December

Waswe, Jehovah garem paoa tu for resurrectim olketa wea dae? Barava nao! Hem nao “Olmaeti God.” (Rev. 1:8) So hem garem bigfala paoa for winim eni enemy, even dae tu. (1 Cor. 15:26) Nara reason why iumi savve Jehovah fit for resurrectim olketa wea dae hem bikos memory blo hem no garem limit. Hem savve lo nem blo evri star. (Isa. 40:26) And hem rememberim tu olketa wea dae finis. (Job 14:13; Luke 20:38) Hem isi nomoa for hem rememberim evri smol samting abaotem olketa wea hem bae resurrectim, olsem wei, lukluk, experience, and memory blo olketa. So hem fitim for iumi bilivim promis blo Jehovah abaotem resurrection lo future bikos iumi savve, hem barava laek for duim and hem garem paoa for duim datwan. Tingim nara reason why iumi bilivim promis blo God abaotem resurrection: Hem bikos Jehovah bin duim finis. Bible storyim hao hem givim paoa lo samfala faithful man, and Jesus tu, for resurrectim samfala wea dae. w23.04 9-10 ¶7-9

If iumi story gud and kaen, maet staka pipol bae willing for lisin and iumi gohed for story. Bat if samwan laek for argue or tok spoelem iumi, iumi shud no gohed story witim hem. (Prov. 26:4) Bat staka pipol bae no olsem, maet olketa bae laek for lisin. Tru nao, taem iumi lane for hambol iumi bae kasem staka gud samting. Prea lo Jehovah for strongim iu for gohed hambol and kaen taem iu ansarem eniwan wea tok spoelem iu or kwestinim biliv blo iu. Remember, taem iu kaen hem savve help for stopem argue for kamap. And taem iu hambol, and talem olketa toktok wea showimaot iu respectim olketa wea lisin, datwan bae muvim olketa for changem tingting blo olketa abaotem iumi and olketa Bible truth. Iumi “mas redi evritaem for ansarem eniwan wea askem kwestin” abaotem bilivim blo iumi, ‘taem iumi duim olsem, iumi mas hambol and showimaot bigfala respect.’ (1 Pet. 3:15) Yes, iumi laek gohed for hambol bikos man wea hambol, hem nao strong! w23.09 19 ¶18-19

Tingim fofala situation wea iumi savve showimaot wei for patient. First wan, man wea patient hem no kros kwiktaem. Hem traem best for stedy nomoa and no pei bak nomata samwan mekem hem kros or hem anda stress. (Ex. 34:6) Second, man wea patient hem hapi nomoa for weit. If samting tek longtaem winim wanem hem expectim, man wea patient bae no taed for weit or feel nogud. (Matt. 18:​26, 27) Third, man wea patient hem no rush. Taem man wea patient kasem important samting for duim, hem bae no rush for duim or rush for finisim. Hem mek sure hem markem inaf taem for duim wanem hem planim, then hem concentrate for finisim insaed taem wea hem markem. Fourth, man wea patient bae traem best for no komplen taem hem deal witim wanfala hard taem. Hem bae gohed for no givap and garem positive attitude. (Col. 1:11) From iumi Christian, iumi need for showimaot wei for patient lo fofala wei hia. w23.08 20-21 ¶3-6

Hem important for protectim tokpiksa heart blo iumi bikos Jehovah lukluk gud lo datwan. Hem savve lo really wei blo iumi and no just wat pipol lukim. Hem bae lovem iumi if iumi fillimap mind witim wisdom blo hem wea givim laef olowe. (John 4:14) Taem olsem, nogud wei blo pipol wea followim Satan and olketa laea blo hem bae no spoelem iumi. (1 John 5:​18, 19) Taem iumi klos fren witim Jehovah, bae iumi barava lovem and respectim hem. From iumi no laek mekem Dadi blo iumi feel nogud, iumi bae no even tingting for duim sin. Marta, wanfala sista lo Croatia kasem temptation for durong. Hem sei: “Mi faendem hard for tingting stret and for faet againstim feeling for laek duim sin wea mekem man hapi for lelebet taem nomoa. Bat from mi fraet lo Jehovah datwan protectim mi.” Hao nao olsem? Marta ting raonem olketa nogud samting wea bae happen if hem duim sin. Iumi tu laek followim example blo Marta. w23.06 20-21 ¶3-4

Jesus luksavve purpose blo Jehovah hem for nem blo Hem kamap holy, and for pruvim evri laea abaotem nem blo Hem no tru. Dastawe, Jesus teachim olketa follower blo hem for prea olsem: “Dadi bilong mifala long heven, mifala laekem nem bilong iu for holy.” (Matt. 6:9) Jesus savve hao diswan hem wanfala big issue wea evriwan feisim. Jesus nomoa mekhae lo nem blo Dadi blo hem winim eni narawan lo full universe. Bat taem olketa enemy arrestim Jesus, olketa accusim hem and sei hem barava no respectim Dadi blo hem. For sure, Jesus luksavve dat for tok spoelem holy nem blo God, hem wanfala worst sin. Hem barava wari nogud olketa accusim hem and sei hem guilty lo datfala crime. Masbi datwan nao main reason why Jesus “wari fogud” lo olketa hour bifor olketa arrestim hem.—Luke 22:​41-44. w24.02 11 ¶11

Lo reis for laef, love blo iumi for Jehovah and Jesus mas winim love blo iumi for olketa relative. (Matt. 10:37) Bat datwan no minim iumi mas ignorem famili responsibility blo iumi from iumi tingse datwan bae mekem God and Christ no hapi lo iumi. Bat for God and Christ hapi lo iumi, iumi need for duim famili responsibility blo iumi. (1 Tim. 5:​4, 8) Taem iumi duim datwan, iumi bae hapi. Jehovah designim olketa famili for hapi taem hasband and waef lovem and respectim each other, taem parents lovem and trainim olketa pikinini, and taem olketa pikinini obeyim parents. (Eph. 5:33; 6:​1, 4) Nomata wat nao responsibility blo iu insaed famili, trustim wise advaes lo Bible and no followim nomoa feeling, culture, or advaes from olketa expert. Duim research lo olketa Bible pablikeson blo iumi. Olketa pablikeson hia garem olketa practical idea lo hao for followim olketa Bible principle. w23.08 28 ¶6-7

Wanfala Christian sista need for lanem olketa practical skill. Samfala skill wea wanfala gele lanem taem hem smol bae helpem hem lo laef. For example, wei for lane for read and raet gud. Lo samfala culture, olketa no ting dat for read and raet hem wanfala important skill wea olketa gele shud lanem. Bat hem gud and important for evri Christian lane for read and raet. (1 Tim. 4:13) So nomata hem no isi, no letem eniting stopem iu for lane for read and raet. Hao nao datwan bae helpem iu? Hem savve helpem iu for faendem waka for selen and duim gud. And tu, bae hem isi for iu studyim Bible and teachim lo olketa narawan. And important samting, from iu savve read datwan bae helpem iu for ting raonem gud Bible taem iu readim, and iu bae fren klos witim Jehovah.—1 Tim. 4:15. w23.12 20 ¶10-11

Askem Jehovah for helpem iumi winim temptation. From iumi no perfect, iumi stragol evritaem for againstim temptation for duim samting wea no stret. Satan waka hard for mekem wei wea iumi stragol hem hard go moa. Wanfala samting wea hem iusim for trae spoelem tingting blo iumi, hem nogud entertainment. Nogud entertainment savve fulimap mind blo iumi witim olketa rabis tingting wea mekem iumi for no klin front lo Jehovah, and mekem iumi for duim bigfala sin. (Mark 7:​21-23; Jas. 1:​14, 15) If iumi laek winim temptation for duim wanem hem no stret, iumi needim Jehovah for helpem iumi. Jesus storyim datwan tu lo datfala Lord’s Prea. Hem sei: “Helpem mifala for no foldaon long eni samting wea switim mifala for duim wanem hem no stret.” (Matt. 6:13) Jehovah laek for helpem iumi, bat iumi mas askem hem for datwan. Iumi mas duim best tu for followim olketa prea blo iumi. w23.05 6-7 ¶15-17

Taem wanfala couple tinghae lo frenship blo tufala witim Jehovah, tufala bae willing for followim advaes blo hem, and datwan bae helpem tufala for avoidim and winim olketa problem wea savve mekem love blo tufala for each other for cold daon. Olketa wea fren gud witim Jehovah duim best tu for followim olketa wei blo hem, olsem for kaen, patient, and forgivim each other. (Eph. 4:32–5:1) Taem couple garem olketa wei olsem, bae hem isi for tufala barava lovem each other. Sista Lena, wea marit for winim 25 year finis sei: “Hem isi for lovem and respectim man wea lovem God.” Tingim disfala Bible example. Taem Jehovah mas chusim wanfala couple for kamap parents blo datfala Messiah, Hem chusim Joseph and Mary nomata staka kam from laen from David. Why nao olsem? Bikos tufala evriwan fren gud witim Jehovah, and Jehovah savve love blo tufala for Hem bae strongim marit blo tufala. w23.05 21 ¶3-4

Nomata Leader blo iumi Jesus hem perfect, olketa wea hem iusim for leadim iumi no perfect. Maet hem no isi for obeyim olketa, especially if olketa askem iumi for duim samting wea iumi no laekem. Wantaem aposol Peter kasem instruction wea firstaem hem no laek obeyim. Taem Peter kasem instruction from angel for kaikaim olketa animal wea Law blo Moses sei hem no klin, Peter les for kaikaim, no wanfala taem nomoa bat thrifala taem! (Acts 10:​9-16) Why nao olsem? Bikos datfala niu direction no mek sense lo Peter. Bat aposol Paul obey taem olketa elder lo Jerusalem talem hem for tekem fofala man go lo temple, and duim samting followim law for kamap klin for showim hem followim Law. Paul savve olketa Christian no stap anda lo Law, and hem no duim eniting rong. Nomata olsem, “long next day, Paul hem go witim olketa man hia and olketa duim samting followim law for kamap klin.” (Acts 21:​23, 24, 26) From Paul obey, datwan help for keepim wan mind.—Rome 14:​19, 21. w23.10 10 ¶15-16

Maet iu no ting dat wei for fraet hem important for wanfala gud frenship. Bat samwan wea laekem Jehovah for kamap klos fren blo hem, hem mas “fraet lo Jehovah.” Nomata iumi bin servem Jehovah for longtaem, iumi evriwan need for garem stretfala wei for fraet lo Jehovah. Bat wat nao hem minim for fraet lo God? Samwan wea fraet lo God lo stretfala wei hem lovem God and no laek duim eniting wea bae spoelem frenship blo hem witim God. Jesus garem datkaen wei for “fraet lo God.” (Heb. 5:7) No enitaem Jesus garem negative wei for fraet lo Jehovah. (Isa. 11:​2, 3) Bat hem barava lovem Jehovah and laek for obeyim hem. (John 14:​21, 31) Olsem Jesus, iumi barava respectim and tinghae lo Jehovah bikos hem garem love, wisdom, justice, and bigfala paoa. Iumi savve tu Jehovah lovem iumi, and wanem iumi duim for followim teaching blo hem savve affectim hem. Iumi savve mekem Jehovah feel sorre or mekem heart blo hem hapi.—Ps. 78:41; Prov. 27:11. w23.06 14 ¶1-2; 15 ¶5

Taem King Uzziah garem bigfala paoa, hem forgetim nao evri gud samting wea Jehovah duim for hem. Wat nao iumi lanem? Iumi shud tingim dat evri blessing and privilege wea iumi kasem, hem from Jehovah. Winim for tok praod abaotem olketa samting wea iumi duim, iumi shud praisem Jehovah bikos hem nao helpem iumi for duim olketa samting hia. (1 Cor. 4:7) Iumi mas hambol for luksavve hao iumi no perfect and iumi needim discipline. Wanfala brata wea samting olsem 60 years old sei: “Mi lane for no feel nogud taem olketa narawan luksavve lo mistek blo mi. Samfala taem mi kasem discipline bikos lo olketa karangge mistek wea mi duim, nomata olsem mi trae for impruv lo datwan and gohed duim best blo mi for Jehovah.” Taem iumi obeyim Jehovah and gohed hambol, bae iumi garem hapi laef.—Prov. 22:4. w23.09 10 ¶10-11

Olketa Christian lo first century need for no givap. Olketa garem olketa sem problem wea olketa narawan garem, and olketa feisim tu olketa nara hard taem. For example, staka kasem persecution from olketa bigman blo Jew religion, olketa bigman blo Rome, and from famili blo olketa seleva tu. (Matt. 10:21) And insaed kongregeson, samfala taem olketa need for faet againstim teaching blo olketa apostate wea savve divaedem kongregeson. (Acts 20:​29, 30) Nomata olsem, olketa gohed faithful and no givap. (Rev. 2:3) Wat nao helpem olketa? Olketa ting abaotem olketa Bible example bifor, olsem Job wea no givap. (Jas. 5:​10, 11) Olketa prea for God strongim olketa. (Acts 4:​29-31) And olketa gohed tingim hao if olketa no givap, Jehovah bae rewardim olketa. (Acts 5:41) Iumi tu bae no givap if iumi studyim and ting raonem example blo olketa wea no givap wea Bible and olketa pablikeson blo iumi storyim. w23.07 3 ¶5-6

Jehovah and Jesus bae no givap lo iumi nomata iumi garem olketa wik point. Bihaen aposol Peter denyim Jesus, hem need for mekem wanfala important disison. Hao, bae Peter givap or bae hem still gohed disaepol blo Christ? Jesus prea lo Jehovah for strongim faith blo Peter for no wikdaon. Jesus talem Peter abaotem datfala prea and trustim hao gogo Peter bae gohed strongim olketa brata blo hem. (Luke 22:​31, 32) Taem hem tingim bak olketa toktok blo Jesus, datwan mas barava encouragem hem! Taem iumi feisim samfala important disison, Jehovah savve iusim olketa shepherd wea kea for encouragem iumi for gohed faithful. (Eph. 4:​8, 11) Olsem Jehovah provaedem olketa material need blo Peter and olketa nara aposol, Jehovah bae provaedem material need blo iumi tu taem iumi putim Kingdom first samting lo laef blo iumi. w23.09 24-25 ¶14-15

Jehovah lukim nomata smol samting wea iumi duim for kaen lo olketa narawan. Hem ting lo datwan olsem best sakrifaes and kaon wea hem nao bae changem. If iu wanfala ministerial servant or elder bifor, Jehovah no forgetim waka wea iu duim bifor and love wea iu garem for datwan. (1 Cor. 15:58) Hem lukim tu love wea iu gohed for showimaot. Jehovah laekem iumi evriwan for strongim love blo iumi for hem and for olketa narawan. Iumi savve duim datwan taem iumi readim Bible, ting raonem, and prea evritaem lo Jehovah. Iumi savve strongim love blo iumi for olketa brata and sista taem iumi duim samting for helpem olketa. Taem iumi garem strongfala love, bae iumi fren klos witim Jehovah and olketa brata and sista. And bae iumi enjoyim frenship blo iumi for olowe! w23.07 10 ¶11; 11 ¶13; 13 ¶18

Each Christian mas disaedem seleva hao for lukaftarem health blo hem. Nomata Bible no talem staka law abaotem health, tufala law wea Christian need for obeyim taem hem chusim medical treatment, hem nao for stap klia lo blood and spiritism. (Acts 15:20; Gal. 5:​19, 20) Olketa nara samting saed lo health, man seleva savve disaedem. Nomata which treatment nao iumi tingse hem best, iumi mas respectim raet blo olketa brata and sista abaotem eni disison blo olketa saed lo health. For helpem iumi, tingim fofala point hia: (1) Only Kingdom blo God nomoa savve finisim sik. (Isa. 33:24) (2) Each Christian “mas barava sure long” which treatment nao hem best for hem. (Rome 14:5) (3) No judgem olketa narawan or duim eni samting wea bae mekem olketa stambol. (Rome 14:13) (4) Olketa Christian showimaot love and tingim dat wei for wan mind lo kongregeson hem important winim wanem olketa seleva tingse hem best.—Rome 14:​15, 19, 20. w23.07 24 ¶15

Waswe, frenship blo iu witim Jehovah hem barava important lo iu? For sure, iu duim datwan! Since bifor yet, staka pipol tu feel olsem. (Ps. 104:​33, 34) Staka mekem olketa sakrifaes for worshipim Jehovah. Hem nao samting wea olketa Nazirite lo Israel bifor duim. Word Nazirite hem minim for dedicate for wanfala spesol waka. Disfala word hem fitim olketa Israelite wea lovem Jehovah wea mekem samfala personal sakrifaes for servem Jehovah lo spesol wei. Anda lo Law blo Moses, wanfala man or woman savve mekem wanfala spesol vow lo Jehovah taem hem chus for kamap Nazirite for wanfala taem period. (Num. 6:​1, 2) Taem wanfala Israelite mekem vow for kamap Nazirite, hem mas followim olketa gaedlaen wea evri nara Israelite no followim. So why nao wanfala Israelite disaed for mekem vow for kamap Nazirite? Luk olsem, hem duim datwan bikos hem lovem Jehovah and barava tinghae lo olketa blessing wea hem kasem from Jehovah.—Deut. 6:5; 16:17. w24.02 14 ¶1-2

Lo Bible, datfala Hebrew word “loyal,” or “loyal love,” hem minim for barava lovem samwan and no laek for lusim hem. Staka taem Bible iusim disfala toktok for describem love wea God garem for pipol blo hem. Bible iusim datfala sem word for describem love wea pipol blo God showim for each other. (2 Sam. 9:​6, 7) Hem savve tek taem for loyal fasin blo iumi hem strong go moa. Bae iumi lukim hao diswan hem tru for Daniel. Lo full laef blo Daniel, loyal fasin blo hem lo Jehovah hem kasem test. Bat, taem hem 90 years hem kasem wanfala big test winim eni narataem. Olketa hae official lo palace blo king les lo Daniel and nating respectim God blo hem. So olketa mekem plan for killim dae Daniel. Olketa mekem king for saenem wanfala law wea bae testim Daniel, if hem bae loyal lo God or lo king. Only samting Daniel need for duim for pruvim hem loyal lo king hem for stop for prea lo Jehovah for 30 days. Bat Daniel disaed for loyal lo Jehovah.—Dan. 6:​12-15, 20-22. w23.08 5 ¶10-12

Jehovah laekem iumi for no givap for showimaot love lo olketa brata and sista. If wanfala brata or sista fail for duim stret samting, hem gud for iumi tingim hao really hem laek for followim Bible principle, bat maet hem no tingting gud nomoa. (Prov. 12:18) Jehovah lovem olketa faithful servant blo hem nomata olketa garem wik point. Nomata iumi mekem olketa mistek, hem no lusim iumi and no gohed for kros. (Ps. 103:9) Hem barava important for followim wei blo Dadi blo iumi for forgivim narawan! (Eph. 4:32–5:1) Tingim tu, bikos end hem barava klosap, iumi need for fren gud witim olketa brata and sista. Iumi expectim staka persecution. Maet iumi end ap lo prison bikos lo faith blo iumi. If datwan happen, iumi bae needim sapot blo olketa brata and sista winim eni narataem.—Prov. 17:17. w24.03 15-16 ¶6-7

Bible storyim tu olketa nara young wan wea fren klos witim Jehovah, duim wat hem hapi lo hem, and garem hapi laef. David hem wanfala lo olketa. Taem David young, hem chus for fren witim God and bihaen hem kamap wanfala loyal king. (1 Ki. 3:6; 9:​4, 5; 14:8) Taem iu study abaotem laef blo David, example blo hem bae encouragem iu for gohed faithful for servem Jehovah. Or iu savve duim wanfala study project abaotem example blo Mark and Timothy. Olketa start for worshipim Jehovah taem olketa barava young and gohed faithful for servem hem. Disison blo olketa for worshipim Jehovah, hem mekem Jehovah hapi and olketa tu hapi. Wat iu chus for duim distaem bae hem affectim laef blo iu lo future. If iu trustim Jehovah and no depend nomoa lo own understanding blo iu, Jehovah bae helpem iu for mekem olketa wise disison. Iu bae satisfae and enjoyim laef. Remember, Jehovah tinghae lo wat iu duim for hem. For iusim laef blo iu for worshipim Dadi blo iu lo heven wea lovem iu, hem gud winim eni nara samting. w23.09 13 ¶18-19

Aposol Paul savve olketa brata and sista no perfect. For example, taem hem start for associate witim kongregeson lo Jerusalem, samfala no trustim dat hem wanfala disaepol. (Acts 9:26) Bihaen, samfala talem olketa nogud samting wea spoelem reputation blo hem. (2 Cor. 10:10) Paul lukim wanfala elder mekem wanfala rong disison wea maet mekem olketa narawan for stambol. (Gal. 2:​11, 12) And Mark wea hem wanfala gud fren blo hem, duim samting wea mekem hem feel nogud. (Acts 15:​37, 38) Hem isi tumas for Paul letem olketa situation hia for mekem hem for no laek associate witim olketa. Nomata olsem, hem gohed garem positive tingting abaotem olketa brata and sista and continue for servem Jehovah. Wat nao helpem Paul for no givap? Paul lovem olketa brata and sista. From Paul lovem olketa, hem no focus lo wik point blo olketa, bat focus lo gudfala wei blo olketa. Love helpem Paul tu for followim wat text for tuday storyim. w24.03 15 ¶4-5

Staka story lo Bible showimaot dat hem barava important for hambol. Tingim example blo Isaac. Taem Isaac stap lo land blo olketa Philistine lo Gerar, olketa neiba blo hem wea jealous stopem hem for iusim olketa well wea olketa servant blo dadi blo hem digim. Instead for Isaac faet for raet blo hem, Isaac lusim datfala ples and digim olketa nara well moa. (Gen. 26:​12-18) Bat olketa Philistine claimim dat olketa well hia hem blo olketa tu. Nomata olsem, Isaac duim samting for keepim peace. (Gen. 26:​19-25) Wat nao helpem Isaac for gohed hambol taem olketa narawan laek for mek trabol for hem? For sure, Isaac lukim gud example blo dadi blo hem Abraham, and hem lanem staka samting from wei blo hem for keepim peace. And hem lane tu from example blo mami blo hem Sarah, wea “kwaet and hambol.”—1 Pet. 3:​4-6; Gen. 21:​22-34. w23.09 15 ¶4

Lo taem wea Jehovah markem, hem sendem kam firstborn Son blo hem lo earth for teachim pipol abaotem datfala Kingdom, and givim laef blo hem for sevem iumi from sin and dae. Then Jehovah resurrectim Jesus and Jesus go bak lo heven for rul lo Kingdom blo God. Jehovah bae iusim datfala Kingdom for mekhae lo nem blo hem taem hem fulfillim plan blo hem for disfala earth, and datwan nao main theme blo Bible. Plan blo Jehovah no savve change. Hem sei bae hem duim evri samting wea hem promisim. (Isa. 46:10 ftn.; Heb. 6:​17, 18) Gogo, earth bae kamap paradaes, and evriwan wea kam from laen blo Adam bae raeteous and enjoyim “laef olowe.” (Sams 22:​26, SIPB.) Bat hem no datwan nomoa Jehovah bae duim. Hem bae mekem evriwan lo heven and earth for wan mind tu. Then evriwan lo full universe bae gohed loyal for obeyim Jehovah wea hem Ruler blo iumi. (Eph. 1:​8-11) Iumi barava tinghae lo wat Jehovah duim for mekem plan blo hem kamap tru. w23.10 20 ¶7-8

No longtaem bihaen olketa Jew wea lusim Babylon arrive lo Jerusalem, olketa feisim hard taem saed lo selen, gavman blo kantri no stable, and pipol againstim olketa. Datwan mekem samfala for no focus lo waka for buildim bak temple blo Jehovah. So, Jehovah sendem profet Haggai and Zechariah for encouragem olketa, and datwan helpem olketa for strong for duim moa waka blo Hem. (Hag. 1:1; Zech. 1:1) Bat, klosap 50 year bihaen, olketa Jew needim encouragement moa. So, Ezra, man wea garem skill for copyim Law, hem kam lo Jerusalem from Babylon for encouragem olketa for focus lo tru worship. (Ezra 7:​1, 6) Olketa profesi wea Haggai and Zechariah talem helpem pipol blo God bifor for gohed trustim Jehovah nomata enemy againstim olketa. Olketa profesi hia savve helpem iumi tu distaem for gohed trustim hao Jehovah bae sapotim iumi nomata taem laef hem hard.—Provebs 22:​19, SIPB. w23.11 14-15 ¶2-3

Wat nao iumi savve duim for showim iumi lovem olketa brata and sista? Wanfala wei, hem for comfortim olketa. Iumi bae “gohed . . . comfortim” each other if iumi garem feeling for tingim narawan. (1 Thess. 4:18) Hao nao iumi savve gohed strongim love blo iumi for each other? Taem iumi forgivim mistek blo olketa brata and sista nomata hem no isi. Why nao iumi need for showimaot love lo each other distaem? Peter sei: “Taem wea evri samting bae finis hem klosap nao. So . . . iufala mas barava lovem narawan.” (1 Pet. 4:​7, 8) From end blo disfala nogud world hem barava klosap, wat nao iumi expectim? Jesus sei lo olketa follower blo hem: “Long evri kantri bae olketa heitim iufala bikos iufala olketa disaepol bilong mi.” (Matt. 24:9) For iumi gohed faithful lo Jehovah, iumi need for garem wan mind. If iumi lovem olketa brata and sista, Satan bae no savve divaedem iumi bikos love hem no savve divaedem iumi.—Phil. 2:​1, 2. w23.11 13 ¶18-19

Truth wea stap lo Bible, hem barava paoaful. Taem iumi teachim pipol abaotem Jehovah and wat kaen person nao hem, bae iumi lukim positive result. Pipol bae olsem iumi tu, olketa bae luksavve lo olketa laea blo Satan, and start for savve lo olketa naesfala wei blo Jehovah. Olketa sapraes tumas lo bigfala paoa blo Jehovah. (Isa. 40:26) Olketa lane tu for trustim hem bikos hem showim perfect justice. (Deut. 32:4) Olketa lanem staka samting from bigfala wisdom blo hem. (Isa. 55:9; Rome 11:33) And olketa hapi for savve dat Jehovah hem love. (1 John 4:8) Taem olketa fren klos witim Jehovah, olketa bae sure lo hope blo olketa for laef olowe. Hem spesol privilege for helpem pipol for fren klos witim Jehovah! Taem iumi duim datwan, Jehovah ting lo iumi olsem “iumi waka tugeta” witim hem.—1 Cor. 3:5. w24.02 12 ¶15

If iu wanfala Bible student or iu growap lo famili wea parents blo iu Witness, hao, iu tingting for baptaes? Datwan hem naes goal! Bat bifor iu baptaes, iu bae need for dedicatem iuseleva lo Jehovah. Hao nao iu savve dedicate lo Jehovah? Iu talem wanfala prea lo Jehovah and promis for worshipim hem nomoa and for mekem will blo hem kamap main samting lo laef blo iu. Then iu promisim Jehovah dat bae iu go ahed for lovem hem lo “full heart bilong iu, long full soul bilong iu, long full mind bilong iu, and long full strong bilong iu.” (Mark 12:30) Dedication hem personal samting between iu and Jehovah nomoa. Bat, baptism hem samting wea evriwan bae lukim for showim iu dedicate finis lo Jehovah. Dedication wea iu mekem hem wanfala important promis and iu barava laek for keepim datfala promis and Jehovah expectim iu for duim datwan.—Eccl. 5:4. w24.03 2 ¶2; 3 ¶5

Hard taem savve kamap insaed evri marit. Bible sei “olketa wea marit bae kasem hard taem long laef bilong olketa.” (1 Cor. 7:28) Why? Bikos tufala wea marit no perfect and wei blo tufala and wat tufala laekem and no laekem hem difren. Tufala maet garem difren culture or baekgraon. Maet gogo, really wei blo tufala showaot klia bihaen tufala marit. Olketa samting olsem savve isi for mekem narawan feel nogud. Instead for luksavve hao tufala evriwan contribute lo datfala problem and shud duim samting for stretem, tufala maet blamem each other. Maet tufala tingse, for stretem datfala problem tufala bae separate or divorce. Bat hao, datwan nao bae stretem problem? No. Jehovah laekem olketa wea marit for respectim marit arrangement nomata maet hem no isi for stap witim marit partner blo olketa. w24.03 16 ¶8; 17 ¶11

Bihaen iu dedicate and baptaes, hope blo iu for laef olowe lo paradaes earth bae gohed for kamap strong taem iu lanem staka samting abaotem Jehovah and bae iu lovem hem go moa. (Heb. 5:13–6:1) And iu bilivim wat Rome 5:​2-4 talem hem barava tru. Iu kasem staka hard taem, bat iu no givap and iu luksavve God hapi lo iu. From iu savve God lovem and hapi lo iu, iu barava sure bae iu kasem samting wea hem promisim. And hope blo iu hem strong moa winim bifor. Hem real lo iu and barava affectim iu. Hem influencim evri samting lo laef blo iu and changem hao iu treatim famili blo iu, hao iu mekem olketa disison, and hao iu iusim taem blo iu. Aposol Paul talem nara important point abaotem hope wea iu garem afta God appruvim iu. Hem assurem iu hao hope wea iu garem bae kamap tru.—Rome 15:13. w23.12 12-13 ¶16-19

Taem iumi kasem wanfala hard taem, maet feeling, tingting, and wat iumi duim hem no balance olsem bifor. Olsem wanfala ship lo raf sea wea olketa wave bangam and no savve stedy, olketa negative feeling savve mekem iumi for no stedy. Taem iumi start for garem olketa feeling olsem, hao nao Jehovah helpem iumi? Hem promis hao hem bae strongim iumi. Taem ship hem meetim wanfala storm lo sea, hem savve seksek fogud. For keepim ship stedy, staka ship garem stabilizer andanit lo ship lo each saed blo hem. Olketa stabilizer hia savve helpem ship for no rola tumas. Datwan mekem pipol lo ship for feel sef and comfortable. Bat, olketa stabilizer hia savve waka gud taem ship muv forward. Olsem tu, Jehovah bae strongim iumi for balance taem iumi gohed for faithful lo hem taem iumi kasem hard taem. w24.01 22 ¶7-8

Taem iu fraet, tingim diswan, ‘Wat nao olketa samting wea Jehovah duim finis?’ Ting abaotem creation blo hem. For example, “lukluk gud” lo hao Jehovah kea for olketa bird and flaoa nomata hem no creatim olketa for garem wei blo hem and no savve worshipim hem. So hao mas moa iumi, Jehovah bae barava kea for iumi. Taem iumi meditate abaotem datwan, hem bae barava strongim trust blo iumi lo Jehovah. (Matt. 6:​25-32) Tingim tu wat Jehovah duim finis for olketa wea worshipim hem. Maet iu studyim example blo samwan lo Bible wea garem strong faith, or maet iu readim experience blo samwan wea worshipim Jehovah distaem. And tu, ting abaotem hao Jehovah bin kea for iu. Hao nao hem leadim iu for kam lo truth? (John 6:44) Hao nao hem ansarem olketa prea blo iu? (1 John 5:14) Hao nao iu kasem gud samting from ransom sakrifaes blo Son blo hem evriday?—Eph. 1:7; Heb. 4:​14-16. w24.01 4 ¶6; 7 ¶17