Iu Fit for Savve Long Future!
Planti pipol tingting strong abaotem future. Olketa laek for plan ahed, mekem selen long wisefala wei, and for feel sef. Bat waswe, eni wei stap for sure abaotem wanem nao bae happen long future?
OLKETA man traem enikaen samting for savve wanem nao bae happen long future. Olketa scientist wea studyim future lukluk gud long olketa samting wea happen and then trae for disaedem future from diswan. Olketa economist duim diswan tu. Olketa wea studyim star and duim divination luk long star, crystal ball, and spiritism, and staka pipol bilivim olketa. Wanfala example nao hem datfala man bilong France for studyim star, Nostradamus, wea pipol tinghae long hem yet nomata hem dae planti handred year finis.
Olketa hia wea sei olketa profet kamap pipol wea olketa man no fit for trustim. Why nao olsem? Bikos olketa nating tingim Jehovah God and Word bilong hem, Bible. Diswan nao mekem olketa no fit for ansarem olketa main kwestin olsem: ‘Why nao mi fit for sure olketa profesi insaed Bible bae happen? Hao nao olketa join witim purpose bilong God for olketa man? Hao nao famili bilong mi and miseleva savve kasem gud samting from olketa profesi hia?’ Bible nao ansarem olketa kwestin hia.
Bible profesi hem moabeta long olketa nara wei tu. Long wei wea difren from wei for talem future wea man kasem from olketa star, Bible letem man iusim free will. So, no eni man garem laef wea hem no savve changem. (Deuteronomy 30:19) Olketa raeting olsem bilong Nostradamus no garem mining, and olketa trae for haedem diswan witim wei for sei man no fit for savve evribit and witim stael toktok. Bat Bible profesi garem strongfala faondeson. Hem explainim why nao God bae duim samting olsem hem talem hem bae duim. (2 Chronicles 36:15) And olketa profesi bilong Jehovah nating savve fail, from “God . . . kanduit laea.” (Titus 1:2) Dastawe living bilong pipol wea Word bilong God gaedem garem mining, purpose, and hapi living, and olketa no westem important taem and material samting bilong olketa for aftarem iusles goal.—Psalm 25:12, 13.
Olketa point hia and planti moa kamap long 1999/2000 “Profesi Toktok Bilong God” Distrik Convention bilong Olketa Witness Bilong Jehovah wea kamap evriwea long world. Olketa tok, interview, demonstration, and wanfala Bible drama hem pullim tingting bilong audience go long nambawan spiritual present wea olketa wea studyim and followim profesi toktok bilong God kasem. Nextfala article bae luk bak long olketa haelaet bilong datfala convention.