Profesi Toktok Bilong God Givim Hope for Future
WORD bilong God, Holy Bible, mekem olketa tru Christian for luk long future witim faith, hope, and hapi. From wei wea olketa barava fren witim Jehovah God, olketa luk forward long tomorrow. Olsem opening tok bilong “Profesi Toktok Bilong God” Distrik Convention talem, Olketa Witness Bilong Jehovah barava studyim gud Bible for planti year. So wanem nao Jehovah offerim long pipol bilong hem long olketa convention hia? Witim Bible bilong olketa, evriwan wea attend barava want for faendaot. Theme for evri day bilong convention stap long olketa difren subheding.
FIRST DAY: Wakabaot Long Laet From Word Bilong God
Datfala tok “Word Bilong God Leadim Iumi” hem explainim wei wea pipol bilong Jehovah olketa olsem wanfala man wea startim wanfala gogo long darkness bilong naet. Taem sun start for kamap, hem lukim olketa shadow, bat taem sun barava long midol skae, hem lukim klia. Olsem profesi long Proverbs 4:18 talem, sunlaet from truth long profesi toktok bilong God givim kliafala gaedens long pipol bilong Jehovah. Olketa no stambol long spiritual darkness.
Datfala tok bilong theme, “Lisin Gud Long Profesi Toktok Bilong God,” strongim long olketa wea lisin hao olketa wea luk go long Jehovah no kasem sorre and giaman hope wea pipol wea followim olketa giaman Christ and giaman profet olketa kasem. Long wei wea barava difren, olketa pruv hao Jesus Christ nao hem Messiah hem staka! Olsem example, mirakol wei wea Jesus hem change and kasem glory antap long maunten hem point go long Jesus olsem King long Kingdom bilong God. From taem hem kamap King long 1914, Jesus tu hem datfala “daystar” wea 2 Peter 1:19 story abaotem. Speaker hem sei: “Olsem Messiah Daystar, hem showimaot start bilong wanfala niu day, or taem, wea start for evri man wea obey.”
For introducem aftanun program, disfala tok “Shaen Olsem Olketa Laet” hem minim gud Ephesians 5:8, wea aposol Paul kaonselem iumi for “go ahed for wakabaot olsem olketa pikinini bilong laet.” Olketa Christian shaen olsem laet, no thru long wei for sharem Word bilong God witim pipol nomoa bat tu thru long wei for followim example bilong Jesus for live followim Bible.
For shaen long disfala wei, iumi mas “Garem Bigfala Hapi Long Wei for Readim Word Bilong God.” Olketa storyim disfala theme insaed wanfala tok wea garem thrifala part. Bihaen hem talem toktok bilong Abraham Lincoln, wea kolem Bible “nambawan present wea God givim long man,” firstfala speaker askem audience wanem nao reading schedule bilong olketa showimaot abaotem wei wea olketa tinghae long Word bilong Jehovah. Hem encouragem olketa wea lisin for readim Bible gud, iusim taem for piksarem long mind olketa Bible story and for joinim olketa niu point go long olketa samting iumi lanem finis.
Next part bilong disfala tok mekhae long wei for study, no for read nomoa, mekem iumi kasem and minim ‘strongfala kaikai.’ (Hebrews 5:13, 14) Speaker hem sei study bae barava buildimap iumi sapos iumi ‘redyim heart bilong iumi’ firstaem, olsem Israelite priest Ezra hem duim. (Ezra 7:10) Bat why nao study hem barava important? Bikos hem barava affectim wei wea iumi fren witim Jehovah. Dastawe nao Bible study need for kamap samting wea spesol long iumi, wea iumi hapi long hem, and strongim iumi, nomata hem needim wei for disciplinem mind and waka hard. Hao nao iumi savve faendem taem for study gud? Thru long wei for “baem taem wea fitim” from olketa samting wea no mas important, lastfala speaker bilong disfala tok hem talem. (Ephesians 5:16) Yes, key for faendem taem hem for iusim gud taem wea iumi garem.
Disfala tok “God Givim Paoa Long Taed Wan” talemaot wei wea planti pipol distaem olketa taed. For mekem iumi garem “paoa wea winim wanem iumi garem” for Christian ministry, iumi need for depend long Jehovah, wea “givim paoa long man wea taed.” (2 Corinthians 4:7; Isaiah 40:29) Olketa samting for givim iumi paoa hem Word bilong God, prea, Christian kongregeson, share evritaem long ministry, olketa Christian overseer, and faithful example bilong nara pipol. Disfala theme “Kamap Olketa Teacher Fitim Taem Hia” hem mekhae long need for olketa Christian kamap man for preach and teacher tu and for waka hard for garem “gudfala wei for teach.”—2 Timothy 4:2.
Lastfala tok bilong disfala day, “Olketa Wea Faet Againstim God Bae No Win,” tok lelebet abaotem wei wea samfala kantri giaman for kolem Olketa Witness Bilong Jehovah olketa danger cult. Bat iumi no need for fraet, from Isaiah 54:17 hem sei: “‘Eni samting for faet againstim iu bae no win, and eni toktok wea bae kam againstim iu long datfala judgment bae iu daonem. Diswan hem samting wea olketa servant bilong Jehovah bae garem, and raeteous fasin bilong olketa hem kam from mi,’ hem nao toktok bilong Jehovah.”
MEK-TU DAY: Olketa Samting wea Showaot Thru Long Bible Profesi
Bihaen wei for storyim Bible text, olketa wea hipap enjoyim mek-tu thrifala-part tok bilong convention, wea garem theme “Givim Glory Long Jehovah Olsem Pipol Wea Karem Laet.” Firstfala tok showimaot goal bilong olketa Christian hem for givim glory long Jehovah thru long wei for preach evriwea. Nextfala part talem need for leadim olketa wea acceptim gud nius go long organization bilong God. Long wanem wei? Long wei for iusim faev or ten minute bifor or bihaen evri hom Bible study for minim olketa waka wea organization bilong God duim. Mek-thri tok bilong disfala thrifala-part tok strongim need for givim glory long God thru long gudfala waka.
Disfala tok “Barava Lovem Kaonsel Wea Jehovah Talem Moa” hem storyim samfala verse bilong Psalm 119. Tru nao, iumi needim olketa reminder, from iumi evriwan savve forget. So hem barava important for iumi mekem grow love for olketa reminder bilong Jehovah, olsem man wea raetem psalm hem duim!
Then wanfala spesol part kamap—baptism tok wea garem theme “Wei for Obeyim Profesi Toktok Lead Go for Baptaes.” Olketa wea bae baptaes kasem reminder hao olketa followim Christ no just thru long wei for baptaes bat tu thru long wei for followim gud olketa step bilong hem. (1 Peter 2:21) Hem nambawan privilege for olketa niu wan hia share long fulfillment bilong John 10:16, wea Jesus talem profesi hao hem bae hipimap olketa “nara sheep” for serve tugeta witim olketa disaepol bilong hem wea spirit anointim!
For startim aftanun program, disfala tok “Herem Samting Wea Spirit Hem Talem” explainim hao spirit bilong Jehovah hem tok long iumi thru long Bible, “faithful and wise slave,” and conscience bilong iumi wea kasem training from Bible. (Matthew 24:45) Dastawe, olketa Christian no need for herem wanfala really voice from heven for savve hao for mekem God hapi. Nextfala tok, “Strong for Teaching Wea Fitim Wei for Lovem God,” hem encouragem olketa Christian no for luk long olketa idea wea world mekhae long hem wea savve spoelem man. Yes, sapos iumi no bossim wei for laek savve long difren samting, bae iumi stap long danger long olketa nogud information wea olketa apostate and olketa nara wakman bilong Satan startim. Hem barava moabeta for evritaem readim Bible and evri article insaed Wastaoa and Wekap!
Nextfala tok wea garem theme “Go Ahed for Holem Plan Bilong Healthy Toktok” hem strongim important wei for savve gud long olketa “plan,” or arrangement, bilong truth insaed Bible. (2 Timothy 1:13) For minim disfala plan hem key no just for garem love for God bat tu for luksavve long samting wea no fitim truth.
Tingim sapos Jehovah lukim iu olsem best samting. Hem bigfala honor! Disfala tok “‘Olketa Best Samting’ Fulimap Haos Bilong Jehovah” wea kam from profesi bilong Haggai, hem barava givim encouragement bikos hem promisim olketa wea lisin hao evri member bilong datfala “great crowd” olketa barava best samting long Jehovah. (Revelation 7:9) Dastawe, Jehovah bae sevem olketa thru long lastfala taem wea hem bae “sekem” olketa nation long “great tribulation” wea bae happen. (Haggai 2:7, 21, 22; Matthew 24:21) Bat long distaem, pipol bilong Jehovah mas lukaot long spiritual wei, olsem tok “Bible Profesi Mekem Iumi Lukaot Evritaem” hem minim. Speaker talem toktok bilong Jesus: “Go ahed for lukaot, bikos iufala no savve long wanem day nao Lord bilong iufala bae kam.” (Matthew 24:42) Hao nao iumi go ahed for lukaot long spiritual wei? Thru long wei for busy insaed service bilong Jehovah, go ahed long prea, and go ahed for luk forward long bigfala day bilong Jehovah.
Lastfala tok bilong day garem theme “Profesi Toktok Long Taem Bilong End.” Bae pipol rememberim for planti year. Why nao olsem? Bikos speaker announcem release bilong disfala niu buk—Tingting Strong Long Profesi Bilong Daniel! “Disfala barava naesfala 320-page buk hem story abaotem evri part long buk bilong Daniel,” speaker hem talem. Hem barava strongim faith bilong man for lukim wei wea Jehovah showimaot klia olketa profesi Toktok bilong hem!
MEK-THRI DAY: Profesi Toktok Bilong God Nating Fail
Lastfala day bilong convention hem start witim thrifala-part tok wea garem theme “Profesi Toktok for Taem Wea God Markem.” Thrifala part story abaotem thrifala toktok bilong judgment for finisim samting wea profet Habakkuk raet abaot. First wan hem againstim bighed nation bilong Judah and mek-tu wan hem againstim Babylon wea rul long raf wei. Last wan, wea no fulfill yet, hem wei wea klosap nao olketa wicked bae finis evribit. Abaotem Armageddon, lastfala brata wea givim last part bilong disfala tok hem apim feeling for fraet long God taem hem sei: “Tru nao, man bae fraet tumas taem Jehovah givim go full paoa bilong hem.”
“Tinghae Long Spiritual Present Wea Iumi Kasem” hem title bilong Bible drama wea muvim audience. Disfala drama wea mekem man barava tingting gud hem markem difren wei wea Jacob and Esau tingim spiritual samting. Esau lukdaonem spiritual present wea hem kasem, dastawe Jacob nao kasem, wea hem barava tinghae long hem. Speaker askem audience: “Wanem nao [spiritual present] Jehovah givim long iumi?” Speaker hem ansa olsem: “Truth abaotem Word bilong hem, Bible; hope for laef olowe; and disfala privilege for stand for hem olsem pipol wea talemaot gud nius.”
Nextfala part garem theme “Wanem Nao Spesol Present Bilong Iumi Minim Long Iu?” Iumi showimaot stretfala wei for tingim spiritual present wea iumi kasem taem iumi putim service bilong Jehovah and olketa spiritual privilege firstaem long material samting or interest bilong iumiseleva. Long disfala wei iumi mekem wei wea iumi fren witim Jehovah main samting long laef bilong iumi, wea difren tumas from Adam, Esau, and olketa Israelite wea no faithful.
Disfala pablik tok, “Mekem Evri Samting Niu—Olsem Profesi Talem,” hem joinim tugeta fofala profesi abaotem datfala “niu heven” and “niu earth.” (Isaiah 65:17-25; 66:22-24; 2 Peter 3:13; Revelation 21:1, 3-5) Hem klia tumas, Jehovah markem narafala bigfala wei for fulfillim olketa profesi hia winim datwan wea happen long pipol bilong hem wea kamap gud moa long 537 B.C.E. Yes, hem tingim Kingdom gavman bilong hem (datfala “niu heven”) and olketa wea stap anda long hem long earth (datfala “niu earth”), wea bae stap insaed wanfala nambawan paradaes earth.
For finisim convention long wanfala barava hapi end hem disfala tok “Samting Wea Iumi Hope for, Taem Word Bilong God Gaedem Iumi.” Hem remindim evriwan hao “taem wea stap yet hem short” for finisim waka for talemaot Kingdom. (1 Corinthians 7:29) Yes, iumi standap long door bilong fulfillment bilong taem wea Jehovah markem for distroem Satan and full wicked system bilong hem. Letem iumi garem semkaen feeling olsem man wea raetem psalm wea sing: “Soul bilong iumi hem weitim Jehovah. Hem nao helper and shield bilong iumi.” (Psalm 33:20) Nambawan hope stap front long olketa wea putim hope bilong olketa long olketa profesi toktok bilong God!
[Piksa long page 7]
Drama wea muvim feeling mekhae long fasin for tinghae long spiritual present wea olketa servant bilong Jehovah kasem
Planti wea followim profesi toktok bilong God olketa baptaes