and maet mekem samfala mistek. Nomata olsem, olketa fit for kasem respect. Taem bigfala trabol hem kakam klosap, maet iumi need for depend lo olketa elder for direction winim eni narataem. Maet bae hem hard for kasem direction from world hedquarter and branch office, so hem important for lovem and respectim olketa elder blo iumi distaem. Nomata wanem happen, iumi mas gohed garem gudfala tingting and no focus lo wik point blo olketa, bat hem gud for focus lo hao Jehovah leadim olketa faithful man hia anda lo direction blo Christ. Olsem helmet protectim hed blo wanfala soldia, hope wea iumi garem for sev hem protectim tingting blo iumi. Iumi luksavve hao olketa tings lo world hem iusles nomoa. (Phil. 3:8) Hope helpem iumi for stedy and no panic. w23.06 11-12 ¶11-12

Olketa wea herem datfala “stupid woman” mas disaed if bae olketa acceptim or rejectim invitation blo hem. Samfala gud reason stap why iumi mas avoidim wei for durong. Bible storyim hao datfala “stupid woman” sei: ‘Wata wea olketa stilim, hem suit!’ (Provebs 9:​17, SIPB) Wat nao datwan minim? Bible comparem sex between hasband and waef witim fresh wata. (Provebs 5:​15-18, SIPB) Man and woman wea marit blo tufala hem legal nomoa savve enjoyim sex. Bat datfala ‘wata wea olketa stilim’ no olsem. Hem savve minim wei for durong. Staka taem pipol savve durong haed, olsem man for steal hem stealim samting haed. Maet datfala ‘wata wea olketa stilim’ hem swit, if olketa wea duim datwan tingse no eniwan bae faendaot lo wat olketa duim. Bat olketa laea lo olketa seleva, bikos Jehovah lukim evri samting! Worse samting wea savve happen lo iumi, hem taem Jehovah no hapi lo iumi, so datwan hem nating “suit.”—1 Cor. 6:​9, 10. w23.06 22 ¶7-9

Hao if, for lelebet taem iu feel olsem olketa prea blo iu hem no kam from heart or iu no really enjoyim ministry? No tingse Jehovah stop nao for givim iu holy spirit. From iu no perfect, samfala taem feeling blo iu savve change. If feeling blo iu for laek duim waka blo Jehovah hem gogo daon, hem gud for tingim example blo aposol Paul. Nomata Paul traem best for followim example blo Jesus, samfala taem hem feel olsem hem no laek for duim datfala waka. Paul disaed strong for duim ministry blo hem nomata samfala taem hem no feel laek for duim datwan. Lo sem wei tu, no letem feeling blo iu for affectim olketa disison blo iu. Disaed strong for duim stret samting nomata wat nao maet feeling blo iu. Sapos iu gohed duim stret samting, gogo bae feeling blo iu hem change.—1 Cor. 9:16. w24.03 11-12 ¶12-13

Iumi savve showimaot iumi lovem olketa brata and sista taem iumi kamap fren blo olketa and spendem taem witim olketa. (2 Cor. 6:​11-13) Staka lo iumi insaed olketa kongregeson wea olketa brata and sista garem difren baekgraon and garem olketa difren wei. Iumi savve strongim love blo iumi for evriwan lo olketa taem iumi gohed tingim olketa gudfala wei blo olketa. Taem iumi lane for garem sem tingting olsem Jehovah abaotem olketa narawan, datwan pruvim iumi lovem olketa. Iumi bae need for lovem olketa brata and sista lo taem blo bigfala trabol. Taem datfala trabol hem start, hao nao bae Jehovah protectim iumi? Tingim wanem Jehovah talem lo pipol blo hem for duim taem enemy attakim Babylon bifor. Hem sei: “Pipol blo mi, iufala go insaed olketa rum blo iufala, and satem kam door. Iufala haed insaed for lelebet taem go kasem taem kros blo God hem finis.” (Isa. 26:20) Luk olsem, bae iumi tu followim olketa instruction hia lo taem blo bigfala trabol. w23.07 6-7 ¶14-16

Duim samting for pipol luksavve iu man wea no ova tumas. Iumi savve askem iumiseleva: ‘Waswe, pipol luksavve mi man wea no ova tumas, willing for change, and acceptim tingting blo narawan? Or olketa ting mi man wea strict tumas, raf, or strong hed? Waswe, mi lisin lo olketa narawan and sapos fitim willing for followim wanem olketa tingim?’ Taem iumi barava followim example blo Jehovah and Jesus for flexible, datwan bae showaot klia lo hao iumi deal witim olketa narawan. Taem iumi no ova tumas, bae iumi flexible taem situation blo iumi change. Taem situation change, samfala hard taem wea iumi no expectim savve kamap. Maet seknomoa iumi feisim wanfala serious health problem. Or kwiktaem nomoa samting happen lo economy or politik lo kantri and hem barava affectim laef blo iumi. (Eccl. 9:11) Taem theocratic assignment blo iumi change, datwan tu savve testim iumi. Iumi savve change fitim eni situation if iumi duim fofala samting hia: (1) acceptim niu situation blo iumi, (2) tingim wat iumi need for duim, (3) garem positive tingting, and (4) duim samting for helpem narawan. w23.07 21-22 ¶7-8

Profet Daniel hem young man nomoa taem olketa blo Babylon tekem hem farawe from hom blo hem olsem prisoner blo war. Bat nomata hem young, olketa pipol hia admirem hem. Olketa lukim appearance blo Daniel hao hem ‘no garem problem lo body, hem luk naes,’ and hem kam from wanfala important famili. (1 Sam. 16:7) From datwan, olketa blo Babylon trainim hem for kasem spesol privilege lo palace blo king. (Dan. 1:​3, 4, 6) Jehovah lovem Daniel bikos Daniel chus for loyal lo Hem. Luk olsem Daniel hem samting olsem 20 years old nomoa taem Jehovah sei hem raeteous olsem Noah and Job wea faithful for servem Jehovah for staka year. (Gen. 5:32; 6:​9, 10; Job 42:​16, 17; Ezek. 14:14) Daniel garem barava interesting laef and Jehovah gohed for lovem hem lo full laef blo hem.—Dan. 10:​11, 19. w23.08 2 ¶1-2

Taem iu disaed for peim wanfala haos, bae iu laek for lukim seleva evri detail abaotem haos hia wea iu laek for peim. Iumi savve duim sem samting tu taem iumi readim and studyim Bible. If iu just read kwiktaem, maet bae iu lanem nomoa olketa main teaching, wea hem “olketa first samting . . . from message bilong God.” (Heb. 5:12) Bat olsem datfala haos, iu need for studyim Bible for barava minim gud. Best wei for studyim Bible, hem for faendaot hao olketa difren part lo message insaed Bible hem connect tugeta. Trae for minim gud wat iu bilivim, and trae for minim tu why iu bilivim olketa samting hia hem tru. For barava minim gud Bible, iumi mas studyim gud olketa deep truth wea stap insaed. Aposol Paul encouragem olketa brata and sista lo datfala taem for studyim gud Bible mekem olketa “barava minim wanem nao waed, long, hae, and deep” blo truth. Taem olketa duim olsem, datwan bae strongim faith blo olketa. (Eph. 3:​14-19) Iumi need for duim sem samting. w23.10 18¶1-3

Lo Bible iumi savve read abaotem example blo staka pipol wea patient. Hao sapos iu duim study project abaotem olketa example olsem? For example, nomata olketa anointim David taem hem young yet for kamap king blo Israel, hem mas weit for staka year bifor hem king. And tu, Simeon and Anna faithful for worshipim Jehovah taem tufala gohed weitim datfala promis Messiah. (Luke 2:​25, 36-38) Taem iu studyim olketa example olsem, faendem ansa for olketa kwestin hia: Wat nao helpem disfala person for patient? Wanem gud samting nao hem kasem from hem patient? Hao nao mi savve followim example blo hem? Maet iu kasem gud samting tu taem iu lane abaotem olketa wea no patient. (1 Sam. 13:​8-14) Hem gud for tingim: ‘Wat nao maet mekem olketa for no patient? And wanem nogud samting nao olketa kasem?’ w23.08 25 ¶15

Aposol Peter hem loyal, hem no letem eniting for stopem hem for gohed followim Jesus. For example, wantaem Jesus talem samting wea olketa disaepol no minim, bat Peter gohed loyal lo Jesus. (John 6:68) Lo datfala taem, winim for olketa hia askem Jesus for explainim wat hem minim, staka stop for followim hem. Bat Peter no duim datwan, hem luksavve ‘toktok bilong Jesus nomoa savve mekem man laef olowe.’ Jesus savve Peter and olketa nara aposol bae lusim hem. Nomata olsem, Jesus trustim dat Peter bae strong bak and gohed faithful. (Luke 22:​31, 32) Jesus luksavve hao “nomata man savve laekem tumas for duim samting, maet body no strong for duim wanem hem laekem.” (Mark 14:38) Nomata bihaen Peter denyim Jesus, hem no givap lo Peter. Afta Jesus resurrect, hem appear lo Peter taem Peter stap seleva. (Mark 16:7; Luke 24:34; 1 Cor. 15:5) Datwan mas barava encouragem Peter wea sorre tumas lo wat hem duim! w23.09 22 ¶9-10

God forgivim or kavarem sin blo olketa wea garem faith lo hem. Hem barava forgive and no tingim moa sin blo olketa. (Ps. 32:​1, 2) Lo tingting blo God, olketa hia klin and raeteous bikos lo faith blo olketa. Nomata God sei Abraham, David, and olketa narawan wea faithful for worshipim hem olketa raeteous, olketa no perfect. Bat from faith wea olketa garem, God ting lo olketa olsem olketa raeteous, especially taem hem comparem olketa witim pipol wea no garem faith. (Eph. 2:12) Lo leta wea aposol Paul raetem for olketa Christian lo Rome, hem storyim hao iumi mas garem faith mekem iumi savve fren witim God. Abraham and David kamap fren blo God bikos tufala garem faith lo hem. Iumi tu savve kamap fren blo God bikos lo faith blo iumi. w23.12 3 ¶6-7

Distaem iumi garem privilege for givim olketa sakrifaes lo Jehovah olsem for iusim strong, taem, and olketa material samting wea iumi garem for sapotim Kingdom blo God. Iumi showimaot iumi tinghae lo privilege for worshipim Jehovah taem iumi givim olketa best sakrifaes lo hem. Aposol Paul hem storyim samfala samting wea iumi mas duim lo worship blo iumi. (Heb. 10:​22-25) Olketa samting hia nao hem for prea lo Jehovah, storyim hope blo iumi lo pipol, meet tugeta lo kongregeson meeting, and for gohed encouragem each other “moa taem [iumi] lukim datfala day [blo Jehovah] hem kakam klosap.” Angel blo Jehovah talem diswan tufala taem for showim hao datwan hem barava important, hem sei: “Worshipim God!” (Rev. 19:10; 22:9) Hem gud for iumi no forgetim olketa deep spiritual truth wea iumi lanem abaotem nambawan spiritual temple blo Jehovah, and for tinghae lo privilege blo iumi for worshipim God! w23.10 29 ¶17-18

Iumi laek “gohed for lovem iumi evriwan.” Bat hem important for iumi tingim hao Jesus sei “love bilong staka bae no strong nao olsem bifor.” (Matt. 24:12) Jesus no sei dat staka lo olketa disaepol blo hem bae no showimaot love. Bat, iumi need for careful nogud attitude blo pipol lo world affectim iumi. From datwan, iumi bae storyim disfala important kwestin: Wat nao bae helpem iumi for luksavve if love blo iumi for olketa brata and sista hem still strong? Wanfala wei for faendaot if love blo iumi hem still strong, hem for lukim hao iumi deal witim samfala situation. (2 Cor. 8:8) Aposol Peter storyim wanfala situation. Hem sei: “Important samting nao, iufala mas barava lovem narawan, bikos man wea garem love hem evritaem willing for forgivim narawan.” (1 Pet. 4:8) So hao iumi react taem narawan mekem mistek or duim samting wea mekem iumi feel nogud, bae helpem iumi for savve if love blo iumi for olketa hem strong. w23.11 10-11 ¶12-13

If iumi lovem nomoa samfala lo kongregeson, iumi no obeyim yet komand blo Jesus abaotem wei for showimaot love. Hem tru, maet iumi klos lo samfala lo kongregeson winim olketa narawan, olsem Jesus tu hem duim. (John 13:23; 20:2) Nomata olsem, aposol Peter remindim iumi dat iumi shud waka hard for “showimaot love” for olketa brata and sista bikos iumi evriwan wanfala famili. (1 Pet. 2:17) Peter encouragem iumi for ‘barava lovem iumi evriwan from heart.’ (1 Pet. 1:22) Lo disfala context, for “barava” lovem, hem minim for lovem samwan nomata hem no isi for iumi showimaot love lo hem. For example, hao if wanfala brata duim samting wea mekem iumi feel nogud? Hem normal for iumi laek pei bak winim for showimaot love. Bat, Peter lanem from Jesus hao God no hapi lo wei for pei bak. (John 18:​10, 11) Lo leta blo Peter, hem sei: “No changem bak nogud samting wea narawan duim long iufala or tok spoelem man wea tok spoelem iufala. Bat iufala mas tok kaen long hem.” (1 Pet. 3:9) Taem iumi barava lovem narawan, iumi bae kaen and tingim olketa. w23.09 28-29 ¶9-11

Iumi sapraes for lukim hao wanfala pikinini growap fast for kamap adult. Hao olketa growap hem samting wea happen automatic nomoa. Bat for kamap wanfala mature Christian hem samting wea no happen automatic. (1 Cor. 13:11; Heb. 6:1) For kasem datfala aim, iumi need for fren gud witim Jehovah. Iumi needim tu help blo holy spirit taem iumi waka hard for garem olketa wei blo God, lanem olketa practical skill, and redi for duim olketa responsibility blo iumi lo future. (Prov. 1:5) Taem Jehovah wakem human being, hem wakem man and woman. (Gen. 1:27) Lo physical wei, hem isi for luksavve hao olketa man difren from woman, and olketa difren lo olketa nara wei tu. For example, Jehovah wakem olketa man and woman for duim olketa specific responsibility, so olketa need for garem olketa wei and skill wea bae helpem olketa for duim responsibility blo olketa.—Gen. 2:18. w23.12 18 ¶1-2

Hao, Jesus laekem olketa narawan tu for iusim nem blo Dadi blo hem? Yes. Samfala leader blo religion lo datfala taem maet sei for kolem nem blo God hem no showimaot respect. Bat Jesus nating letem olketa teaching olsem wea no kam from Bible for stopem hem for iusim nem blo Dadi blo hem. Tingim taem wea hem kiurim wanfala man lo Gerasenes wea demon spoelem. Olketa pipol barava fraet and begim Jesus for go, so hem lusim datfala ples. (Mark 5:​16, 17) Nomata olsem, Jesus laekem pipol lo there for savve lo nem blo Jehovah. So hem talem man wea hem kiurim for storyim lo pipol, no samting wea Jesus duim, bat samting wea Jehovah duim for hem. (Mark 5:19) Distaem tu, Jesus laekem iumi for helpem pipol evriwea lo world for savve lo nem blo Dadi blo hem! (Matt. 24:14; 28:20) Taem iumi duim datwan, iumi mekem King blo iumi Jesus for hapi. w24.02 10 ¶10

Hem wanfala blessing for iumi insaed organization blo Jehovah lo olketa last day distaem wea no isi. Taem situation lo world gohed for kamap worse, Jehovah provaedem for iumi wanfala spiritual famili wea wan mind. (Ps. 133:1) Hem helpem iumi for strongim love insaed own famili blo iumi. (Eph. 5:33–6:1) And hem givim iumi wisdom for deal witim olketa wari mekem iumi garem peace lo mind. Nomata olsem, iumi mas waka hard for gohed faithful for servem Jehovah. Why? Bikos samfala taem maet iumi feel nogud lo wik point blo narawan. Iumi tu maet faendem hem hard for deal witim olketa wik point blo iumiseleva, especially if iumi duim sem mistek staka taem. Iumi mas no givap for servem Jehovah (1) taem wanfala brata or sista mekem iumi feel nogud, (2) taem marit partner mekem iumi feel nogud, and (3) taem iumi feel nogud lo wat iumiseleva duim. w24.03 14 ¶1-2

Staka taem, iu herem olketa experience blo olketa brata and sista wea reach aot for duim moa samting lo service blo Jehovah. Maet olketa attendim Skul for Olketa Kingdom Evangelizer or muv lo ples wea garem big need. Evritaem pipol blo Jehovah laek for impruv lo olketa difren wei for duim ministry. (Acts 16:9) Bat, hao sapos distaem iu no fit for duim datwan? No comparem iuseleva witim wat olketa narawan duim. For win lo datfala resis wea evri Christian insaed, iumi mas no givap. (Matt. 10:22) No forgetim hao Jehovah barava hapi taem iu duim best blo iu, fitim situation blo iu. Datwan hem wanfala important samting iu savve duim for gohed followim Jesus afta iu baptaes.—Ps. 26:1. w24.03 10 ¶11

Dadi blo iumi lo heven promis for forgivim iumi if iumi repent. (Ps. 86:5) So if iumi really sorre abaotem sin wea iumi duim, iumi savve barava bilivim dat Jehovah forgivim iumi. Remember Jehovah hem flexible and no savve demandim man. Hem no expectim iumi for duim samting winim wat iumi fit for duim. If iumi duim best blo iumi for hem, hem appreciatim datwan. Tingim tu olketa Bible example abaotem olketa wea servem Jehovah witim full heart. Wanfala nao hem aposol Paul. For staka year hem barava waka hard, hem travel for staka thousand kilometer and startim staka niu kongregeson. Bat, taem situation blo Paul mekem hem no fit for duim staka samting lo preaching waka, hao, God no hapi lo hem nao? Nomoa. Paul gohed duim best blo hem, and Jehovah blessim hem. (Acts 28:​30, 31) Lo sem wei, wat iumi fit for duim for Jehovah hem no semsem evritaem. Bat wat hem important lo Jehovah hem why iumi duim. w24.03 27 ¶7, 9

Olketa prea blo Jesus hem gudfala example for olketa disaepol followim. Taem Jesus duim ministry blo hem, hem prea staka taem. From hem busy tumas and staka pipol interest for kam lo hem, Jesus mas markem taem for prea. (Mark 6:​31, 45, 46) Hem getap early morning mekem hem garem taem for prea seleva. Wantaem, bifor hem mekem wanfala important disison hem prea full naet. (Luke 6:​12, 13) And lo naet bifor Jesus dae, hem prea staka taem for helpem hem deal witim last part lo assignment blo hem lo earth wea hem barava no isi. (Matt. 26:​39, 42, 44) Iumi lanem from example blo Jesus hao nomata iumi barava busy, iumi need for markem taem for prea. Olsem Jesus, maet iumi tu need for markem taem lo early morning or leit lo evening for prea. Taem iumi duim datwan, iumi showim lo Jehovah hao iumi tinghae lo disfala present for prea. w23.05 3 ¶4-5

Lo Greek languis, disfala verse showimaot hao love wea Jehovah garem for olketa anointed wan hem strong tumas olsem wata lo wanfala stream wea flow. Olketa anointed Christian savve hao God barava “lovem” olketa. (Jude 1) Aposol John storyim feeling wea olketa garem taem hem sei: “Dadi hem barava lovem iumi! Hem kolem iumi olketa pikinini bilong hem.” (1 John 3:1) Hao, Jehovah lovem olketa anointed Christian nomoa? No, Jehovah duim samting wea showimaot hem lovem iumi evriwan. Wat nao Jehovah duim wea barava confirmim hem lovem iumi? Jehovah provaedem ransom, wea datwan showim bigfala love wea hem garem for iumi!—John 3:16; Rome 5:8. w24.01 28 ¶9-10

Disfala verse storyim wanfala samting wea helpem David for no fraet. Nomata laef blo hem stap lo danger, hem meditate abaotem wat Jehovah bae duim for hem lo future. David savve Jehovah bae rescuem hem lo raet taem. And Jehovah talem finis tu hao David nao bae next king blo Israel. (1 Sam. 16:​1, 13) David barava sure, nomata wat nao Jehovah promisim bae hem happen. Wat nao Jehovah promis for duim for iu? Iumi no expectim Jehovah for protectim iumi from evri problem wea iumi kasem. Bat tingim, eni hard taem wea iu maet feisim distaem, Jehovah bae finisim lo niu world. (Isa. 25:​7-9) Creator blo iumi hem garem bigfala paoa for mekem olketa wea dae for laef bak, for healim olketa sik, and for finisim feeling for sorre.—1 John 4:4. w24.01 6 ¶12-13

Ting abaotem why iu dedicate and baptaes. Iu duim olsem bikos iu laek for saed witim Jehovah. Tingim bak wat nao convincim iu dat iu faendem truth nao. Iu lanem truth abaotem Jehovah, and datwan mekem iu respectim and lovem Dadi blo iu lo heven. Iu start for garem faith and datwan mekem iu repent. Iu lusim olketa nogud wei blo iu and duim wanem God laekem. Iu hapi tumas taem iu luksavve God forgivim iu. (Ps. 32:2) Iu attendim olketa Christian meeting and start for storyim lo olketa narawan olketa naes samting wea iu lanem. From iu dedicate and baptaes finis, distaem iu gohed wakabaot lo road for laef and disaed strong for no lusim datfala road. (Matt. 7:​13, 14) Iumi laek for gohed strong tu for faithful lo worship blo iumi for Jehovah and evritaem obeyim olketa komand blo hem. w23.07 17 ¶14; 19 ¶19

For ting raonem dedication prea blo iu lo Jehovah bae strongim iu for againstim eni temptation. For example, hao, bae iu flirt or duim samting wea showimaot iu laekem waef or hasband blo narawan? Barava nomoa! Iu disaed finis for sei no lo kaen situation olsem. From datwan, bae iu misstim nao wei for sorre tumas wea savve kamap bikos iu letem olketa nogud feeling olsem for stap insaed heart blo iu. Iu bae “tane difren” from “road blo olketa wea wicked.” (Prov. 4:​14, 15) Taem iu tingim wei wea Jesus disaed for mekem Dadi blo hem hapi, datwan bae helpem iu for disaed strong and kwiktaem rejectim eni samting wea bae mekem God no hapi. (Matt. 4:10; John 8:29) Tru nao, olketa hard taem and temptation hem givim iu chance for showim iu disaed strong for gohed followim Jesus. Taem iu duim olsem, bae iu barava sure hao Jehovah bae helpem iu. w24.03 9-10 ¶8-10